போலி லிங்க் மூலம் ஆசிரியர் வங்கி கணக்கில் இருந்து பணம் அபேஸ்: சைபர் க்ரைம் போலீஸ் விசாரணை!

கரூரில் அரசுப்பள்ளி ஆசிரியர் வங்கிக் கணக்கிலிருந்து ரூபாய் 3.24 லட்சம் கையாடல். கரூர் சைபர் கிரைம் போலீசார் வழக்குப்பதிவு செய்து தீவிர விசாரணை

கரூர் சைபர் கிரைம் போலீசார் வழக்குப்பதிவு செய்து தீவிர விசாரணை.

கரூர் மாவட்டம், குளித்தலை வட்டம் காவேரி நகர் பகுதியை சேர்ந்தவர் கலைமணி (52). கரூர் அடுத்த தாளியாபட்டி அரசு நடுநிலைப்பள்ளி ஆசிரியராக கலைமணி பணியாற்றி வருகிறார். கடந்த 11.04.2022 அன்று வங்கி அதிகாரி என்ற பெயரில், மர்ம நபர் ஒருவர் இவருக்கு போன் செய்துள்ளார். சந்தேகம் அடைந்த ஆசிரியர் கலைமணி இணைப்பை துண்டித்து விட்டு, வீட்டை விட்டு வெளியே சென்றுள்ளார். அப்போது ஆசிரியரின் செல்போன் எண்ணுக்கு வந்த வங்கி தொடர்பான போலியான லிங்கை அவரது மகள் கிளிக் செய்து ஆசிரியரின் வங்கி பதிவு செல்போன் எண்ணுக்கு வந்த OTP எண்ணை பதிவிட்டுள்ளார். 

 

5 நாட்களுக்கு பிறகு தனது வங்கி கணக்கில் பணம் எடுப்பதற்காக ஏடிஎம் சென்று ஆசிரியர் கலைமணி பார்த்தபோது, ரூபாய் 2 லட்சத்து 99 ஆயிரத்து 900 எடுக்கப்பட்டுள்ளது. அதேபோல், மற்றொரு வங்கிக் கணக்கில் ரூபாய் 25 ஆயிரம் எடுக்கப்பட்டுள்ளது. மொத்தமாக அவரதுவங்கிக் கணக்கிலிருந்து ரூ. 3.24 லட்சம் மோசடியாக கையாடல் செய்யப்பட்டது அவருக்கு தெரிய வந்துள்ளது. அதிர்ச்சி அடைந்த ஆசிரியர் கலைமணி கரூர் சைபர் கிரைம் காவல் நிலையத்தில் புகார் அளித்துள்ளார். இந்த புகாரின் அடிப்படையில், மோசடியில் ஈடுபட்ட மர்ம நபர் குறித்து கரூர் சைபர் கிரைம் போலீசார் வழக்கு பதிவு செய்து தீவிர விசாரணை மேற்கொண்டு வருகின்றனர்.

 

கல்லூரி மாணவி இரண்டு பேர் மாயமானது குறித்து போலீசார் தீவிர விசாரணை;

கல்லூரி மாணவி உள்பட 2 பேர் மாயமானது குறித்து போலீசார் விசாரணை நடத்தி வருகிறார்கள்.

கரூர் சுங்ககேட் பகுதியை சேர்ந்தவர் கிருஷ்ணன். இவருடைய மகள் ஹேமலதா (வயது 19). இவர் தனியார் கல்லூரியில் முதலாம் ஆண்டு படித்து வருகிறார். இந்தநிலையில் வழக்கம்போல் கல்லூரிக்கு சென்ற ஹேமலதா அதன்பிறகு வீடு திரும்பவில்லை. இந்த சம்பவம் குறித்து அவரது பெற்றோர் கொடுத்த புகாரின் பேரில் தாந்தோணிமலை போலீசார் வழக்குப்பதிவு செய்து விசாரணை நடத்தி வருகின்றனர்.

 

ஜார்க்கண்ட் மாநிலம் சிந்தாபுரத்தை சேர்ந்தவர் சாந்தி தியாகம் (15). இவர் கரூர் மாவட்டம் வெண்ணெய் மலையிலுள்ள ஆதரவற்றோர் இல்லத்தில் தங்கி இருந்தார். இந்தநிலையில் அவர் அங்கிருந்து திடீரென மாயமானார். இதுகுறித்து அந்த இல்லத்தின் ஒருங்கிணைப்பாளர் சேகர், வெங்கமேடு போலீஸ் நிலையத்தில் கொடுத்த புகாரின் பேரில் சப்-இன்ஸ்பெக்டர் பொன்னுசாமி வழக்குப்பதிவு செய்து விசாரணை நடத்தி வருகிறார்.