மு.க.ஸ்டாலின் பக்கம் சாயும் அன்புமணி? 2026 தேர்தலுக்கு இப்பவே அச்சாரம் போட்ட பா.ம.க.!

வன்னியர்களுக்கு 15 சதவீத இட ஒதுக்கீடு தந்தால் தி.மு.க.விற்கு நிபந்தனையற்ற ஆதரவு என்ற அன்புமணியின் பேச்சு தமிழக அரசியல் களத்தில் பெரும் தாக்கத்தை ஏற்படுத்தியுள்ளது.

மு.க.ஸ்டாலின் - அன்புமணி

Source : twitter

தமிழக அரசியல் களம் 2026ம் ஆண்டு சட்டமன்ற தேர்தலை நோக்கி நகரத் தொடங்கியுள்ளது. விஜய் அரசியல் கட்சி தொடங்கியது முதலே இந்த அரசியல் களம் மிகவும் சூடுபிடிக்கத்  தொடங்கியுள்ளது.

சூடுபிடிக்கும் தமிழக அரசியல் களம்:

தமிழக வெற்றிக் கழகத்தைத் தொடங்கிய விஜய் தனது முதல் வியூகமாக தி.மு.க. கூட்டணியை உடைப்பதை கையில் எடுத்துள்ளார். 2026ம் ஆண்டு சட்டமன்ற தேர்தலில் தமிழக வெற்றிக் கழகத்தின் பக்கம் விடுதலைச் சிறுத்தைகள் கட்சி இருக்க வேண்டும் என்று விரும்புகிறார். ஆட்சி அதிகாரத்தில் பங்கு என்ற அறிவிப்பு, அம்பேத்கர் புத்தக வெளியீட்டு விழாவில் திருமாவளவன் பற்றிய பேச்சு என்று விஜய் கூறியதே அதற்கு சான்றாகும். 

கடந்த சில ஆண்டுகளில் தமிழ்நாட்டின் மிகப்பெரிய கட்சியாக விசிக வளர்ந்துள்ளது. 25 தொகுதிகளை வரும் சட்டமன்ற தேர்தலில் தி.மு.க.விடம் கேட்போம் என்ற வன்னியரசின் பேட்டியும் வரும் சட்டமன்ற தேர்தலில் தி.மு.க. பக்கம் விசிக இருப்பதை கேள்விக்குறியாக்கியுள்ளது. ஏனென்றால், பிரம்மாண்ட கூட்டணி அமைத்துள்ள தி.மு.க. விசிகவிற்கு 25 தொகுதிகள் தருவது என்பது சாத்தியமற்றது. 

வாக்கு வங்கி:

தி.மு.க. கூட்டணியில் இருந்து விசிகி விலகினால் அந்த இடத்தை நிரப்பும் வகையில் மற்றொரு வலுவான கட்சியை தங்கள் பக்கம் இழுக்க தி.மு.க. திட்டம் வகுக்கும். தமிழ்நாட்டில் தி.மு.க., அ.தி.மு.க.விற்கு நிகரான மிகப்பெரிய கட்சியாக இருப்பது பா.ம.க. ஆகும். குறிப்பாக, வட தமிழகத்தில் மிகப்பெரிய வாக்கு வங்கியை வைத்துள்ள பா.ம.க. ஒவ்வொரு தேர்தலிலும் தாக்கத்தை ஏற்படுத்தி வருகின்றனர். 

ஆனால், கருணாநிதி தலைமையிலான தி.மு.க. ஆட்சியில் அங்கம் வகித்த பிறகு அடுத்த ஜெயலலிதா ஆட்சி முதல் தற்போதைய மு.க.ஸ்டாலின் ஆட்சி வரை கடந்த 13 ஆண்டுகளுக்கும் மேலாக எந்தவொரு அதிகாரத்திலும் இல்லாமல் பா.ம.க. உள்ளது.

தி.மு.க. கூட்டணியில் பா.ம.க.வா?

இந்த சூழலில், வரும் சட்டமன்ற தேர்தலில் விசிக தி.மு.க. கூட்டணியில் இருந்து விலகினால், பா.ம.க. தி.மு.க. பக்கம் சாயும் என்று எதிர்பார்க்கப்படுகிறது. காஞ்சிபுரத்தில் நேற்று நடைபெற்ற பாமக போராட்டத்தில் வன்னியர்களுக்கு 15 சதவீத இட ஒதுக்கீடு தந்தால் தி.மு.க.விற்கு நிபந்தனையற்ற ஆதரவு தர பா.ம.க. தயார் என்று அன்புமணி ராமதாஸ் பேசியுள்ளார். அவரது பேச்சு அரசியல் வட்டாரத்தில் பெரும் பரபரப்பை ஏற்படுத்தியுள்ளது. 

கடந்த 10 ஆண்டுகளுக்கும் மேலாக ஆளுங்கட்சி மத்தியிலும், மாநிலத்திலும் கூட்டணியில் இல்லாத பா.ம.க. தொண்டர்களும், நிர்வாகிகளும் சோர்வடைந்துள்ளதாக கூறப்படுகிறது. இந்த நிலையில்,  2026 சட்டமன்ற தேர்தலில் கடும் சவால் அளிக்கும் விதமாக தி.மு.க. பக்கம் பா.ம.க. சாயும் என்று கருதப்படுகிறது. 

விஜய்யின் தமிழக வெற்றிக் கழகத்தின் பக்கம் விடுதலைச் சிறுத்தைகள் கட்சி சாய்ந்தால் தி.மு.க.வுடன் பா.ம.க. மிக எளிதாக கைகோர்க்கும் என்று அரசியல் நிபுணர்கள் கருதுகின்றனர். இதற்கான அச்சாரமே அன்புமணி நேற்று திமுகவிற்கு நிபந்தனையற்ற ஆதரவு தர தயார் என்று கூறியதாக கருதப்படுகிறது.