மீனவர்களுக்கும், மீன் பிரியர்களுக்கும் அதிர்ச்சி தகவல்..

மோசமான வானிலை காரணமாக டிசம்பர் 9 -ம் தேதி முதல் மறு அறிவிப்பு வரும் வரை மயிலாடுதுறை மாவட்ட மீனவர்கள் யாரும் கடலுக்கு மீன்பிடிக்க செல்லக்கூடாது என மீன்வளத்துறை தடைவிதித்து உத்தரவு பிறப்பித்துள்ளது.

செயற்கை நுண்ணறிவு சித்தரிப்பு படம்

Source : ABP

மயிலாடுதுறை: வங்கக் கடலில் நிலவும் வானிலை மாற்றம் காரணமாக, வட தமிழகம் மற்றும் தமிழகக் கடலோரப் பகுதிகளில் பலத்த காற்று வீசக்கூடும் என்ற சென்னை வானிலை ஆய்வு மையத்தின் எச்சரிக்கையைத் தொடர்ந்து, மயிலாடுதுறை மாவட்ட மீனவர்கள் இன்று (09.12.2025) முதல் மறு அறிவிப்பு வரும் வரை கடலுக்கு மீன்பிடிக்கச் செல்லத் தடை விதிக்கப்பட்டுள்ளது. மயிலாடுதுறை மாவட்ட மீன்வளத்துறை உதவி இயக்குநர் இந்த உத்தரவை 26 மீனவ கிராமங்களுக்குத் தபால் மூலம் அனுப்பி வைத்துள்ளார்.

பலத்த காற்றும் வானிலை எச்சரிக்கையும்

சென்னை வானிலை ஆராய்ச்சி மையம் வெளியிட்டுள்ள செய்திக்குறிப்பின்படி, வட தமிழகம் மற்றும் தமிழகக் கடற்கரைப் பகுதிகளில் மணிக்கு 35 முதல் 45 கிலோமீட்டர் வேகத்தில் பலத்த காற்று வீசக்கூடும் என்றும், சில நேரங்களில் காற்றின் வேகம் 55 கிலோமீட்டர் வரை அதிகரிக்க வாய்ப்புள்ளது என்றும் எச்சரிக்கப்பட்டுள்ளது. மீனவர்களின் பாதுகாப்பைக் கருத்தில் கொண்டும், கடல் கொந்தளிப்பு அபாயத்தைத் தவிர்க்கவும், இந்த முன்னெச்சரிக்கை நடவடிக்கை உடனடியாக எடுக்கப்பட்டுள்ளது.

தடை உத்தரவு: இன்று முதல் அமல்

இந்த வானிலை எச்சரிக்கையின் அடிப்படையில், மயிலாடுதுறை மாவட்ட மீன்வளத்துறை உதவி இயக்குநர், மாவட்டத்தில் உள்ள அனைத்து மீனவக் கிராமங்களுக்கும் அதிகாரப்பூர்வத் தடை உத்தரவைத் தபால் மூலம் அனுப்பியுள்ளார்.

அதன்படி, இன்று (09.12.2025) முதல் மறு அறிவிப்பு வரும் வரை, மயிலாடுதுறை மாவட்டத்தைச் சேர்ந்த மீனவர்கள் யாரும் மீன்பிடித் தொழிலுக்காகக் கடலுக்குச் செல்லக் கூடாது என்று அறிவுறுத்தப்பட்டுள்ளது. இந்தத் தடை உத்தரவு, மயிலாடுதுறை மாவட்டத்தைச் சேர்ந்த 26 மீனவ கிராமங்களைச் சேர்ந்த பல்லாயிரக்கணக்கான மீனவர்களை நலனை காக்கிறது. 

தடை உத்தரவு பிறப்பிக்கப்பட்ட முக்கிய கிராமங்கள்

தடை உத்தரவு பிறப்பிக்கப்பட்டுள்ள முக்கிய மீனவ கிராமங்களின் விவரங்கள் பின்வருமாறு

 * கொடியம்பாளையம் தீவு

 * பழையார்

 * கொட்டாயமேடு

 * மடவாமேடு

 * கூழையார்

 * தொடுவாய்

 * திருமுல்லைவாசல்

 * கீழமூவர்கரை

 * புதுக்குப்பம்

 * நாயக்கர் குப்பம்

 * பூம்புகார்

 * வானகிரி

 * சந்திரபாடி, 

 * தரங்கம்பாடி

மேற்கண்ட கிராமங்கள் மட்டுமின்றி, மயிலாடுதுறை மாவட்டத்தின் பிற கடலோரப் பகுதிகளில் உள்ள மொத்தமுள்ள 26 மீனவ கிராமங்களுக்கும் இந்தத் தடை உத்தரவு பொருந்தும்.

மீன்வளத்துறை வலியுறுத்தல்

மீனவர்கள் யாரும் கடலுக்குச் செல்லாமல், தங்கள் மீன்பிடிப் படகுகள் மற்றும் மீன்பிடி உபகரணங்களைச் சேதமடையாமல் பாதுகாப்பான இடங்களில் நிறுத்தி வைக்க வேண்டும் என்றும், மறு அறிவிப்பு வரும் வரை கடலில் எந்தவிதமான நடவடிக்கைகளிலும் ஈடுபடக் கூடாது என்றும் மீன்வளத்துறை உதவி இயக்குநர் உறுதியாக அறிவுறுத்தியுள்ளார். மேலும், அரசின் அறிவிப்புகளை உடனுக்குடன் அறிந்து, அதற்கு இணங்கச் செயல்பட வேண்டும் என்றும் கேட்டுக்கொண்டுள்ளார்.

வாழ்வாதாரத்தில் பாதிப்பு

இந்த திடீர் தடை உத்தரவு காரணமாக, ஆயிரக்கணக்கான மயிலாடுதுறை மாவட்ட மீனவர்களின் அன்றாட வாழ்வாதாரம் பாதிக்கப்படும் சூழல் உருவாகியுள்ளது. தொடர்ச்சியாக, வானிலை மாற்றங்கள் காரணமாக ஏற்படும் இதுபோன்ற தடைகள், மீனவ சமூகத்தினரின் பொருளாதார நிலைமையை மேலும் பலவீனமாக்குகிறது. எனினும், கடலில் ஏற்படும் அசம்பாவிதங்களைத் தவிர்ப்பதற்காக இந்த முன்னெச்சரிக்கை நடவடிக்கையை அரசு மேற்கொண்டுள்ளது குறிப்பிடத்தக்கது.

மீனவக் கிராமங்களில் உள்ள காவல்துறை மற்றும் வருவாய்த் துறை அதிகாரிகள் இந்தத் தடை உத்தரவு நடைமுறைப்படுத்தப்படுவதை உறுதி செய்ய வேண்டும் என்றும், மீனவர்களின் பாதுகாப்பிற்கான அனைத்து ஏற்பாடுகளையும் தயார் நிலையில் வைத்திருக்க வேண்டும் என்றும் மாவட்ட நிர்வாகம் அறிவுறுத்தியுள்ளது.