(Source: ECI | ABP NEWS)
மயிலாடுதுறை ரயில் நிலையத்தில் பறந்த பிரம்மாண்ட தேசியக்கொடி: நிறைவேறிய பயணிகளின் நீண்ட நாள் கோரிக்கை..!
மயிலாடுதுறை ரயில் நிலையத்தில் பிரம்மாண்ட தேசியக்கொடி பறக்க விடவேண்டும் என் ரயில் பயணிகளின் நீண்ட நாள் கோரிக்கை தற்போது நிறைவேற்றப்பட்டுள்ளது.
நாகப்பட்டினம் மாவட்டத்தில் இருந்து பிரிந்து மயிலாடுதுறை தனி மாவட்டமாக உருவானதிலிருந்து, மயிலாடுதுறை ரயில் நிலையத்தில் தேசியக்கொடி பறக்கவிடப்பட வேண்டும் என்ற ரயில் பயணிகளின் நீண்டகாலக் கோரிக்கை தற்போது நிறைவேறியுள்ளது. அமிர்த் பாரத் திட்டத்தின் கீழ் ரயில் நிலையத்தில் நடைபெற்ற விரிவாக்கப் பணிகளின் ஒரு பகுதியாக, பிரம்மாண்ட தேசியக்கொடிக் கம்பம் அமைக்கப்பட்டு, முதல்முறையாக மூவண்ணக் கொடி கம்பீரமாகப் பறக்கவிடப்பட்டுள்ளது. இந்த நிகழ்வு ரயில் பயணிகளிடையே பெரும் மகிழ்ச்சியை ஏற்படுத்தியுள்ளது.
பிரிந்த மாவட்டத்தின் புதிய அடையாளம்
நாகப்பட்டினம் மாவட்டத்திலிருந்து மயிலாடுதுறை தமிழகத்தின் 38-வது மாவட்டமாகப் பிரிக்கப்பட்டு ஏறத்தாழ நான்கு ஆண்டுகள் நிறைவடைந்துவிட்டன. புதிய மாவட்டமாக உருவெடுத்ததிலிருந்தே, மயிலாடுதுறை ரயில் நிலையத்திற்கு ஒரு தனித்துவமான அடையாளம் தேவை என்ற எதிர்பார்ப்பு மக்களிடையே இருந்து வந்தது. இதன் ஒரு பகுதியாக, ரயில் பயணிகள் சங்கத்தினர் கடந்த இரண்டு ஆண்டுகளாக ரயில் நிலையத்தின் நுழைவாயிலில் தேசியக்கொடி கம்பம் அமைக்க வேண்டும் எனத் தொடர்ந்து கோரிக்கை விடுத்து வந்தனர்.
தேசப் பெருமையைப் பறைசாற்றும் தேசியக்கொடி
மயிலாடுதுறை ரயில் நிலையம் ஒரு முக்கிய சந்திப்பு நிலையம் என்பதால், தினமும் ஆயிரக்கணக்கான பயணிகள் இங்கிருந்து பல்வேறு பகுதிகளுக்குப் பயணிக்கின்றனர். இத்தகைய ஒரு பொது இடத்தில், தேசப் பெருமையைப் பறைசாற்றும் வகையில் தேசியக்கொடி பறக்கவிடப்படுவது அவசியம் என ரயில் பயணிகள் சங்கத்தினர் வலியுறுத்தி வந்தனர். இந்தக் கோரிக்கை, ரயில்வே அதிகாரிகள் மற்றும் மாவட்ட நிர்வாகத்தின் கவனத்திற்கு மீண்டும் மீண்டும் கொண்டு செல்லப்பட்டது.
அமிர்த் பாரத் திட்டம்
ரயில் நிலைய நவீனமயமாக்கல் மற்றும் மேம்பாட்டுக்கான "அமிர்த் பாரத்" திட்டத்தின் ஒரு பகுதியாக, மயிலாடுதுறை ரயில் நிலையத்தில் பல்வேறு விரிவாக்கப் பணிகள் நடைபெற்று வருகின்றன. இந்தப் பணிகளின் ஒரு முக்கிய அம்சமாக, தேசியக்கொடிக் கம்பம் அமைக்கப்படும் என ரயில்வே நிர்வாகம் அறிவித்தது. அதன்படி, ரயில் நிலையத்தின் நுழைவாயில் அருகே கம்பீரமான தேசியக்கொடிக் கம்பம் அமைக்கப்பட்டு, முதல்முறையாக தேசியக்கொடி ஏற்றப்பட்டுள்ளது. மயிலாடுதுறை மாவட்டமாகப் பிரிக்கப்பட்ட பிறகு, ரயில் நிலையத்தில் முதல்முறையாக தேசியக்கொடி ஏற்றப்பட்ட இந்த நிகழ்வு வரலாற்று முக்கியத்துவம் வாய்ந்ததாகக் கருதப்படுகிறது. புதிய மாவட்டத்தின் பெருமைகளையும், தேசிய ஒருமைப்பாட்டையும் இது பறைசாற்றுகிறது. ரயில் நிலையத்தின் கம்பீரமான தோற்றத்திற்கு மேலும் மெருகூட்டுவதாகவும் இந்த நிகழ்வு அமைந்துள்ளதாக பொதுமக்கள் தெரிவித்துள்ளனர்.
சுதந்திர தின விழாவிற்கு கோரிக்கை
மயிலாடுதுறை ரயில் நிலையத்தில் தேசியக்கொடி பறக்கவிடப்பட்டதையடுத்து, ரயில் பயணிகள் சங்கத்தினர் மிகுந்த மகிழ்ச்சி அடைந்துள்ளனர். இந்தச் சந்தர்ப்பத்தில், வரவிருக்கும் ஆகஸ்ட் 15 சுதந்திர தினத்தன்று, ரயில் நிலையத்தில் ஒரு சிறப்பான சுதந்திர தின விழா நடத்த வேண்டும் எனவும் அவர்கள் அதிகாரிகளிடம் கோரிக்கை விடுத்துள்ளனர். "தேசியக்கொடி ஏற்றுவது என்பது ஒரு தேசத்தின் பெருமை. இந்த நிகழ்வு மயிலாடுதுறை ரயில் நிலையத்திற்கு ஒரு புதிய அடையாளத்தை வழங்கியுள்ளது. வரவிருக்கும் சுதந்திர தின விழாவை இங்கு சிறப்பாக நடத்துவதன் மூலம், பொதுமக்கள் மற்றும் மாணவர்களுக்கு தேசபக்தியை வளர்க்க முடியும்," என ரயில் பயணிகள் சங்கத்தினர் மகிழ்ச்சியையும், கோரிக்கையையும் வெளிப்படுத்தினார்.
ரயில்வே அதிகாரிகள் இந்தக் கோரிக்கையை ஏற்று, சுதந்திர தின விழாவுக்கான ஏற்பாடுகளைத் தொடங்குவார்கள் என எதிர்பார்க்கப்படுகிறது. மேலும், தேசியக்கொடி கம்பம் அமைக்கப்பட்டிருப்பது போலவே, ரயில் நிலையத்தில் மற்ற அடிப்படை வசதிகளையும் மேம்படுத்த வேண்டும் எனப் பயணிகள் கோரிக்கை விடுத்துள்ளனர். இந்தத் தேசியக்கொடி, மயிலாடுதுறையில் ரயில் நிலையத்திற்கு ஒரு புதிய உயிர்ப்பையும், தேசபக்தியையும் கொண்டு வந்துள்ளது
தலைப்பு செய்திகள்
ட்ரெண்டிங் செய்திகள்
