CM Stalin Tweet: அதிர்ச்சி..! தற்கொலை செய்து கொண்ட கோவை சரக டிஐஜி - முதலமைச்சர் ஸ்டாலின் இரங்கல்

கோவை சரக டிஐஜி விஜயகுமார் தற்கொலை செய்து கொண்டதாக கூறப்படும் நிலையில், முதலமைச்சர் ஸ்டாலின் இரங்கல் தெரிவித்துள்ளார்.

முதலமைச்சர் ஸ்டாலின் இரங்கல்

கோவை சரக டிஐஜி விஜயகுமார் தற்கொலை செய்து கொண்டதாக கூறப்படும் நிலையில், முதலமைச்சர் ஸ்டாலின் இரங்கல் தெரிவித்துள்ளார்.

முதலமைச்சர் டிவீட்:

இதுதொடர்பாக முதலமைச்சர் ஸ்டாலின் வெளியிட்டுள்ள டிவிட்டர் பதிவில் “கோவை சரக காவல்துறை துணைத் தலைவர் விஜயகுமார் இ.கா.ப., அவர்கள் இன்று அகால மரணம் அடைந்தார் என்ற துயரமான செய்தியைக் கேட்டு மிகுந்த அதிர்ச்சியும் வருத்தமும் அடைந்தேன். விஜயகுமார் அவர்கள் தனது பணிக்காலத்தில் மாவட்டக் காவல் கண்காணிப்பாளர் உள்ளிட்ட பல்வேறு பணிப் பொறுப்புகளில் சிறப்பாகப் பணியாற்றி தமிழ்நாடு காவல்துறைக்குப் பெருமை சேர்த்தவர். அவருடைய இந்த மரணம் தமிழ்நாடு காவல் துறைக்குப் பேரிழப்பாகும். அவருடைய குடும்பத்தாருக்கும் காவல்துறையைச் சேர்ந்த நண்பர்களுக்கும் என்னுடைய ஆழ்ந்த இரங்கலையும் ஆறுதலையும் தெரிவித்துக் கொள்கிறேன்” என குறிப்பிட்டுள்ளார்.

கோவை சரக காவல்துறை துணைத் தலைவர் திரு. விஜயகுமார் இ.கா.ப., அவர்கள் இன்று அகால மரணம் அடைந்தார் என்ற துயரமான செய்தியைக் கேட்டு மிகுந்த அதிர்ச்சியும் வருத்தமும் அடைந்தேன். திரு. விஜயகுமார் அவர்கள் தனது பணிக்காலத்தில் மாவட்டக் காவல் கண்காணிப்பாளர் உள்ளிட்ட பல்வேறு பணிப் பொறுப்புகளில்… pic.twitter.com/TryrsY3FSK

— M.K.Stalin (@mkstalin) July 7, 2023

டிஐஜி தற்கொலை?

சென்னை அண்ணாநகர் போலீஸ் துணை ஆணையராக பணியாற்றி வந்த விஜயகுமார், கடந்த ஜனவரி மாதம் தான் கோவை சரக டிஐஜி ஆக மாற்றப்பட்டார். இதனைத் தொடர்ந்து ஜனவரி 7 ஆம் தேதி அவர் பதவியேற்றார். இந்நிலையில் கோவை பந்தய சாலை பகுதியில் உள்ள முகாம் அலுவலகத்தில் விஜயகுமார் உயிரிழந்து கிடந்தார். அவர் துப்பாக்கியால் சுட்டு தற்கொலை செய்துக் கொண்டதாக கூறப்படுவது பெரும் பரபரப்பை ஏற்படுத்தியுள்ளது. அவரது உடல் கோவை அரசு மருத்துவமனையில் பிரேத பரிசோதனைக்காக வைக்கப்பட்டுள்ளது. மேலும் விஜயகுமார் தற்கொலை தொடர்பாக போலீசார் விசாரணை நடத்தி வருகின்றனர். அதேசமயம் கடந்த 2 தினங்களாகவே விஜயகுமார் மன உளைச்சலில் இருந்தாக கூறப்படுகிறது. 

நடந்தது என்ன?

நேற்று இரவு துணை காவல் ஆணையர் சந்தீஷ் குழந்தையின் பிறந்தநாள் விழாவிற்கு சென்று வந்த விஜயகுமார், இன்று காலை 6.50 மணியளவில் வழக்கம்போல நடைப்பயிற்சி மேற்கொண்டுள்ளார். பின்னர் அவருடைய பாதுகாவலர் ரவி என்பவரிடம் கைத்துப்பாக்கியை வாங்கிக் கொண்டு தனது அறைக்குள் சென்று துப்பாக்கியால் சுட்டு தற்கொலை செய்து கொண்டுள்ளார் என போலீசார் நடத்திய விசாரணையில் தெரிய வந்ததாக தகவல் வெளியாகியுள்ளது. இந்த சம்பவம் தொடர்பாக  விஜயகுமாரின் குடும்பத்தினரிடமும் விசாரணை நடைபெற உள்ளது. 

பணி வரலாறு:

விஜயகுமார் கடந்த 2009 ஆம் ஆண்டு காவல்துறையில் பணியில் இணைந்தார். இதனைத் தொடர்ந்து காஞ்சிபுரம், கடலூர், நாகப்பட்டினம் மற்றும் திருவாரூர் மாவட்ட கண்காணிப்பாளராக பணியாற்றியுள்ளார்.சென்னையில் அண்ணா நகர் துணை ஆணையராக பணியாற்றி வந்த இவருக்கு பதவி உயர்வு வழங்கப்பட்டது. இதனைத் தொடர்ந்து கோவை சரக டி.ஐ.ஜி-யாக மாற்றப்பட்டார் என்பது குறிப்பிடத்தக்கது.