காரைக்காலில் ஸ்தம்பித்த PRTC போக்குவரத்து: 70% பேருந்துகள் பணிமனையில் முடக்கம் - பொதுமக்கள் கடும் அவதி!
பராமரிக்க போதிய நிதியின்றி பணிமனையில் தஞ்சம் புகுந்த அரசுப் பேருந்துகளால் காரைக்கால் மாவட்டத்தில் போக்குவரத்து பாதிப்பால் பொதுமக்கள் கடும் அவதியடைந்து வருகின்றனர்.
காரைக்கால்: புதுச்சேரி அரசுப் போக்குவரத்துக் கழகத்தின் (PRTC) முதுகெலும்பாகக் கருதப்படும் அரசுப் பேருந்துகள், காரைக்கால் மாவட்டத்தில் அடுத்தடுத்துப் பழுதாகி பணிமனையில் முடங்கிக் கிடப்பது பெரும் அதிர்ச்சியை ஏற்படுத்தியுள்ளது. உதிரிபாகங்கள் வாங்கக் கூட நிதியின்றி, நிறுவனம் தவித்து வருவதால் மாவட்டத்தின் 70 சதவீத போக்குவரத்து சேவை அடியோடு முடங்கி போய்யுள்ளது.
நிதி நெருக்கடியில் சிக்கிய போக்குவரத்துக் கழகம்
புதுச்சேரி அரசின் பொதுத்துறை நிறுவனமான பி.ஆர்.டி.சி, தற்போது கடுமையான நிதி நெருக்கடியில் சிக்கித் தவிக்கிறது. பேருந்துகளின் சிறிய பழுதுகளைச் சரிசெய்யத் தேவையான உதிரிபாகங்கள், டயர்கள் மற்றும் என்ஜின் ஆயில் போன்ற அடிப்படைப் பொருட்களைக் கூட வாங்க நிதியின்றி நிர்வாகம் முடங்கிக் கிடப்பதே இந்த அவல நிலைக்கு முக்கியக் காரணமாகக் கூறப்படுகிறது.
70 சதவீதப் பேருந்துகள் முடக்கம்: வழித்தட வாரியான பாதிப்பு
காரைக்கால் மாவட்டத்தில் இருந்து சென்னை, நெய்வேலி, சிதம்பரம் மற்றும் உள்ளூர் பகுதிகளுக்குப் பொதுமக்கள் மற்றும் மாணவர்களின் பிரதான பயணத் தேர்வாக பி.ஆர்.டி.சி பேருந்துகள் இருந்து வருகின்றன. ஆனால், கடந்த ஒரு மாதமாக இந்த நிலைமை தலைகீழாக மாறியுள்ளது. மாவட்டத்தில் மொத்தம் இயங்கி வந்த 33 பேருந்துகளில் தற்போது உதிரிபாகங்கள் கிடைக்காமல் ஒவ்வொன்றாகப் பணிமனையில் தஞ்சம் புகுந்துள்ளன. சிறிய பழுதுகளைக் கூட நீக்க முடியாத அவல நிலையில் அதிகாரிகள் கைகளைக் கட்டிக்கொண்டு நிற்பதால், பேருந்துகள் அனைத்தும் துருப்பிடிக்கும் நிலைக்குத் தள்ளப்பட்டுள்ளன.
காரைக்கால் மாவட்டத்தில் மொத்தம் இயங்கி வந்த 33 பேருந்துகளில், தற்போது 20 பேருந்துகள் பழுதாகி பணிமனையில் முடங்கியுள்ளன. இதனால் வெறும் 30 சதவீதப் பேருந்துகள் மட்டுமே தற்போது இயக்கப்படுகின்றன.
- சென்னை வழித்தடம்: 5 பேருந்துகள்
- சிதம்பரம் & நெய்வேலி: தலா 2 பேருந்துகள்
- மயிலாடுதுறை & கும்பகோணம்: தலா 1 பேருந்து
- நகரப் பேருந்துகள் (Town Bus): 9 பேருந்துகள்
இதனால் வெளியூர் செல்லும் பயணிகள் மட்டுமின்றி, கிராமப்புறங்களில் இருந்து நகரத்திற்கு வரும் மாணவர்களும் பெரும் பாதிப்புக்குள்ளாகியுள்ளனர்.
துருப்பிடிக்கும் பேருந்துகள் – அதிகாரிகளின் இயலாமை
பழுதான பேருந்துகளைச் சரிசெய்து இயக்கினால் மட்டுமே நிறுவனத்திற்கு வருவாய் கிடைக்கும் என்ற எளிய உண்மையை நிர்வாகம் உணரத் தவறிவிட்டதாக சமூக ஆர்வலர்கள் குற்றம் சாட்டுகின்றனர். உதிரிபாகங்கள் கிடைக்காததால், பணிமனையில் நிறுத்தப்பட்டுள்ள பேருந்துகள் மழையிலும் வெயிலிலும் காய்ந்து துருப்பிடித்து வீணாகி வருகின்றன. அதிகாரிகளோ நிதி ஒதுக்கீடு இல்லாததால் கைகளைக் கட்டிக்கொண்டு வேடிக்கை பார்க்கும் நிலையில் உள்ளனர்.
தனியார் பேருந்துகளின் ஆதிக்கம் மற்றும் கட்டணக் கொள்ளை
அரசுப் பேருந்துகள் முறையாக இயக்கப்படாததால், அந்த வழித்தடங்களில் தனியார் பேருந்துகளின் ஆதிக்கம் அதிகரித்துள்ளது. "அரசுப் பேருந்துகளை நம்பிப் பணிக்குச் செல்ல முடியவில்லை. இதைச் சாதகமாகப் பயன்படுத்திக் கொள்ளும் தனியார் பேருந்துகள், சில நேரங்களில் கூடுதல் கட்டணம் வசூலிப்பதாக" பொதுமக்கள் வேதனையுடன் தெரிவிக்கின்றனர். குறிப்பாக, தினக்கூலித் தொழிலாளர்கள் மற்றும் முதியவர்கள் குறைந்த கட்டணச் சேவையை இழந்து தவிக்கின்றனர்.
அரசுக்கு வலுக்கும் கோரிக்கை
காரைக்கால் மாவட்டத்தின் போக்குவரத்து முதுகெலும்பாக விளங்கும் பி.ஆர்.டி.சி-யைக் காப்பாற்ற புதுச்சேரி அரசு உடனடியாகத் தலையிட வேண்டும். போர்க்கால அடிப்படையில் நிதியை ஒதுக்கீடு செய்து, முடங்கிக் கிடக்கும் பேருந்துகளைச் சீரமைக்க வேண்டும் என்பதே பொதுமக்களின் ஒட்டுமொத்த எதிர்பார்ப்பாக உள்ளது.
அரசு விரைந்து நடவடிக்கை எடுக்குமா? அல்லது பி.ஆர்.டி.சி-யின் சக்கரம் காரைக்காலில் நிரந்தரமாக முடங்குமா? என்பதைப் பொறுத்திருந்துதான் பார்க்க வேண்டும்.
Before You Go
Kangana Ranaut on CJP Protest :”போராட்டமா இது வாந்தி வருது இவங்களை வளர்த்தது யார்?” மாணவர்களை அசிங்கப்படுத்திய கங்கனா
தலைப்பு செய்திகள்
ட்ரெண்டிங் செய்திகள்
