காரைக்காலில் ரெட் அலர்ட்: மிரட்டும் புயல் - பாதுகாப்பாக இருக்க ஆட்சியரின் 15 முக்கிய அறிவுரைகள்!

காரைக்கால் மாவட்டப் பகுதிகளில் மிக கனமழை முதல் அதி தீவிர மழை வரை பெய்ய வாய்ப்புள்ளதால், சிவப்பு மற்றும் ஆரஞ்சு எச்சரிக்கை விடுக்கப்பட்டு பொதுமக்கள் பாதுகாப்பான இருக்க ஆட்சியர் அறிவுத்தியுள்ளார்.

மாவட்ட ஆட்சியர் மற்றும் சித்தரிப்பு படம்

Source : ABP

காரைக்கால்: வங்கக்கடலில் உருவாகியுள்ள காற்றழுத்த தாழ்வு மண்டலம் புயலாக வலுப்பெற்று, அடுத்த சில நாட்களில் காரைக்கால் மாவட்டக் கடற்கரைக்கு இணையாக நகர்ந்து செல்லக்கூடும் என இந்திய வானிலை ஆய்வு மையம் (IMD) எச்சரித்துள்ளது. இதன் காரணமாக, காரைக்கால் மாவட்டப் பகுதிகளில் மிக கனமழை முதல் அதி தீவிர மழை வரை பெய்ய வாய்ப்புள்ளதால், இம்மாவட்டத்திற்குச் சிவப்பு (Red Alert) மற்றும் ஆரஞ்சு (Orange Alert) எச்சரிக்கை விடுக்கப்பட்டுள்ளது. இதைத் தொடர்ந்து, பொதுமக்கள் மிகுந்த எச்சரிக்கையுடனும், பாதுகாப்புடனும் இருக்கும்படி மாவட்ட ஆட்சியரும், மாவட்ட பேரிடர் மேலாண்மை ஆணையமும் இன்று (27.11.2025) முக்கிய அறிவிப்பை வெளியிட்டுள்ளனர்.

புயல் நகர்வும் வானிலை எச்சரிக்கையும்

இந்திய வானிலை ஆய்வு மையத்தின் சமீபத்திய அறிக்கைப்படி, வங்கக்கடலில் தற்போது நிலவும் காற்றழுத்த தாழ்வு மண்டலம் மேலும் வலுப்பெற்று, அடுத்த 48 மணி நேரத்தில் புயலாக மாறும் என எதிர்பார்க்கப்படுகிறது. இந்தப் புயலானது நவம்பர் 28 முதல் டிசம்பர் 1 வரை காரைக்கால் மாவட்ட கடற்கரைப் பகுதிக்கு இணையாக வடக்கு-வடமேற்கு திசையில் நகர்ந்து செல்லும் வாய்ப்புள்ளது.

இந்தப் புயலின் தாக்கம் காரணமாக, காரைக்கால் மாவட்டப் பகுதிகளில் பலத்த காற்றுடன் மிக கனமழை மற்றும் அதி தீவிர மழை பெய்யக்கூடும் என்று கணிக்கப்பட்டுள்ளது. எனவே, பொதுமக்கள் பாதுகாப்பாக இருக்க வேண்டும் என்றும், அவசியமற்ற பயணங்களைத் தவிர்க்க வேண்டும் என்றும் மாவட்ட நிர்வாகம் வலியுறுத்தியுள்ளது.

மாவட்ட ஆட்சியரின் 15 முக்கிய ஆலோசனைகள்

பொதுமக்களின் பாதுகாப்பைக் கருத்தில் கொண்டு, காரைக்கால் மாவட்ட ஆட்சியரும் மாவட்ட பேரிடர் மேலாண்மை ஆணையமும் இணைந்து பின்வரும் 15 அத்தியாவசிய ஆலோசனைகளைக் கட்டாயம் கடைப்பிடிக்குமாறு கேட்டுக்கொண்டுள்ளனர்:

* அவசியமற்ற பயணங்களைத் தவிர்க்கவும்: மிகவும் அவசியம் இருந்தால் அன்றி, பொதுமக்கள் யாரும் வீட்டை விட்டு வெளியே செல்வதைத் தவிர்க்க வேண்டும்.

* இடி மின்னல் நேரங்களில் வெளியேற வேண்டாம்: குறிப்பாக, இடி மின்னல் நிகழும் நேரங்களில் வெளியில் செல்வதை அறவே தவிர்க்க வேண்டும்.

* பாதுகாப்பான இடம் தேடவும்: நீங்கள் வெளியில் இருக்கும்போது இடி மின்னல் வர நேர்ந்தால், வெட்ட வெளியில் நிற்காமல் உடனடியாக அருகாமையில் உள்ள பாதுகாப்பான கட்டிடத்தின் பாதுகாப்பை நாட வேண்டும்.

* ஆபத்தான இடங்களில் நிற்க வேண்டாம்: மின் கம்பங்கள், மரங்கள், பயன்பாட்டில் இல்லாத பழைய மற்றும் பலவீனமான கட்டிடங்களுக்குக் கீழே நிற்பதைத் தவிர்க்கவும்.

* குழந்தைகள் பாதுகாப்பு: குழந்தைகளை வெளியே விளையாட அனுமதிக்க வேண்டாம்.

* நீர் வழிப் பயணத்தைத் தவிர்க்கவும்: தேங்கிய அல்லது ஓடும் நீரின் வழியாக வாகனம் ஓட்டாமல் இருப்பது நல்லது. இது வாகனத்தை பாதிப்பதுடன், இந்த சூழ்நிலையில் உதவி பெறுவதும் கடினம்.

வீட்டுப் பாதுகாப்பு மற்றும் ஏற்பாடுகள்

* அத்தியாவசியப் பொருட்களை இருப்பு வைக்கவும்: உங்கள் வீட்டில் பால், ரொட்டி போன்ற அடிப்படை அத்தியாவசியப் பொருட்கள், மற்றும் உணவுப் பொருட்களைப் போதுமான அளவு இருப்பு வைத்துக் கொள்ளுங்கள்.

* மருந்துகள்: அத்தியாவசியமான மற்றும் வழக்கமாக எடுத்துக்கொள்ளும் மருந்துகளை வாங்கி வைத்துக்கொள்ளவும்.

* ஆவணப் பாதுகாப்பு: அனைத்து முக்கிய ஆவணங்களையும் (பிறப்புச் சான்றிதழ், பட்டா, அடையாள அட்டைகள்) நீர்புகாத பைகளில் பாதுகாப்பாக வைக்கவும்.

* மின் கம்பிகளை அணுக வேண்டாம்: ஏதேனும் மின் கம்பிகள் அறுந்து விழுந்து கிடக்க நேர்ந்தால், அதன் அருகில் செல்ல வேண்டாம், உடனடியாக அதிகாரிகளுக்குத் தெரிவிக்கவும்.

*மின்சாதனங்களை அணைக்கவும்: மின்சாரம் தடைப்பட்டால், வீட்டில் உள்ள அனைத்து மின் சாதனங்களையும் (ஃப்ரிட்ஜ், ஏசி போன்றவை) அணைத்து வைக்கவும்.

சுகாதாரம் மற்றும் தகவல் தொடர்பு

* சுத்தமான குடிநீர்: சுடவைத்து வடிகட்டிய நீரைக் குடிக்கவும்.

* சுகாதாரம்: வெளியில் சென்று வரும்போது, உங்கள் கைகளையும் கால்களையும் சுத்தமாக கழுவுங்கள்.

* செல்போன் பயன்பாடு: நீங்கள் வெளியில் இருக்கும்போது மின்னல் ஏற்பட்டால், செல்போனை அதிகமாகப் பயன்படுத்துவதைத் தவிர்க்கவும்.

* வதந்திகளை நம்ப வேண்டாம்: வதந்திகளை நம்பாமல், அரசு அளிக்கும் வழிகாட்டுதல் மற்றும் அதிகாரபூர்வ எச்சரிக்கைகளை மட்டுமே பின்பற்றவும்.

உதவி எண்கள் மற்றும் தகவல் தொடர்பு

பேரிடர் தொடர்பான உதவி தேவைப்படுபவர்கள் அல்லது புகார்களைத் தெரிவிக்க விரும்பும் பொதுமக்கள், மாவட்ட நிர்வாகத்தால் வழங்கப்பட்டுள்ள இலவச அழைப்பு எண்கள் 1070 மற்றும் 1077 ஆகியவற்றின் வழியாகத் தொடர்பு கொள்ளலாம்.

மேலும், அதிகாரபூர்வ எச்சரிக்கைகள் மற்றும் ஆலோசனைகளை உடனுக்குடன் தெரிந்துகொள்ள, பொதுமக்கள் அனைவரும் தேசிய பேரிடர் மேலாண்மை ஆணையத்தின் 'Sachet app'-ஐத் தங்களது செல்போனில் பதிவிறக்கம் செய்து பயன்படுத்திக் கொள்ளுமாறும் மாவட்ட ஆட்சியர் கேட்டுக்கொண்டுள்ளார்.