சைபர் குற்றவாளிக்கு செக்: வங்கி அறிக்கையைப் பகுப்பாய்வு செய்யும் மாணவர் சாதனம்!

சமீபகாலமாக, அதிநவீன தொழில்நுட்பங்களைப் பயன்படுத்தி நடத்தப்படும் சைபர் குற்றங்கள் நாடு முழுவதும் தீவிரமடைந்துள்ளன.

சைபர்கிரைம்

Source : Pixabay

சென்னை: சைபர் குற்றங்களைத் திறம்படத் தடுக்கவும், நிதி மோசடி வழக்குகளின் விசாரணையை விரைவுபடுத்தவும், பொறியியல் கல்லூரி மாணவர்கள் குழு ஒன்று, தமிழ்நாடு காவல்துறைக்கு உதவக்கூடிய ஆறு வகையான அதிநவீன தொழில்நுட்ப வசதிகளை உருவாக்கி அளித்துள்ளனர்.

சைபர் குற்றத் தடுப்பு: போலீசாருக்கு உதவ பொறியியல் மாணவர்களின் 6 புதிய தொழில்நுட்ப வசதிகள்!

சமீபகாலமாக, அதிநவீன தொழில்நுட்பங்களைப் பயன்படுத்தி நடத்தப்படும் சைபர் குற்றங்கள் நாடு முழுவதும் தீவிரமடைந்துள்ளன. குறிப்பாக, 'டிஜிட்டல் கைது' (Digital Arrest) போன்ற புதிய வகை மோசடிகள் பொதுமக்களிடமிருந்து கோடிக்கணக்கான ரூபாயைப் பறித்து, காவல்துறைக்கு பெரும் சவாலாக மாறியுள்ளன.

சைபர் குற்றங்களைத் திறம்படத் தடுக்கவும், நிதி மோசடி வழக்குகளின் விசாரணையை விரைவுபடுத்தவும், பொறியியல் கல்லூரி மாணவர்கள் குழு ஒன்று, தமிழ்நாடு காவல்துறைக்கு உதவக்கூடிய ஆறு வகையான அதிநவீன தொழில்நுட்ப வசதிகளை உருவாக்கி அளித்துள்ளனர்.

சிறப்புப் பயிற்சி

சென்னை அசோக் நகரில் அமைந்துள்ள மாநில சைபர் குற்றப்பிரிவு தலைமையகத்தில், 52 பொறியியல் கல்லூரி மாணவர்கள் இரண்டு மாதங்கள் சிறப்புப் பயிற்சி பெற்றனர். இந்த பயிற்சியின் முடிவில், அவர்கள் ஆறு முக்கிய தொழில்நுட்ப வசதிகளைக் கொண்ட கருவிகளை உருவாக்கி, விசாரணை அதிகாரிகளின் பயன்பாட்டிற்காக வழங்கியுள்ளனர்.

வங்கி கணக்கு பகுப்பாய்வு சாதனம் (Bank Account Analysis Tool)

இந்த ஆறு வசதிகளில் முக்கியமானது, வங்கி கணக்கு வரவு-செலவு அறிக்கைகளை (Bank Statement) பகுப்பாய்வு செய்யும் சாதனம் ஆகும்.

நாமக்கல் மாவட்டம், திருச்செங்கோடு செங்குந்தர் பொறியியல் கல்லூரியைச் சேர்ந்த, பி.இ., கணினி அறிவியல் மற்றும் 'சைபர் செக்யூரிட்டி' மாணவர் தீபன்ராஜ் இதுகுறித்து கூறியதாவது:

"நாங்கள் உருவாக்கியுள்ள இந்த வசதியில், பாதிக்கப்பட்டவரின் வங்கி வரவு-செலவு அறிக்கையை பதிவேற்றம் செய்தவுடன், அவரது கணக்கிலிருந்து மோசடி செய்த நபரின் கணக்கிற்குப் பணம் சென்ற தேதி, நேரம், மற்றும் அந்தத் தொகையை அவர் வேறு எந்தக் கணக்கிற்கு மாற்றியுள்ளார் என்ற அனைத்து விவரங்களையும் உடனடியாகத் தெரிந்து கொள்ளலாம்."

பல மோசடிகளை அடையாளம் காணல்:

"பாதிக்கப்பட்ட பலரின் வங்கி அறிக்கைகளை ஒரே நேரத்தில் பதிவேற்றினால், சந்தேக நபர்கள் எத்தனை வங்கி கணக்குகளைப் பயன்படுத்துகின்றனர், அவர்கள் இதற்கு முன்பு எத்தனை பேரிடம் மோசடி செய்துள்ளனர் என்ற தகவல்களும் கிடைத்துவிடும். இதனால், மோசடி செய்யப்பட்ட பணத்தை 24 மணி நேரத்திற்குள் முடக்குவதற்கான வாய்ப்புகள் அதிகரிக்கும்," என்று தீபன்ராஜ் தெரிவித்தார்.

விசாரணைக்கு உதவும் 'சாட்பாட்' (Investigative Chatbot)

விசாரணை அதிகாரிகளின் பணிச்சுமையைக் குறைக்கும் வகையில், அவர்களுக்கு உதவும் 'சாட்பாட்' வசதியையும் மாணவர்கள் உருவாக்கி உள்ளனர்.

சென்னை ராமாபுரம், எஸ்.ஆர்.எம்., ஈஸ்வரி பொறியியல் கல்லூரி மாணவர் சிவகேசவ் மற்றும் மேற்கு தாம்பரம் ஸ்ரீசாய்ராம் இன்ஸ்டிடியூட் ஆப் டெக்னாலஜி கல்லூரி மாணவர் பாலகுரு ஆகியோர் கூறியதாவது: "விசாரணை அதிகாரி மேற்கொள்ள வேண்டிய அடுத்தகட்ட நடவடிக்கைகள், அவர்கள் திரட்ட வேண்டிய ஆவணங்கள், சைபர் குற்றச் சம்பவங்களுக்கான ஆதாரங்கள், அதற்கான நீதிமன்ற நடவடிக்கைகள் தொடர்பான அனைத்து விவரங்களையும் இந்த சாட்பாட் மூலம் எளிதில் தெரிந்து கொள்ளலாம்."

மொத்தம் ஆறு வகையான தொழில்நுட்ப வசதிகளை இந்த மாணவர்கள் உருவாக்கியுள்ளதன் மூலம், சைபர் குற்றங்களைத் தடுக்கவும், நிதி மோசடி வழக்குகளை விரைந்து முடிக்கவும் தமிழ்நாடு காவல்துறைக்கு பெரும் உதவி கிடைத்துள்ளது.