ஒரு நெல்மணி கூட வீணாகக் கூடாது" என்பதே அரசின் முதன்மை நோக்கம் - அண்ணாதுரை..!

மயிலாடுதுறை மாவட்டத்தில் நேரடி நெல் கொள்முதல் மற்றும் மூட்டைகள் நகர்வு பணிகள் குறித்து தமிழ்நாடு நுகர்பொருள் வாணிபக் கழக நிர்வாக இயக்குநர் ஆ.அண்ணாதுரை நேரில் ஆய்வு செய்தார்.

நெல் நேரடி கொள்முதல் நிலைய ஆய்வு

Source : ABP

மயிலாடுதுறை: தமிழகத்தில் நடப்பு சம்பா பருவ நெல் அறுவடை தீவிரமடைந்துள்ள நிலையில், மயிலாடுதுறை மாவட்டத்தில் நடைபெற்று வரும் நேரடி நெல் கொள்முதல் பணிகள் மற்றும் நெல் மூட்டைகளை கிட்டங்கிகளுக்கு நகர்த்தும் பணிகள் குறித்து உயர்மட்ட ஆய்வுக் கூட்டம் நடைபெற்றது.

மயிலாடுதுறை மாவட்ட ஆட்சியர் அலுவலக கூட்டரங்கில் நடைபெற்ற இந்த ஆய்வுக் கூட்டத்திற்கு, தமிழ்நாடு நுகர்பொருள் வாணிபக் கழக நிர்வாக இயக்குநர் அண்ணாதுரை தலைமை தாங்கினார். மாவட்ட ஆட்சியர் ஹெச். எஸ். ஸ்ரீகாந்த் முன்னிலை வகித்தார்.

சாதனை அளவிலான கொள்முதல் விவரங்கள்

கூட்டத்தில் பேசிய நிர்வாக இயக்குநர் அண்ணாதுரை, நடப்பு 2025-2026 கொள்முதல் பருவத்தில் தமிழக அரசு மேற்கொண்டுள்ள சிறப்பு ஏற்பாடுகளைப் பட்டியலிட்டார்.

அவர் கூறியதாவது:

“தமிழக முதலமைச்சரின் தொலைநோக்குப் பார்வையால், பருவமழைக்கு முன்பாகவே விவசாயிகள் புதிய விலையில் நெல்லை விற்பனை செய்ய ஏதுவாக, கடந்த செப்டம்பர் 1-ம் தேதியே கொள்முதல் பணிகள் தொடங்கப்பட்டன.

மார்ச் 10, 2026 வரை மாநிலம் முழுவதும் 3,496 நேரடி நெல் கொள்முதல் நிலையங்கள் திறக்கப்பட்டு, இதுவரை 34.50 லட்சம் மெட்ரிக் டன் நெல் கொள்முதல் செய்யப்பட்டுள்ளது. இது கடந்த ஆண்டு இதே காலகட்டத்துடன் (23.56 லட்சம் மெ.டன்) ஒப்பிடுகையில் 11 இலட்சம் மெட்ரிக் டன் அதிகமாகும்.”

மயிலாடுதுறை மாவட்ட நிலவரம்

மயிலாடுதுறை மாவட்டத்தில் நடப்பு சம்பா மற்றும் தாளடி பருவத்தில் மொத்தம் 1,30,960 ஹெக்டேர் பரப்பளவில் நெல் பயிரிடப்பட்டுள்ளது. இதில் 81 சதவீதப் பணிகள் (1,06,047 ஹெக்டேர்) நிறைவடைந்துள்ளன. மாவட்டத்தில் இதுவரை 1.46 லட்சம் மெட்ரிக் டன் நெல் கொள்முதல் செய்யப்பட்டுள்ள நிலையில், எஞ்சியுள்ள அறுவடைப் பகுதிகளில் இருந்து கூடுதலாக 1.06 லட்சம் மெட்ரிக் டன் நெல் கொள்முதல் செய்யப்படும் என எதிர்பார்க்கப்படுகிறது.

தினசரி கொள்முதல் அளவை அதிகரிக்கவும், விவசாயிகளின் காத்திருப்பு நேரத்தைக் குறைக்கவும் பல்வேறு அதிரடி நடவடிக்கைகள் எடுக்கப்பட்டுள்ளன.

* நேரம் அதிகரிப்பு: கொள்முதல் நிலையங்கள் செயல்படும் நேரம் இரவு 8.00 மணி வரை நீட்டிக்கப்பட்டுள்ளது.

* அளவு உயர்வு: ஒரு ஏக்கருக்கு 70 மூட்டைகள் வரை கொள்முதல் செய்ய அனுமதிக்கப்படுகிறது.

* கூடுதல் இயந்திரங்கள்: 9 மாவட்டங்களில் உள்ள 110 நிலையங்களில் கூடுதல் இயந்திரங்கள் மூலம் தினசரி 1000 மூட்டைகளுக்கும் மேல் கொள்முதல் செய்யப்படுகிறது.

பாதுகாப்பான சேமிப்பு மற்றும் துரித நகர்வு

நெல் மூட்டைகள் மழையில் நனைந்து வீணாகாமல் இருக்க, தமிழக அரசு எடுத்துள்ள முன்னெச்சரிக்கை நடவடிக்கைகள் குறித்து இயக்குநர் விளக்கினார். 2022 முதல் 2026 ஜனவரி வரை, 18 மாவட்டங்களில் ரூ. 825.79 கோடி மதிப்பீட்டில் 383 நவீன நெல் சேமிப்பு தளங்கள் கட்ட திட்டமிடப்பட்டது. இதில் ரூ. 331.08 கோடி மதிப்பில் கட்டி முடிக்கப்பட்ட 253 தளங்கள் ஏற்கனவே முதலமைச்சரால் திறந்து வைக்கப்பட்டுள்ளன.

தற்போது கொள்முதல் செய்யப்பட்ட 34.50 லட்சம் மெட்ரிக் டன்களில், 29.30 லட்சம் மெட்ரிக் டன்கள் ஏற்கனவே கிட்டங்கிகளுக்கு நகர்த்தப்பட்டுவிட்டன. மயிலாடுதுறை மாவட்டத்தில் மட்டும் தினசரி 300 லாரிகள் மூலம் 3000 மெட்ரிக் டன் நெல் நகர்வு செய்யப்பட்டு வருகிறது.

இருப்பு விபரங்கள்:

* டெல்டா மாவட்டங்களில் 1.42 கோடி சாக்குகள், 303 மெட்ரிக் டன் சணல் மற்றும் 27,610 தார்ப்பாய்கள் தயாராக உள்ளன.

* மாநில அளவில் 3.03 கோடி சாக்குகள் இருப்பில் வைக்கப்பட்டுள்ளன.

நேரடி கள ஆய்வு

ஆய்வுக் கூட்டத்திற்கு முன்னதாக, நிர்வாக இயக்குநர் ஆ. அண்ணாதுரை திருவிளையாட்டம், மன்னம்பந்தல், பெருஞ்சேரி ஆகிய கிராமங்களில் உள்ள நேரடி நெல் கொள்முதல் நிலையங்களுக்கும், திறந்தவெளி சேமிப்பு மையங்களுக்கும் நேரில் சென்று ஆய்வு செய்தார். அங்குள்ள ஈரப்பதம் காட்டும் கருவிகள், விவசாயிகளின் பதிவேடுகள் மற்றும் மூட்டைகளை நகர்த்தும் லாரிகளின் வருகை குறித்து கேட்டறிந்தார்.

விவசாயிகளுக்கு வழங்கப்பட்ட தொகை

தமிழகம் முழுவதும் இதுவரை 4,02,971 விவசாயிகளிடம் இருந்து நெல் கொள்முதல் செய்யப்பட்டு, அவர்களது வங்கி கணக்குகளில் ரூ. 8,716 கோடி தொகை நேரடியாகச் செலுத்தப்பட்டுள்ளது. "ஒரு நெல்மணி கூட வீணாகக் கூடாது" என்பதே அரசின் முதன்மை நோக்கம் என்று அவர் வலியுறுத்தினார்.

இக்கூட்டத்தில் நுகர்பொருள் வாணிபக் கழக முதுநிலை மண்டல மேலாளர் கா. நளினா, வேளாண்மை துறை இணை இயக்குநர் விஜயராகவன், வட்டார போக்குவரத்து அலுவலர் கதிர்வேல் மற்றும் பல்வேறு துறை அதிகாரிகள் கலந்து கொண்டனர்.