அமோனியா வாயு கசிவு விபத்தில் குழந்தை தொழிலாளர்கள் பலியா? வெளிச்சத்திற்கு வந்த கொடூரம்

திருவள்ளூரில் இறால்களை அப்புறப்படுத்தும் தொழிற்சாலையில் 15 வயது சிறுமிகள் இருவர் உயிரிழந்தது குறித்து ஆதார் அடிப்படையில் விசாரணை நடத்தப்படும் - ஆட்சியர்

திருவள்ளூர் ஆட்சியர் கவிதா

Source : whatsapp

பெரியபாளையம் அருகே தனியார் இறால் மீன் பதப்படுத்தும் தொழிற்சாலையில் 15 வயது சிறுமிகள் இருவர் உயிரிழந்தது குறித்து ஆதார் அடிப்படையில் விசாரணை நடத்தப்படும் எனவும், குழந்தை தொழிலாளர்கள் பணியில் அமர்த்தப்பட்டு உள்ளனரா என்பது குறித்து விசாரணை நடத்தப்படும் எனவும் ஆட்சியர் கவிதா தெரிவித்துள்ளார். பெரியபாளையத்தில் அமோனியா வாயு கசிந்து விபத்து ஏற்பட்ட இடத்தில் ஆய்வு செய்த பின் இதனை தெரிவித்தார்.

 

திருவள்ளூர் மாவட்டம் பெரியபாளையம் அருகே கன்னிகைபேர் பகுதியில் தனியார் இறால் மீன் பதப்படுத்தும் தொழிற்சாலையில் கடந்த 21-ஆம் தேதி அமோனயா வாயு கசிந்து விபத்தில் இதுவரை 10 பேர் உயிரிழந்தனர்.

இந்த நிலையில் இன்று திருவள்ளூர் ஆட்சியர் கவிதா இறால் பதப்படுத்தும் தொழிற்சாலையில் ஆய்வு செய்தார். இறால் ஏற்றும் பகுதி உள்ளிட்ட பகுதிகளில் ஆய்வு செய்த அவர், உணவு பாதுகாப்பு துறை, ஊரக வளர்ச்சி துறை, வருவாய் துறை, மாசு கட்டுப்பாட்டு துறை அதிகாரிகளுடன் ஆய்வு கூட்டம் நடத்தினார். அப்போது தொழிற்சாலை நிர்வாகம் தரப்பில் உயிரிழந்தவர்களும், பாதிக்கப்பட்டவர்களுகளுக்கும் இழப்பீடு வழங்க வேண்டும் எனவும், நிலுவை ஊதியத்தை வழங்க வேண்டும் எனவும் ஆட்சியர் கவிதா அறிவுறுத்தினார்.

பின்னர் செய்தியாளர்களிடம் பேசிய அவர், தொழிற்சாலையில் உள்ள 200 டன் இறால்களை அப்புறப்படுத்தும் பணிகள் நடந்து வருவதாகவும், இதுவரை 10 பேர் உயிரிழந்துள்ளதாகவும் 15 வயது சிறுமிகள் இருவர் உயிரிழந்தது குறித்து ஆதார் அடிப்படையில் விசாரணை நடத்தப்படும் எனவும் தெரிவித்தார். குழந்தை தொழிலாளர்கள் பணியில் அமர்த்தப்பட்டு உள்ளனரா என்பது குறித்து விசாரணை நடத்தப்படும் எனவும், மண்டபத்தில் தங்க வைக்கப்பட்டுள்ளவர்களை சொந்த ஊருக்கு அனுப்புவதற்கான நடவடிக்கைகள் எடுக்கப்படும் எனவும், தொழிலாளர்களுக்கு அடிப்படை வசதிகள் செய்து தரப்படவில்லை என்பது தவறான கருத்து எனவும், ஆட்சியரை சந்திக்க விடுவதில்லை என்பது குறித்தான கருத்து தவறு எனவும் தெரிவித்த அவர், முகாமில் தங்க வைக்கப்பட்டுள்ளவர்கள் சொந்த ஊர்களுக்கு மொபைல் போனில் பேசிக் கொண்டுதான் இருக்கின்றனர் எனவும் ஆட்சியர் கவிதா தெரிவித்தார்.