DMK Congress Alliance : ”காங்கிரஸ் கட்சிக்கு கூடுதல் சீட் கொடுக்கக் கூடாது’ போர்கொடித் தூக்கும் திமுக தலைவர்கள்..?
’ஏற்கனவே, காங்கிரஸ் தலைவர்கள் சிலர் திமுகவிற்கு எதிரான கருத்துகளை பொதுவெளியில் தெரிவித்து வரும் நிலையில், அந்த கட்சிக்கு கூடுதல் சீட்களை கொடுப்பது தேர்தல் களத்தில் சிக்கல்களை ஏற்படுத்தும்”
திமுக கூட்டணியில் அங்கம் வகிக்கும் காங்கிரஸ் கட்சி, தான் போட்டியிட விரும்பும் 39 தொகுதிகளின் பட்டியலை தயாரித்து வைத்திருக்கிறது. அதை விரைவில் திமுக தலைமையிடம் அளிக்க முதலமைச்சர் மு.க.ஸ்டாலினிடம் நேரம் கேட்கப்பட்டுள்ளது.
25 தொகுதிகளில் போட்டியிட்டு 18ல் வென்ற ஸ்டாலின்
கடந்த 2021 தேர்தலில் 25 தொகுதிகளில் போட்டியிட்ட காங்கிரஸ் 18 தொகுதிகளில் வெற்றி பெற்றது. 2016 தேர்தலில் இதே திமுக கூட்டணியில் முட்டிமோதி 41 இடங்களை பெற்றது காங்கிரஸ். ஆனால், அதில் வெறும் 8 தொகுதிகளில் மட்டுமே அந்த கட்சி வெற்றி பெற்றது. திமுக ஆட்சிக் கட்டிலில் அமராமல் போனதற்கு காங்கிரஸ் கட்சியின் தோல்வியும் முக்கிய காரணம் என அப்போது பேசப்பட்டது. குறிப்பாக, காங்கிரஸ் பெற்ற தொகுதிகளின் எண்ணிக்கையில் பாதியை திமுகவிற்கு விட்டுக்கொடுத்திருந்தாலும் 2016 தேர்தலில் திமுக ஆட்சியை பிடித்திருக்கும் என்பதும் அப்போது பரபரப்பாக பேசப்பட்டது. குறிப்பாக, காங்கிரஸ் கோஷ்டி தலைவர்களின் ஈகோ காரணமாக அவர்களுடைய ஆட்களுக்கு சீட் பெறுவதில் காட்டிய தீவிரத்தை தேர்தல் களத்தில் அவர்கள் காட்டாததுதான் காங்கிரஸ் கட்சியின் வீழ்ச்சிக்கு காரணம் என்றும் சொல்லப்பட்டது.
அதன்பின்னர் 2021 தேர்தலில் திமுக கொடுக்கும் தொகுதிகளை பெறும் மனநிலையிலேயே காங்கிரஸ் இருந்தது. குறிப்பாக, காங்கிரஸ் தலைவர்களே திமுகவிடம் பெறும் தொகுதிகளில் மன நிறைவு அடையவேண்டும் என பேசினர். இந்நிலையில், அந்த தேர்தலில் 25 தொகுதிகளை திமுகவிடமிருந்து பெற்று, அதில் 18 தொகுதிகளில் காங்கிரஸ் அமோக வெற்றி பெற்றது. இதனை காங்கிரஸ் கட்சியே எதிர்பார்க்கவில்லை.
அதிக தொகுதிகளை எதிர்பார்க்கும் காங்கிரஸ்
அப்படியான நிலையில், இந்த தேர்தலில் கடந்த தேர்தலை காட்டிலும் கூடுதல் தொகுதிகளை பெற்று தேர்தலில் போட்டியிட வேண்டும் என்ற எண்ணம் காங்கிரஸ் கட்சி நிர்வாகிகளிடம் இருக்கிறது. அதனடிப்படையிலேயே அவர்கள் கட்சி கூட்டத்திலும் பொதுவெளியிலும் கருத்துகளை வெளிப்படுத்தி வருகின்றனர்.
இந்நிலையில், நாடாளுமன்ற தொகுதிக்கு ஒரு சட்டமன்ற தொகுதி என்ற கணக்கில் காங்கிரஸ் போட்டிட நினைக்கும், தங்களுக்கு பலம் என எண்ணும் 39 தொகுதிகளின் பட்டியலை தமிழ்நாடு காங்கிரஸ் கமிட்டித் தயாரித்து, அதனை தேசிய தலைமைக்கு அனுப்பியிருக்கிறது. அந்த பட்டியலை திமுக தலைமையிடம் சமர்பிக்க தேசிய தலைமையும் சம்மதம் தெரிவித்திருக்கிறது.
முதல்வரை சந்திக்க நேரம் கேட்ட காங்கிரஸ்
இதனடிப்படையில், முதல்வரும் திமுக தலைவருமான மு.க.ஸ்டாலினை சந்திக்க காங்கிரஸ் தலைமை நேரம் கேட்டுள்ளதாக சத்தியமூர்த்திபவன் வட்டாரங்கள் தெரிவிக்கின்றன. அதற்காக, காங்கிரஸ் தேசிய பொதுச்செயலாளர் கே.சி.வேணுகோபால் தமிழ்நாடு வர திட்டமிடப்பட்டிருந்தது. ஆனால், திமுக தரப்பில் இருந்து உறுதியான முடிவு வராததால் கே.சி.வேணுகோபால் தமிழ்நாடு வருகையும் தள்ளிப்போயிருக்கிறது.
ஏற்கனவே, தமிழ்நாடு காங்கிரஸ் பொறுப்பாளர் கிரிஷ் ஜோடங்கர் தலைமையிலான தொகுதி பங்கீட்டு குழுவினர் முதல்வர் மு.க.ஸ்டாலினை சந்தித்து பேசியபோது, திமுக தரப்பில் தொகுதி பங்கீட்டு குழு அமைக்கப்பட்ட பின்னர், தொகுதிகள் குறித்து பேசிக்கொள்ளலாம் என முதல்வர் தெரிவித்திருந்தார். இதுவரை திமுகவில் தொகுதி பங்கீட்டு குழு அமைக்கப்படாத நிலையில், அந்த குழு அமைக்கப்பட்ட பிறகே காங்கிரஸ் கட்சியினர் நேரம் கொடுக்கப்படும் என அறிவாலய வட்டாரங்கள் தெரிவித்துள்ளன.
காங்கிரஸ் கட்சிக்கு கூடுதல் தொகுதிகள் தர வேண்டாம் - போர்கொடி தூக்கும் திமுக தலைகள்
இந்த முறை 2வது முறையாக ஆட்சியை தக்க வைத்து வரலாற்று சாதனை படைக்க வேண்டும் என்று திமுக கடுமையாக முயற்சித்து வரும் நிலையில், காங்கிரஸ் கட்சிக்கு அதிக சீட் கொடுப்பது திமுகவிற்கே ஆபத்தாக முடியும் என சில திமுக மூத்த தலைவர்கள் முதல்வர் ஸ்டாலினிடம் தெரிவித்திருப்பதாக பரபரப்பு தகவல்கள் வெளியாகியிருக்கின்றன. ஏற்கனவே, காங்கிரஸ் கட்சியில், சில தலைவர்கள் திமுகவிற்கு எதிரான கருத்துகளை தெரிவித்து வரும் நிலையில், அவர்களுக்கு கூடுதல் சீட் கொடுப்பது என்பது தேர்தல் களத்தில் தேவையற்ற சிக்கல்களை உருவாக்கும் என்றும் கூறப்பட்டுள்ளதாக தெரிகிறது. எனவே, காங்கிரஸ் கட்சிக்கு அதே 25 தொகுதிகளை மட்டுமே இந்த முறை ஒதுக்க வேண்டும் என்றும் கூடுதல் தொகுதிகளை தர வேண்டாம் எனவும் திமுக மூத்த தலைவர்கள் முதல்வர் ஸ்டாலினிடம் தெரிவித்துள்ளதாகவும், ஆனால், சிலரோ 30 சீட் வரை கொடுக்கலாம் என்று கூறியிருப்பதாகவும் அறிவாலய வட்டாரங்கள் தெரிவிக்கின்றன
Before You Go
SFI vs Police : அனுமதி இன்றி நுழைந்த SFI “REMAND பண்ணிடுவேன்” மாணவர்கள் VS போலீஸ்
தலைப்பு செய்திகள்
ட்ரெண்டிங் செய்திகள்
