இது சாதாரண மரமில்லை... ‘கடல் திராட்சை’! புதுச்சேரி மக்களின் கண்ணில் படாத இயற்கை தந்த பரிசு!
புதுச்சேரி கடற்கரைப் பகுதிகளில் பரவலாக வளர்ந்து வரும் ‘கடல் திராட்சை’ குறித்து இன்றளவும் பெரும்பாலான பொதுமக்களுக்குத் தெரியாமல் இருப்பது ஆச்சரியத்தை ஏற்படுத்தியுள்ளது.
புதுச்சேரி: புதுச்சேரி கடற்கரைப் பகுதிகளில் பரவலாக வளர்ந்து வரும் ‘கடல் திராட்சை’ குறித்து இன்றளவும் பெரும்பாலான பொதுமக்களுக்குத் தெரியாமல் இருப்பது ஆச்சரியத்தை ஏற்படுத்தியுள்ளது.
கடல் திராட்சை
புதுச்சேரி கடற்கரைப் பகுதிகளில் பரவலாக வளர்ந்து வரும் ‘கடல் திராட்சை’ (Sea Grape) தாவரம் குறித்து இன்றளவும் பெரும்பாலான பொதுமக்களுக்குத் தெரியாமல் இருப்பது இயற்கை ஆர்வலர்களிடையே ஆச்சரியத்தை ஏற்படுத்தியுள்ளது. திராட்சையைப் போன்ற தோற்றத்துடன் காணப்படும் இந்த வித்தியாசமான பழம், கடற்கரைச் சூழலுடன் இயல்பாக இணைந்து வளரக்கூடிய ஒரு தாவரமாகும். ஆங்கிலத்தில் ‘Sea Grape’ என அழைக்கப்படும் இதன் தாவரவியல் பெயர் Coccoloba uvifera ஆகும்.
50 சதவீத மக்களுக்குக் கூட தெரியாத அதிசயம்!
புதுச்சேரி கடற்கரை முழுவதும் ஆங்காங்கே இந்தத் தாவரங்கள் அடர்த்தியாக வளர்ந்திருந்தாலும், இது உண்ணக்கூடிய ஒரு வகை திராட்சை என்பது புதுச்சேரியில் உள்ள சுமார் 50 சதவீத மக்களுக்குக்கூடத் தெரியவில்லை எனக் கூறப்படுகிறது.
கடல் திராட்சை பொதுவாக கடலோரப் பகுதிகளில், குறிப்பாக வீசும் உப்புச் காற்று மற்றும் உவர் மண்ணையும் தாங்கி மிகக் கடினமான சூழலிலும் செழித்து வளரக்கூடிய அபாரத் தன்மை கொண்டது. கடற்கரை அரிப்பைக் கட்டுப்படுத்துவதிலும், கடலோரச் சூழலியல் சமநிலையைப் பாதுகாப்பதிலும் இத்தாவரங்கள் மிக முக்கியப் பங்காற்றுகின்றன.
சூழலியல் பாதிப்பும் ஆமைகளின் வருகையும்
பொதுவாக, கடற்கரைப் பகுதிகளில் இயற்கையான மணல் பரப்பும், கடல் திராட்சை போன்ற தாவரங்களும் பாதுகாக்கப்படும் போது, அங்கே 'பங்குனி ஆமை' (Olive Ridley) உள்ளிட்ட கடல் ஆமைகள் முட்டையிடுவதற்காக வந்து செல்வதற்கான சாத்தியக்கூறுகள் அதிகம்.
ஆனால், தற்போது புதுச்சேரி கடற்கரையோரங்களில் இயற்கை மணல் பரப்பை அழித்துக் கற்கள் கொட்டப்பட்டு தடுப்புகள் அமைக்கப்பட்டு வருவதால், இதுபோன்ற அரிதான உயிரினங்களின் இயற்கையான வருகை பெருமளவில் பாதிக்கப்படுவதாகச் சூழலியல் ஆர்வலர்கள் கவலை தெரிவிக்கின்றனர்.
பழத்தின் சுவையும் மருத்துவக் குணங்களும்
பச்சை நிறத்தில் காய் காய்க்கும் இந்தக் கடல் திராட்சைகள், நன்கு பழுத்ததும் கவரும் ஊதா (Purple) நிறத்திற்கு மாறுகின்றன.
உணவுப் பயன்பாடு: இனிப்புச் சுவை கொண்ட இந்தப் பழங்களை நேரடியாகப் பறித்துச் சாப்பிடலாம். மேலும், இதைக் கொண்டு சுவையான ஜாம் (Jam), ஜெல்லி (Jelly) போன்ற மதிப்புக்கூட்டப்பட்ட உணவுப் பொருட்களையும் தயாரிக்க முடியும்.
மருத்துவப் பயன்: இத்தாவரத்தின் சில பகுதிகள் பாரம்பரிய மருத்துவ முறைகளிலும் பல்வேறு நோய்களுக்கு மருந்தாகப் பயன்படுத்தப்பட்டு வருவதாகக் கூறப்படுகிறது.
மாடித்தோட்டத்திற்கு ஏற்றத் தாவரம்!
கடல் திராட்சையை விதைகளின் மூலம் வளர்த்தால் அது பலன் கொடுத்து பழங்கள் காய்க்கப் பல ஆண்டுகள் எடுத்துக்கொள்ளும். ஆனால், வெட்டுக்கன்று (Cuttings) அல்லது ஒட்டுக்கன்று (Grafting) முறையில் வளர்க்கும்போது மிகக் குறைந்த காலத்திலேயே காய்க்கத் தொடங்கும்.
இதனால், இதைக் கடலோரப் பகுதிகளில் மட்டுமன்றி, வீடுகளின் முன்புறத் தோட்டம் மற்றும் மாடித்தோட்டங்களிலும் எளிதாக வளர்க்கும் வாய்ப்புகள் உள்ளன.
இயற்கை ஆர்வலர்களின் கோரிக்கை
புதுச்சேரி கடற்கரைப் பகுதிகளில் கடல் திராட்சை தாவரங்கள் அதிகளவில் தானாகவே வளர்ந்து வருகின்றன. இவற்றைச் சீராகப் பாதுகாத்து, முறையாகப் பராமரித்தால் கடலோரப் பகுதி பசுமையாவதோடு புதுச்சேரியின் அழகும் மேலும் கூடும்.
நமக்குப் அருகிலேயே, இயற்கையாக வளர்ந்து வரும் இந்த ‘கடல் திராட்சை’ பற்றிய விழிப்புணர்வு பொதுமக்களிடையே ஏற்பட வேண்டும் என்றும், கடற்கரைச் சூழலோடு பிணைந்துள்ள இதுபோன்ற இயற்கைச் செல்வங்களைப் பாதுகாப்பது அனைவரின் கடமை என்றும் இயற்கை ஆர்வலர்கள் ஆணித்தரமாக வலியுறுத்துகின்றனர்.
Before You Go
"வேதனையில் இருக்கும் சிறுவனை இப்டியா இமிடேட் செய்வது" கொந்தளித்த TRB ராஜா
தலைப்பு செய்திகள்
ட்ரெண்டிங் செய்திகள்
