உயிருக்குப் போராடிய பெண்... சாப்பிடச் சென்ற மருத்துவர்? சீர்காழியில் பரிதாபம்!

108 ஆம்புலன்ஸ் தாமதம் மற்றும் மருத்துவர் அலட்சியத்தால் பாம்பு கடித்து சிகிச்சை பெற வந்த பெண்மணி பரிதாபமாக உயிரிழந்த சம்பவம் அதிர்ச்சியை ஏற்படுத்தியுள்ளது. 

பாம்பு கடித்ததில் உயிரிழந்த பெண்மணி

Source : Abp

சீர்காழி: மயிலாடுதுறை மாவட்டம் சீர்காழி அருகே பாம்பு கடித்து மருத்துவமனைக்கு வந்த பெண் சிகிச்சை பலனின்றி உயிரிழந்த சம்பவமும், அதனைத் தொடர்ந்து ஏற்பட்ட 108 ஆம்புலன்ஸ் காலதாமதம் மற்றும் மருத்துவரின் அலட்சியப் போக்கைக் கண்டித்து பொதுமக்கள் ஆரம்ப சுகாதார நிலையத்தை முற்றுகையிட்டு போராட்டத்தில் ஈடுபட்ட சம்பவமும் அப்பகுதியில் பெரும் பரபரப்பையும் சோகத்தையும் ஏற்படுத்தியுள்ளது.

வீட்டு வேலையின் போது நேர்ந்த சோகம்

மயிலாடுதுறை மாவட்டம் சீர்காழி வட்டாரத்திற்குட்பட்ட எடமணல் கிராமத்தைச் சேர்ந்தவர் வைத்தியநாதன். இவரது மனைவி அம்சவல்லி (வயது 48). கூலித் தொழிலாளியான இவர், தினசரி வேலைகளுக்குச் சென்று தன் குடும்பத்தைக் காப்பாற்றி வந்தார். வழக்கம்போல் தனது வீட்டில் சுத்தம் செய்யும் பணியிலும் வீட்டு வேலைகளிலும் அம்சவல்லி ஈடுபட்டுக் கொண்டிருந்தபோது, எதிர்பாராத விதமாக அங்கு மறைந்திருந்த விஷப்பாம்பு ஒன்று அவரைப் பலமாகக் கடித்தது. பாம்பு கடித்த உடனேயே கடும் வலியால் துடித்த அம்சவல்லி, அலறி அடித்துக் கொண்டு அக்கம் பக்கத்தினரின் உதவியை நாடினார்.

ஆரம்ப சுகாதார நிலையத்தில் கதறல்

விஷக்கடிக்கு ஆளான அம்சவல்லியை உடனடியாக மீட்ட உறவினர்களும் அப்பகுதி மக்களும், அருகிலேயே அமைந்துள்ள எடமணல் அரசு ஆரம்ப சுகாதார நிலையத்திற்குச் சிகிச்சைக்காக அழைத்துச் சென்றனர். பதற்றத்துடனும் கடுமையான வலியுடனும் மருத்துவமனைக்கு வந்த அம்சவல்லி, அங்கிருந்த மருத்துவப் பணியாளர்களிடம் தன்னை விஷப்பாம்பு கடித்துவிட்டதாகவும், உடனடியாக நஞ்சு முறிவு மருந்து செலுத்தி தன் உயிரைக் காப்பாற்றுமாறும் கண்ணீருடன் கதறியுள்ளார். அவரது நிலையைக் கண்ட மருத்துவமனையில் இருந்த அரசு மருத்துவர், அவரை முதற்கட்டப் பரிசோதனை செய்தார்.

காலதாமதமும் மருத்துவரின் அலட்சியமும்

அவசரச் சிகிச்சை அளிக்கப்பட வேண்டிய சூழலில், அரசு ஆரம்ப சுகாதார நிலையத்தில் சுமார் ஒரு மணி நேரத்திற்கும் மேலாக அம்சவல்லியை மருத்துவக் கண்காணிப்பிலேயே தங்க வைத்திருந்ததாகக் கூறப்படுகிறது. அவருக்குத் தேவையான அவசர நஞ்சு முறிவுச் சிகிச்சையை உடனடியாக முழுமையாக வழங்காமல் நேரம் கடத்தப்பட்டதாக உறவினர்கள் குற்றம் சாட்டுகின்றனர். இந்தச் சூழ்நிலையில், நோயாளி உயிருக்குப் போராடிக் கொண்டிருந்த தருணத்தில், அங்கிருந்த அரசு மருத்துவர் உணவருந்துவதற்காகச் சென்றுவிட்டதாகத் தெரிகிறது. உயிருக்குப் போராடும் நோயாளிக்குச் சிகிச்சை அளிக்க வேண்டிய முக்கிய நேரத்தில் மருத்துவர் அங்கிருந்து சென்றது நோயாளியின் உறவினர்களிடையே மிகுந்த அதிர்ச்சியையும் ஆத்திரத்தையும் ஏற்படுத்தியது.

108 ஆம்புலன்ஸ் தாமதம் மற்றும் எதிர்பாராத உயிரிழப்பு

மேல் சிகிச்சைக்காக அம்சவல்லியை மயிலாடுதுறை அல்லது சீர்காழி அரசு மருத்துவமனைக்குக் கொண்டு செல்ல வேண்டிய கட்டாயம் ஏற்பட்டது. இதற்காக உடனடியாக 108 ஆம்புலன்ஸுக்குத் தகவல் தெரிவிக்கப்பட்டது. இருப்பினும், நீண்ட நேரமாகியும் 108 ஆம்புலன்ஸ் எடமணல் ஆரம்ப சுகாதார நிலையத்திற்கு வந்து சேரவில்லை. கடும் போராட்டத்திற்குப் பிறகு, அங்கிருந்த உதவியாளரின் துணையோடு மிகவும் தாமதமாக வந்த 108 ஆம்புலன்ஸில் அம்சவல்லியை ஏற்றியுள்ளனர். ஆனால், துரதிர்ஷ்டவசமாக ஆம்புலன்ஸில் ஏறிய சில நிமிடங்களிலேயே, நஞ்சின் வீரியம் தாங்காமலும், உரிய நேரத்தில் சிகிச்சை கிடைக்காமலும் அம்சவல்லி பரிதாபமாக உயிரிழந்தார்.

பொதுமக்கள் முற்றுகை மற்றும் தீவிர பேச்சுவார்த்தை

சிகிச்சை அளிப்பதில் ஏற்பட்ட காலதாமதம், மருத்துவரின் அலட்சியம் மற்றும் 108 ஆம்புலன்ஸ் சரியான நேரத்திற்கு வராததே அம்சவல்லியின் இறப்பிற்கு முக்கியக் காரணம் எனக்கூறி ஆத்திரமடைந்த அப்பகுதி மக்களும் நோயாளியின் உறவினர்களும் எடமணல் அரசு ஆரம்ப சுகாதார நிலையத்தை திடீரென முற்றுகையிட்டனர். அலட்சியமாகச் செயல்பட்ட மருத்துவப் பணியாளர்கள் மீது நடவடிக்கை எடுக்கக் கோரி தீவிர வாக்குவாதத்தில் ஈடுபட்டதால் அங்குச் பதற்றமான சூழல் நிலவியது. சம்பவ இடத்திற்குச் சீர்காழி காவல் ஆய்வாளர் கமல்ராஜ் தலைமையிலான காவல்துறையினரும், வட்டார மருத்துவ அலுவலர்களும் விரைந்து வந்து முற்றுகையில் ஈடுபட்ட பொதுமக்களிடம் அமைதிப் பேச்சுவார்த்தை நடத்தினார்கள். உரிய நடவடிக்கை எடுக்கப்படும் என அதிகாரிகள் உறுதியளித்ததைத் தொடர்ந்து பொதுமக்கள் கலைந்து சென்றனர். இச்சம்பவம் எடமணல் மற்றும் அதனைச் சுற்றியுள்ள கிராமங்களில் பெரும் சோகத்தை ஏற்படுத்தியுள்ளது.