''திமுக ஆட்சியை அகற்றுவோம்''- ஜெயலலிதா நினைவிடத்தில் சூளுரைத்த ஈபிஎஸ், வழிமொழிந்த அதிமுகவினர்!
எடப்பாடி பழனிசாமி தலைமையிலான அதிமுக மூத்த நிர்வாகிகள், திமுக ஆட்சியை அகற்றுவோம் என்று உறுதிமொழி ஏற்றனர்.
திமுக ஆட்சியை அகற்றுவோம் என்று அதிமுக பொதுச் செயலாளர் எடப்பாடி பழனிசாமி தலைமையிலான அதிமுகவினர் உறுதிமொழி ஏற்றனர். முன்னாள் முதல்வர் ஜெயலலிதாவின் 8ஆம் ஆண்டு நினைவு நாள் இன்று (டிசம்பர் 5) அனுசரிக்கப்படுகிறது.
திமுக ஆட்சியை அகற்றுவோம்
இதை அடுத்து அதிமுகவினர் சென்னை மெரினாவில் உள்ள ஜெயலலிதா நினைவிடத்தில் மரியாதை செலுத்தினர். தொடர்ந்து எடப்பாடி பழனிசாமி தலைமையிலான அதிமுக மூத்த நிர்வாகிகள், திமுக ஆட்சியை அகற்றுவோம் என்று உறுதிமொழி ஏற்றனர்.
எடப்பாடி பழனிசாமி கூறும்போது, ‘’இந்திய அரசியல் வரலாற்றில், ஏழைகளின் இதயம் தொட்டவர். புரட்சித் தலைவர் வழியில் அயராது உழைப்போம். கழகம் காக்க கட்சிக்குள் சிங்கமெனத் திகழ்ந்த புரட்சித் தலைவியின் வழியில் திமுக ஆட்சியை அகற்றுவோம் என்று உறுதி ஏற்போம். அயராது உழைப்போம்.
போலி திராவிட மாடலின் பொய் முகத்தை அம்பலப்படுத்துவோம்
மக்களை ஏமாற்றி வரும் பொம்மை முதலமைச்சரின் ஆட்சிக்கு முடிவு கட்டுவோம். தந்தை முதலமைச்சர், மகன் துணை முதலமைச்சர், மருமகன் அதிகாரம் செலுத்தும் நபர். இந்த போலி திராவிட மாடலின் பொய் முகத்தை அம்பலப்படுத்துவோம்’’ என்று உறுதி கூறினார். அவரைப் பின்தொடர்ந்து பிற நிர்வாகிகள் அதையே வழிமொழிந்து முழக்கம் இட்டனர்.
ஜெயலலிதாவுக்கு நடந்தது என்ன?
முன்னாள் முதல்வர் ஜெயலலிதா, உடல் பருமன், உயர் இரத்த அழுத்தம், கட்டுப்பாடற்ற நீரிழிவு நோய், ஹைப்போ தைராய்டிசம், நாள்பட்ட வயிற்றுப்போக்குடன் எரிச்சல் கொண்ட குடல் நோய்க்குறி (Irritable Bowel Syndrome with Chronic Diarrhoea) மற்றும் நாள்பட்ட மூச்சுக்குழாய் அழற்சி (Chronic Seasonal Bronchitis) ஆகியவற்றால் ஏற்கனவே பாதிக்கப்பட்டிருந்தார். எனினும் அவரின் மரணத்தில் மர்மம் நிலவியதால், ஓய்வுபெற்ற நீதிபதி ஆறுமுகசாமி தலைமையில் ஆணையம் அமைக்கப்பட்டு, விசாரிக்கப்பட்டது.
அதிமுக பொதுச் செயலாளராக இருந்த ஜெ. மறைவுக்குப் பிறகு, தற்போது எடப்பாடி பழனிசாமி பொதுச் செயலாளராகப் பொறுப்பேற்றுள்ளது குறிப்பிடத்தக்கது.
தலைப்பு செய்திகள்
ட்ரெண்டிங் செய்திகள்
