TN Rain Alert: வங்க கடலில் உருவான ஆழ்ந்த காற்றழுத்த தாழ்வு பகுதி.. தமிழ்நாட்டில் மழை இருக்குமா? இன்றைய வானிலை நிலவரம் இதோ..

தென் கிழக்கு வங்க கடலில் நிலவிய குறைந்த காற்றழுத்த தாழ்வு பகுதி அதே இடத்தில் ஆழ்ந்த காற்றழுத்த தாழ்வு பகுதியாக மாறியுள்ளதாக வானிலை ஆய்வு மையம் தெரிவித்துள்ளது.

தமிழகத்தில் மழை (கோப்பு புகைப்படம்)

தென் கிழக்கு வங்க கடலில் நிலவிய குறைந்த காற்றழுத்த தாழ்வு பகுதி அதே இடத்தில் ஆழ்ந்த காற்றழுத்த தாழ்வு பகுதியாக மாறியுள்ளதாக வானிலை ஆய்வு  மையம் தெரிவித்துள்ளது. 

தென்கிழக்கு வங்க கடல் மற்றும் அதை ஒட்டிய தெற்கு அந்தமான் கடற்பகுதியில் உள்ள குறைந்த காற்றழுத்த தாழ்வு பகுதி, இன்று காலை 5.30 மணி அளவில் அதே பகுதியில் ஆழ்ந்த காற்றழுத்த தாழ்வு பகுதியாக மாறியுள்ளது. இது இன்று மாலையில் காற்றழுத்த தாழ்வு மண்டலமாக வலுப்பெற வாய்ப்புள்ளது. அதன் பின்னர் தென்கிழக்கு வங்க கடல் மற்றும் கிழக்கு மத்திய வங்க கடல் மற்றும் அந்தமான் கடலை ஒட்டியுள்ள பகுதிகளில் நாளை (மே 10 ஆம் தேதி) சூறாவளி புயலாக மாற வாய்ப்புள்ளது. இது மே 12ஆம் தேதி காலை வரை வடக்கு-வடமேற்கு திசையை நோக்கி நகரக்கூடும். அதன்பிறகு, இது படிப்படியாக மீண்டு, வடக்கு-வடகிழக்கு திசையில் வங்கதேசம்-மியான்மர் கடற்கரையை நோக்கி நகரக்கூடும் என வானிலை ஆய்வு மையம் தெரிவித்துள்ளது.

இந்த சூறாவளி புயல் வங்கதேசம்-மியான்மர் கடற்கரையை நோக்கி நகரும் என தெரிவிக்கப்பட்டுள்ள நிலையில், தமிழ்நாட்டிற்கு மழை இருக்காது என தகவல் தெரிவிக்கப்பட்டுள்ளது. கடந்த சில தனங்களாக தமிழ்நாட்டில் பல மாவட்டங்களில் மழை பெய்து வரும் நிலையில் தற்போது உருவாக இருக்கும் புயல் காரணமாக கூடுதல் மழை பொழிவு இருக்காது. மேலும் வட தமிழக கடலோரப்பகுதிகளின் மேல்  வளிமண்டல கீழடுக்கு சுழற்சி நிலவுகிறது. இதன் காரணமாக,

09.05.2023: தமிழ்நாடு, புதுச்சேரி மற்றும் காரைக்கால் பகுதிகளில் ஓரிரு இடங்களில் இடி மின்னலுடன் கூடிய லேசானது முதல் மிதமான மழை  பெய்யக்கூடும்.

10.05.2023 முதல் 12.05.2023 வரை: தமிழ்நாடு, புதுச்சேரி மற்றும் காரைக்கால் பகுதிகளில் ஓரிரு இடங்களில் லேசானது முதல் மிதமான மழை  பெய்யக்கூடும்.

சென்னை மற்றும் புறநகர் பகுதிகளுக்கான வானிலை முன்னறிவிப்பு:

அடுத்த 24 மணி நேரத்திற்கு வானம் ஓரளவு மேகமூட்டத்துடன் காணப்படும். நகரின் ஓரிரு இடங்களில் இடி மின்னலுடன் கூடிய லேசான / மிதமான மழை  பெய்யக்கூடும். அதிகபட்ச வெப்பநிலை 36-37 டிகிரி செல்சியஸ் மற்றும் குறைந்தபட்ச வெப்பநிலை 26-27 டிகிரி செல்சியஸை ஒட்டியே இருக்கும்.

தமிழ்நாட்டில் மழை பொழிவு: 

தமிழ்நாட்டில் கோடை மழை மார்ச் 1 முதல்  நேற்று காலை வரை வழக்கத்தை விட கூடுதலாக 114 சதவிகிதம் அளவிற்கு பெய்துள்ளதாக மண்டல வானிலை ஆய்வு மையம் தெரிவித்துள்ளது. அதன்படி, மார்ச் 1 முதல்  மே 7ம் தேதி காலை வரை, வழக்கமாக 77.5 மில்லி மீட்டர் அளவிற்கு மழை பொழியும். ஆனால், நடப்பாண்டில் ஆண்டில் அதே காலகட்டத்தில் 165.7 மில்லி மீட்டர் அளவிற்கு மழை பெய்துள்ளது என தெரிவிக்கப்பட்டுள்ளது.