திருப்பத்தூர்: இறுதி வாக்காளர் பட்டியல் வெளியீடு! எத்தனை பேர் நீக்கம்? சேர்ப்பு? - முழு விவரங்கள் இதோ!

திருப்பத்தூர் மாவட்ட ஆட்சியர் அலுவலகத்தில் இன்று இறுதி வாக்காளர் பட்டியல் வெளியிடப்பட்டது. இதில் எத்தனை வாக்காளர் உள்ளனர் என்ற விவரங்களை தெரிந்து கொள்ளலாம்.

திருப்பத்தூரில் இறுதி வாக்காளர் பட்டியல் வெளியீடு

Source : சிறப்பு ஏற்பாடு

திருப்பத்தூர் மாவட்டத்தில் 9 லட்சத்து 11 ஆயிரத்து 599 வாக்காளர்களுடன் இறுதி வாக்காளர் பட்டியல் வெளியீடப்பட்டது. வரைவு வாக்காளர் பட்டியலுக்கு பிறகு 28 ஆயிரத்து 927 வாக்காளர்கள் இணைக்கப்பட்டுள்ளனர்.

நான்கு சட்டமன்ற தொகுதிகளிலும் இடம்பெற்றுள்ள இறுதி வாக்காளர் பட்டியலை மாவட்ட ஆட்சியர் சிவசௌந்தரவல்லி வெளியிட்டார். இந்த இறுதி வாக்காளர் பட்டியலில் 9 லட்சத்து 11 ஆயிரத்து 599 வாக்காளர்கள் இடம் பெற்றுள்ளனர். 

முன்னதாக வாக்காளர் பட்டியல் சிறப்பு தீவிர திருத்த பணிகள் துவங்குவதற்கு முன் திருப்பத்தூர் மாவட்டத்தில் 9 லட்சத்து 99 ஆயிரத்து 411 வாக்காளர்கள் இடம்பெற்றிருந்த நிலையில், எஸ் ஐ ஆர் கணக்கீட்டு படிவம் பணிகள் 100% நிறைவு பெற்று வெளியிடப்பட்ட வரைவு வாக்காளர் பட்டியலில் வாணியம்பாடி சட்டமன்ற தொகுதியில் 2,32,804 வாக்காளர்களும் ஆம்பூர் சட்டமன்ற தொகுதியில் 2,06,486 வாக்காளர்களும் ஜோலார்பேட்டை சட்டமன்ற தொகுதியில் 2 லட்சத்து 26 ஆயிரத்து 693 வாக்காளர்கள் மற்றும் திருப்பத்தூர் சட்டமன்ற தொகுதியில் 2 லட்சத்து 16 ஆயிரத்து 689 வாக்காளர்கள் என மொத்தமாக திருப்பத்தூர் மாவட்டத்தில் 8 லட்சத்து 82,672 வாக்காளர்கள் வரைவு வாக்காளர் பட்டியலில் இடம் பெற்றனர். 

மேலும், நான்கு சட்டமன்ற தொகுதிகளிலும் இறந்தவர்கள் கண்டறிய இயலாத மற்றும் முகவரியில் இல்லாதவர்கள் நிரந்தரமாக இடம்பெயர்ந்தவர்கள் இரட்டை பதிவு என மொத்தமாக ஒரு லட்சத்து 16 ஆயிரத்து 739 வாக்காளர்கள் பட்டியலில் இருந்து நீக்கப்பட்டனர். 

அதனை தொடர்ந்து கோரிக்கை அல்லது ஆட்சேபனை இருப்பின் திருப்பத்தூர் மாவட்டத்தில் அமைந்துள்ள 1202 வாக்குச்சாவடி நிலையங்கள் கோட்டாட்சியர் அலுவலகங்கள் வட்டாட்சியர் அலுவலகங்கள் மற்றும் நகராட்சி அலுவலகங்களில் சமர்ப்பிக்கலாம் எனவும் அது சம்பந்தமாக வாக்காளர் பதிவு அலுவலர்கள் விசாரணை மேற்கொண்டு உரிய நடவடிக்கைகள் எடுக்கப்படும் என அறிவிக்கப்பட்ட நிலையில், பெறப்பட்ட கோரிக்கைகளை விசாரணை மேற்கொண்டு தற்போது இன்று இறுதி வாக்காளர் பட்டியல் வெளியிடப்பட்டுள்ளது. 

இந்த இறுதி வாக்காளர் பட்டியலில் வாணியம்பாடி சட்டமன்ற தொகுதியில் 2,40,220 ஜோலார்பேட்டை சட்டமன்ற தொகுதியில் 2,33,830 ஆம்பூர் சட்டமன்ற தொகுதியில் 2,12,631 மற்றும் திருப்பத்தூர் சட்டமன்ற தொகுதியில் 2,24,918 என மொத்தமாக திருப்பத்தூர் மாவட்டத்தில் 9,11,599 வாக்காளர்கள் இடம்பெற்றுள்ளனர். இதில் 4,49,464 ஆண் வாக்காளர்களும் 4,61,996 பெண் வாக்காளர்களும்  மற்றும் 139 மூன்றாம் பாலின வாக்காளர்கள் அடங்குவர். எனவே வரைவு வாக்காளர் பட்டியலுக்கு பிறகு 28,927 வாக்காளர்கள் வாக்காளர் பட்டியலில் இணைக்கப்பட்டுள்ளனர். 

திருப்பத்தூர் மாவட்டத்தில் எஸ்ஐஆர் பணிகளுக்கு பிறகு மொத்தமாக 87 ஆயிரத்து 812 வாக்காளர்கள் நீக்கப்பட்டு, 9 லட்சத்து 11 ஆயிரத்து 599 வாக்காளர்கள் இறுதி வாக்காளர் பட்டியலில் இடம் பெற்றுள்ளனர் என்பது குறிப்பிடத்தக்கது.