புதுச்சேரி-கடலூர் சாலையில் போக்குவரத்து மாற்றம் ; வாகன ஓட்டிகளே உஷார்... மாற்று வழிகள் இதோ!

புதுச்சேரி மற்றும் கடலூர் இடையே போக்குவரத்தை எளிதாக்கும் நோக்கில் ரோடியர் மில் ரயில்வே கேட் பகுதியில் ரூ.72 கோடி மதிப்பீட்டில் புதிய மேம்பாலம் கட்டும் பணிகள் தீவிரமாக நடைபெற்று வருகின்றன.

புதுச்சேரி-கடலூர் சாலையில் போக்குவரத்து மாற்றம்

Source : ABP NADU

புதுச்சேரி : ரயில்வே கேட் பகுதியில் ரூ.72 கோடி மதிப்பீட்டில் புதிய மேம்பாலம் கட்டும் பணிகள் தீவிரமாக நடைபெற்று வரும் நிலையில் புதுச்சேரி-கடலூர் சாலையில் போக்குவரத்து மாற்றம் செய்யப்பட்டுள்ளது இதன் காரணமாக ரோடியர் மில் ரயில்வே கேட் மூடப்பட்டுள்ளது.

புதுச்சேரி-கடலூர் சாலையில் போக்குவரத்து மாற்றம்

புதுச்சேரி மற்றும் கடலூர் இடையே போக்குவரத்தை எளிதாக்கும் நோக்கில், ரோடியர் மில் ரயில்வே கேட் பகுதியில் ரூ.72 கோடி மதிப்பீட்டில் புதிய மேம்பாலம் கட்டும் பணிகள் தீவிரமாக நடைபெற்று வருகின்றன. இதன் ஒரு பகுதியாக, தற்போது அங்கு ராட்சச தூண்கள் அமைக்கும் பணிகள் விறுவிறுப்பாக நடைபெற்று வருகின்றன.

போக்குவரத்து மாற்றம்:

மேம்பாலம் கட்டும் பணிகளை முன்னிட்டு, அப்பகுதியில் போக்குவரத்து மாற்றங்கள் மேற்கொள்ளப்பட்டுள்ளன. இதன்படி: புதுச்சேரியில் இருந்து கடலூர் செல்லும் வாகனங்கள், ஒருங்கிணைந்த நீதிமன்ற வளாகம் முன்பு வலது புறமாக திரும்பி, பிரிக்கப்படாத பாதையை ஒட்டி கடலூர் சாலையில் தொடர வேண்டும். கடலூரில் இருந்து புதுச்சேரிக்கு வரும் வாகனங்கள், முதலியார் பேட்டை மரப்பாலத்தில் இருந்து 100 அடி சாலை வழியாக திருப்பி விடப்படுகின்றன.

ரோடியர் மில் ரயில்வே கேட் மூடல்:

மேம்பால பணிகளை துரிதப்படுத்தும் நோக்கத்தில், ரோடியர் மில் ரயில்வே கேட்டை முடுக்கும் முடிவு எடுக்கப்பட்டுள்ளது. இதுதொடர்பாக, போக்குவரத்து காவல் கண்காணிப்பாளர் நித்யா ராதாகிருஷ்ணன், காவல் கண்காணிப்பாளர் ரச்சனா சிங், ரயில்வே உதவி பொறியாளர் சக்திவேல் உள்ளிட்ட அதிகாரிகள் நேரில் ஆய்வு மேற்கொண்டனர்.

கேட் மூடப்படும் காலத்தில்:

• வெங்கடசுப்பா ரெட்டியார் சதுக்கம் முதல் ஆலை வீதி வரை போக்குவரத்து முற்றிலும் தடை செய்யப்படுகிறது.
• கடலூரில் இருந்து புதுச்சேரிக்கு வரும் கனரக வாகனங்கள், 100 அடி சாலை வழியாக பயணிக்க வேண்டும்.
• இலகுரக வாகனங்கள் மற்றும் இருசக்கர வாகனங்கள் , ஆலை வீதி வழியாக சென்று, புவன்கரே வீதியில் வலது புறமாக திரும்பி, காராமணி குப்பம் வழியாக நெல்லித்தோப்பை நோக்கி செல்ல வேண்டும்.

பொதுமக்களுக்கு அறிவுரை:

இந்த மாற்றங்கள், மேம்பால கட்டுமான பணிகள் முடியும் வரை இடைக்காலமாக அமல்படுத்தப்படுகின்றன. பொதுமக்கள் மற்றும் ஓட்டுனர்கள், புதிய போக்குவரத்து பாதைகளை பின்பற்றி கவனமாக பயணிக்குமாறு போலீசார் கேட்டுக்கொண்டுள்ளனர். அத்துடன், சாலையில் அமைக்கப்படும் சுருக்கமான அடையாளக் குறிகள் மற்றும் போலீசாரின் வழிகாட்டல்களையும் பின்பற்றுமாறு கேட்டுக்கொள்ளப்படுகிறது. மேம்பாலம் முடிந்ததும், இந்த வழித்தடம் மிகச் சிறப்பான போக்குவரத்திற்கான தளமாக அமையும் என எதிர்பார்க்கப்படுகிறது.