போலீஸ் என்றால் இப்படித்தான் இருக்கணும்...காவலர்களுக்கு மயிலாடுதுறை எஸ்பி வழங்கிய அறிவுரைகள்..!
மயிலாடுதுறையில் விறுவிறுப்பாக நடந்த கூட்டுத்திரள் கவாத்து பயிற்சி நிறைவு நிகழ்வில் காவல் கண்காணிப்பாளர் ஸ்டாலின் காவலர்களுக்கு பல்வேறு அறிவுரைகளை வழங்கியுள்ளார்.
மயிலாடுதுறை: மயிலாடுதுறையில் விறுவிறுப்பாக நடந்த கூட்டுத்திரள் கவாத்து பயிற்சி நிறைவு நிகழ்வில் காவல் கண்காணிப்பாளர் ஸ்டாலின் காவலர்களுக்கு பல்வேறு அறிவுரைகளை வழங்கியுள்ளார்.
காவல்துறையின் மிக முக்கிய அங்கமாக விளங்கும் ஒழுக்கம், கட்டுப்பாடு மற்றும் துரித செயல்பாட்டை பறைசாற்றும் வகையில், மயிலாடுதுறை மாவட்ட ஆயுதப்படை மைதானத்தில் கடந்த சில வாரங்களாக நடைபெற்று வந்த காவலர்களுக்கான வருடாந்திர கூட்டுத்திரள் கவாத்து பயிற்சி (Mob Parade) மிகச் சிறப்பான முறையில் நிறைவடைந்தது.
பயிற்சியின் பின்னணி மற்றும் நோக்கம்
தமிழ்நாடு காவல்துறையில் பணியாற்றும் ஆயுதப்படை காவலர்களுக்கு ஆண்டுக்கு ஒருமுறை இத்தகைய சிறப்பு கூட்டுத்திரள் கவாத்து பயிற்சி வழங்கப்படுவது வழக்கம். அந்த வகையில், மயிலாடுதுறை மாவட்ட காவல் கண்காணிப்பாளர் G.ஸ்டாலினின் நேரடி உத்தரவின் பேரில், மாவட்ட ஆயுதப்படை பிரிவில் பணிபுரியும் காவலர்களுக்காக இந்தப் பயிற்சி முகாம் ஏற்பாடு செய்யப்பட்டிருந்தது.
கடந்த ஜனவரி 19, 2026 அன்று தொடங்கிய இந்தப் பயிற்சி முகாம், சுமார் 20 நாட்களாகத் தொடர்ந்து நடைபெற்று சிறப்பாக நிறைவுற்றது.
பயிற்சியில் வழங்கப்பட்ட முக்கிய அம்சங்கள்
இந்த 20 நாள் பயிற்சியில் காவலர்களுக்குப் பல்வேறு கட்டங்களாகப் பயிற்சிகள் அளிக்கப்பட்டன.
*கவாத்து நினைவூட்டல்: காவலர்களின் நடை மற்றும் அணிவகுப்பு முறைகளை மெருகேற்றும் பயிற்சிகள்.
*படைக்கலன்கள் வகுப்பு: காவல்துறையினர் பயன்படுத்தும் நவீன ஆயுதங்கள் மற்றும் உபகரணங்களைக் கையாளும் முறைகள் குறித்த தொழில்நுட்ப வகுப்புகள்.
*கலவரக் கட்டுப்பாடு: அவசர காலங்களில் பொதுமக்களுக்குப் பாதிப்பு ஏற்படாமல் கூட்டத்தைக் கட்டுப்படுத்துவது மற்றும் கலவரங்களை ஒடுக்குவது குறித்த நேரடி செயல்முறை பயிற்சிகள்.
ஒவ்வொரு நாளும் பயிற்சியினை மேற்பார்வையிட மயிலாடுதுறை மாவட்டத்தைச் சேர்ந்த ஒரு துணைக்காவல் கண்காணிப்பாளர் (DSP) நேரில் கலந்து கொண்டு காவலர்களை ஊக்கப்படுத்தினர்.
கம்பீரமான அணிவகுப்பு மரியாதையை ஏற்ற கண்காணிப்பாளர்
நிறைவு விழாவிற்கு மாவட்ட காவல் கண்காணிப்பாளர் தலைமை தாங்கினார். மைதானத்தில் திரண்டிருந்த காவலர்களின் கம்பீரமான அணிவகுப்பு மரியாதையை அவர் ஏற்றுக்கொண்டார். அதனைத் தொடர்ந்து, காவலர்கள் பயன்படுத்தும் படைக்கலன்கள், சீருடை மற்றும் பிற உபகரணங்களை அவர் தனித்தனியாக ஆய்வு செய்து, அவற்றின் பராமரிப்பு குறித்துக் கேட்டறிந்தார்.
காவலர்களுக்கு எஸ்பி வழங்கிய அதிரடி அறிவுரைகள்
நிகழ்வின் இறுதியில், காவலர்கள் மத்தியில் உரையாற்றிய மாவட்ட காவல் கண்காணிப்பாளர், பணியின் போது கடைபிடிக்க வேண்டிய மிக முக்கியமான 7 கட்டளைகளை வழங்கினார்.
* ஒழுக்கம் மற்றும் கடமை: பணியில் எப்போதும் மிக உயர்ந்த ஒழுக்கத்தையும், கடமை தவறாத மனப்பான்மையையும் கொண்டிருக்க வேண்டும்.
*மிடுக்கான சீருடை: குறிப்பிட்ட நேரத்தில் பணிக்கு வரும்போது, சீருடையை மிகச் சுத்தமாகவும், மிடுக்காகவும் அணிந்து வர வேண்டும்.
* பாதுகாப்பு எச்சரிக்கை: முக்கியப் பிரமுகர்கள் அல்லது கைதிகளுக்கு வழிக்காவல் (Escort) செல்லும்போது மிகுந்த விழிப்புணர்வுடன் இருக்க வேண்டும்.
* ஆயுதக் கையாளுகை: பணியில் ஆயுதங்களைப் பயன்படுத்தும் காவலர்கள், அவற்றைப் பாதுகாப்பான முறையில் கையாள வேண்டும்.
*வாகனப் பராமரிப்பு: காவல் வாகனங்களை ஓட்டும் காவலர்கள் சாலை விதிகளை மதிப்பதோடு, வாகனங்களை எப்போதும் தூய்மையாக வைத்திருக்க வேண்டும்.
* விழிப்புடன் இருத்தல்: பாதுகாப்புப் பணிகளில் ஈடுபடும்போது சிறு கவனச்சிதறலும் இன்றி விழிப்புடன் செயல்பட வேண்டும்.
* அதிகாரிகளின் உத்தரவு: உயர் அதிகாரிகள் வழங்கும் கட்டளைகளைத் துல்லியமாக நிறைவேற்ற வேண்டும் என அறிவுத்தினார்.
இந்நிகழ்வின் போது மயிலாடுதுறை மாவட்ட ஆயுதப்படை துணைக்காவல் கண்காணிப்பாளர் செந்தில்குமார் உடனிருந்தார். இந்தப் பயிற்சியின் மூலம் மயிலாடுதுறை மாவட்ட ஆயுதப்படை காவலர்கள் புதிய உத்வேகத்துடன் தங்கள் பணியைத் தொடரத் தயாராகியுள்ளனர்.
Before You Go
CM Vijay : சிங்கப்பூராக மாறும் பெரம்பூர்!1000 கோடியில் மெகா திட்டம்..கீரின் சிக்னல் கொடுத்த CM விஜய்
தலைப்பு செய்திகள்
ட்ரெண்டிங் செய்திகள்
