முதலமைச்சரின் பாதுகாப்பு வாகனங்கள் குறைப்பு : நீதிபதி ஆனந்த் வெங்கடேஷ் தமிழ்நாடு அரசுக்கு பாராட்டு

முதலமைச்சரின் பாதுகாப்பு வாகனங்கள் குறைக்கப்பட்டதற்கு சென்னை உயர் நீதிமன்ற நீதிபதி ஆனந்த் வெங்கடேஷ், தமிழ்நாடு அரசுக்கு பாராட்டு

முதல்வர் ஸ்டாலின்

முதலமைச்சரின் பாதுகாப்பு வாகனங்கள் குறைக்கப்பட்டதற்கு சென்னை உயர் நீதிமன்ற நீதிபதி ஆனந்த் வெங்கடேஷ், தமிழ்நாடு அரசுக்கு பாராட்டு தெரிவித்துள்ளார். தமிழக உள்துறை செயலாளர் எஸ்.கே.பிரபாகரை நேரில் அழைத்து தமிழ்நாடு முதல்வர் மு.க.ஸ்டாலின் அவர்களுக்கு சென்னை உயர் நீதிமன்றம் பாராட்டு தெரிவித்தது. அதே நேரத்தில் முதல்வரின் பாதுகாப்பில் எந்த சமரசமும் செய்து கொள்ள வேண்டாம் என நீதிபதி அறிவுறுத்தியுள்ளார்.

முன்னதாக, “சிவாஜிகணேசனின் 96 வது பிறந்த நாள் விழாவை முன்னிட்டு  சென்னை அடையாறு டி.ஜி.எஸ்.தினகரன் சாலையில் உள்ள சிவாஜி மணி மண்டபத்தில்  நடைபெற்ற நிகழ்ச்சியில் முதலமைச்சர் மற்றும் அமைச்சர்கள் கலந்து கொண்டனர். இதற்காக சாலைகளில் இரும்பு தடுப்புகளை அமைத்து சாலைகளில் போக்குவரத்து நிறுத்தி வைத்தனர். இதனால் அந்த சாலையில் கடுமையான போக்குவரத்து நெரிசல் ஏற்பட்டது. காலையில் பணிக்கு செல்பவர்கள் மிகுந்த சிரமத்திற்கு ஆளாகினர். அந்த சாலை வழியாக உயர்நீதிமன்றம் வந்த நீதிபதி ஆனந்த் வெங்கடேஷ் வாகனத்தையும் காவல்துறையினர் தடுத்துள்ளனர்.

இதனால் உயர்நீதிமன்றத்திற்கு 25 நிமிடம் தாமதமாக வந்ததால் தனது பணி பாதிக்கப்பட்டுள்ளதால் இது குறித்து உள்துறை செயலாளர் ஆஜாராகி விளக்கம் அளிக்க நீதிபதி ஆனந்த் வெங்கடடேஷ் உத்தரவிட்டார். அதன்படி காணொலி காட்சி மூலம் ஆஜாரான உள்துறை செயலாளர் பிரபாகரிடம் எதனடிப்படையில் 25 நிமிடங்கள் தடுத்து நிறுத்தினீர்கள்? பொது ஊழியரான நீதிபதியான என்னை பணி செய்யவிடாமல் தடுத்தது நீதிமன்ற அவமதிப்பு என நீதிபதி சரமாரியாக கேள்வி எழுப்பினார்.

நடைபெற்ற நிகழ்விற்கு வருத்தம் தெரிவித்த உள்துறை செயலாளர் சென்னை மாநகர காவல் ஆணையரை நேரில் வரவழைத்து விளக்கம் கேட்டுள்ளதாகவும்,
எதிர்காலத்தில் இது போன்ற நிகழ்வு நடைபெறாது என உறுதியளித்தார். இதையடுத்து, முதலமைச்சர் அமைச்சர்கள் நிகழ்ச்சிக்கு போகும்போது இதுபோல் காவல்துறையினர் தடுத்து நிறுத்துவார்களா என கேள்வி எழுப்பிய நீதிபதி, முதலமைச்சர் மற்றும் அமைச்சர்களுக்கு வழங்கப்படும் அதே மரியாதையை நீதிபதிகளுக்கும் அளிக்க வேண்டும் என உத்தரவிட்டார்.

இந்த நிகழ்வு நீதிமன்ற அவமதிப்பாக இருந்தாலும் எதிர்காலத்தில் இதுபோன்று நடக்காது என்று நம்புவதாக நினைத்து நீதிமன்ற அவமதிப்பு நடவடிக்கை மேற்கொள்ளவில்லை என தெரிவித்தார்.

இந்நிலையில், தற்போது பாதுகாப்பு வாகனங்கள் குறைக்கப்பட்டு நடவடிக்கை செயல்படுத்தப்பட்டிருப்பதால், உடனடியாக நடவடிக்கை எடுத்த தலைமை செயலாளர், டிஜிபி மற்றும் உள்துறை செயலாளரின் முயற்சி பாராட்டத்தக்கது என உயர்நீதிமன்ற நீதிபதி தெரிவித்திருப்பதுடன், அரசின் இந்த நடவடிக்கை நீதிபதிகளுக்கு மட்டுமல்ல; பொது மக்களுக்கும் பயனளிக்கும் எனவும் தெரிவித்துள்ளார்.

அரசியல் தொடர்பான செய்திகளை Abpnadu தளத்துல் பின்தொடரவும்..

வைகோ மகனுக்கு மதிமுகவில் முக்கிய பொறுப்பு..! இது வாரிசு அரசியல் இல்லையென வைகோ விளக்கம்..!#Vaiko #mdmk https://t.co/kn1r9IZCtd

— ABP Nadu (@abpnadu) October 20, 2021