கே.சி.ஆர் தரப்பு எம்.எல்.ஏக்களுக்கு ரூ.100 கோடி... குதிரை பேரம் பேசி வசமாக சிக்கிய பாஜக?

டிஆர்எஸ் எம்எல்ஏக்கள் பைலட் ரோஹித் ரெட்டி, ரேகா காந்தாராவ், குவ்வாலா பாலராஜு மற்றும் பீரம் ஹர்ஷவர்தன் ஆகியோரை குறிவைத்து லஞ்சம் கொடுக்க முயற்சித்ததாக காவல்துறை கூறுகிறது.

எம்எல்ஏக்கள் பேரம்

ஆளும் டிஆர்எஸ் எம்எல்ஏக்களை விலைக்கு வாங்க முயற்சிகள் மேற்கொள்ளப்பட்டு வருவதாகவும், இதுதொடர்பாக ஏற்கனவே மூன்று பேர் கைது செய்யப்பட்டுள்ளதாகவும் தெலங்கானா போலீசார் கூறியதாக தகவல்கள் வெளியாகியுள்ளன. இதற்கான ஒப்பந்தத்தில் இருந்தபோது பண்ணை வீட்டில் மூவரும் பிடித்து வைக்கப்பட்டனர் என்று கூறப்படுகிறது.

பாஜக குதிரை பேரம்

டிஆர்எஸ் கட்சியின் நான்கு எம்எல்ஏக்கள் குறிவைத்து தாக்கப்பட்டதாக காவல்துறையினருக்கு தகவல் தெரிவிக்கப்பட்டது என்று சைபராபாத் போலீஸ் கமிஷனர் ஸ்டீபன் ரவீந்திரா தெரிவித்தார். இந்த ஒப்பந்தங்கள் ரூ.100 கோடி அல்லது அதற்கும் மேல் இருக்கலாம் என்ற அதிர்ச்சி தகவல்களும் வந்துள்ளன. அஜீஸ் நகரில் அமைந்துள்ள பண்ணை வீட்டில் இன்று மாலை சோதனை நடத்தப்பட்ட நிலையில், எம்.எல்.ஏ.க்கள், "கட்சி மாறுவதற்காக தங்களுக்கு லஞ்சம் கொடுக்கிறார்கள்" என்று கூறி போலீஸாரை அழைத்ததாக ரவீந்திரன் செய்தியாளர்களிடம் தெரிவித்தார். 

யார் டார்கெட்?

டிஆர்எஸ் எம்எல்ஏக்கள் பைலட் ரோஹித் ரெட்டி, ரேகா காந்தாராவ், குவ்வாலா பாலராஜு மற்றும் பீரம் ஹர்ஷவர்தன் ஆகியோரை குறிவைத்து லஞ்சம் கொடுக்க முயற்சித்ததாக காவல்துறை கூறுகிறது. கைது செய்யப்பட்டவர்கள் முகங்கள் மூடப்பட்டு ஹைதராபாத் வந்தனர். இதற்கு முதல்வர் சந்திரசேகர் ராவ் இதுவரை எந்த பதிலும் அளிக்கவில்லை.

பாஜக - டிஆர்எஸ் போட்டி

சந்திரசேகர் ராவ் சில வாரங்கள் முன்பு தனது `தெலங்கானா ராஷ்டிர சமிதி' கட்சியை `பாரத் ராஷ்டிர சமிதி' எனப் பெயர் மாற்றியிருக்கிறார். கடந்த சில மாதங்களாகவே பல்வேறு மாநில முதலமைச்சர்களைச் சந்தித்துவந்த சந்திரசேகர் ராவ், 2024 நாடாளுமன்றத் தேர்தலில் தேசிய அளவில் மூன்றாம் அணி அமைக்கத் திட்டமிட்டுவருவதாக பேச்சுகள் அடிபடும் நிலையில், பாஜக-வுக்கும் பிஆர்எஸ் கட்சிக்கும் இடையே பனிப்போர் நிகழ்ந்து வருகிறது. தற்போது முனுகுடு சட்டமன்றத் தொகுதியில் பிஆர்எஸ் மற்றும் பாஜக இடையே கடும் போட்டி நிலவுகிறது. பிஆர்எஸ் எம்எல்ஏ கோமதிரெட்டி ராஜ கோபால் பாஜகவுக்கு மாறியதைத் தொடர்ந்து முனுகுடுவில் இடைத்தேர்தல் நடத்தும் நிலை வந்துள்ளது.

பேரம் பேசியது யார்?

"தெலங்கானா ராஷ்டிர சமிதி (டிஆர்எஸ்) தற்போதைய பிஆர்எஸ் எம்எல்ஏக்களின் தகவலின் பேரில், நாங்கள் ஒரு பண்ணை வீட்டில் சோதனை செய்தோம், அந்த இடத்தில் பணத்தைக் கண்டுபிடித்தோம். டெல்லியை பூர்வீகமாக கொண்ட, ஃபரிதாபாத்தில் சாமியாராக உள்ள ராமச்சந்திர பாரதி, திருப்பதியைச் சேர்ந்த ஸ்ரீமநாத ராஜுவின் பீடாதிபதி சிம்மயாஜி, பாஜக தலைவர் நந்த குமார் ஆகியோர் இந்த பண்ணை வீட்டில் பேரம் பேசிக் கொண்டிருந்தனர், ”என்று ரவீந்திரன் கூறினார். தொடர்ந்து, ரெய்டு நடந்த பண்ணை வீட்டை ஆய்வு செய்ததாக கூறினார். நான்கு உறுப்பினர்கள் பிஆர்எஸ் எம்எல்ஏ-க்களுக்கு பெரும் தொகை மற்றும் ஒப்பந்தங்களை வழங்குவதன் மூலம் கட்சி மாற்றுவது குறித்த கேள்விக்கு பதிலளித்த கமிஷனர், “விசாரணை நடந்து வருகிறது, விரைவில் கூடுதல் விவரங்களைத் தருவோம். அனைத்து கோணங்களிலும் ஆய்வு செய்யப்பட்டு வருகிறது. சட்டப்படி நடவடிக்கை எடுக்கப்படும்,'' என்றார்.