காசிக்கு இணையான திருவெண்காடு சுவேதாரண்யேசுவரர் கோயில்: ஆங்கில புத்தாண்டை முன்னிட்டு ஆயிரக்கணக்கான பக்தர்கள் சிறப்பு வழிபாடு..

சுவேதாரண்யேசுவரர் திருக்கோயிலில், 2026-ம் ஆண்டு ஆங்கில புத்தாண்டை முன்னிட்டு நடைபெற்ற சிறப்பு வழிபாடில் ஏராளமான பக்தர்கள் சாமி தரிசனம் செய்தனர்.

திருவெண்காடு புதன் ஸ்தலம்

Source : ABP

மயிலாடுதுறை மாவட்டம் சீர்காழி வட்டத்தில் அமைந்துள்ள, உலகப்புகழ் பெற்ற திருவெண்காடு பிரம்ம வித்யாம்பிகை சமேத சுவேதாரண்யேசுவரர் திருக்கோயிலில், 2026-ம் ஆண்டு ஆங்கில புத்தாண்டை முன்னிட்டு இன்று சிறப்பு வழிபாடுகள் நடைபெற்றன. வரும் ஆண்டு வளமான ஆண்டாக அமையவும், விவசாயம் செழிக்க வேண்டியும் பல்லாயிரக்கணக்கான பக்தர்கள் நீண்ட வரிசையில் நின்று சுவாமி தரிசனம் செய்தனர்.

ஆதி சிதம்பரம் எனப் போற்றப்படும் தலம்

இந்து சமய அறநிலையத் துறைக்கு சொந்தமான இத்திருக்கோயில், சமயக் குரவர்கள் நால்வராலும் (சம்பந்தர், அப்பர், சுந்தரர், மாணிக்கவாசகர்) பாடல் பெற்ற மிகச்சிறந்த சிவத்தலமாகும். தேவாரப் பாடல் பெற்ற சோழ நாட்டு காவிரி வடகரைத் தலங்களில் 11-வது தலமாக இது விளங்குகிறது. காசிக்கு இணையான ஆறு சிவத்தலங்களில் முதன்மையானதாகத் திருவெண்காடு போற்றப்படுகிறது. பட்டினத்தடிகளார் சிவதீட்சை பெற்ற இடமாகவும், மெய்கண்டார் அவதரித்த தலமாகவும் விளங்குவதால் இது 'ஆதி சிதம்பரம்' என்று பக்தர்களால் பக்தியுடன் அழைக்கப்படுகிறது.

மும்மூர்த்திகளின் அம்சம் - மூன்று சிறப்புகள்

இங்கு இறைவன் சுயம்பு மூர்த்தியாக எழுந்தருளி அருள்பாலிக்கிறார். இக்கோயிலின் தனிச்சிறப்பே அனைத்தும் மூன்றாக அமைந்திருப்பதுதான்:

* தீர்த்தம்: சூரிய தீர்த்தம், சந்திர தீர்த்தம், அக்னி தீர்த்தம் என மூன்று புனிதக் குளங்கள் உள்ளன.

* மூர்த்திகள்: சுவேதாரண்யேசுவரர், அகோரமூர்த்தி, ஆதி நடராஜர் என மூன்று முக்கிய வடிவங்களில் இறைவன் காட்சி தருகிறார்.

* தல விருட்சம்: வில்வம், கொன்றை, வன்னி என மூன்று மரங்கள் தல விருட்சங்களாக உள்ளன.

இந்த மூன்று தீர்த்தங்களில் நீராடி இறைவனையும், அம்பாளையும் வழிபட்டால் ஞானம் கைகூடும், குழந்தை பாக்கியம் கிடைக்கும் மற்றும் எம பயம் நீங்கும் என்பது ஐதீகம்.

நவக்கிரக புதன் தலம்

நவக்கிரக ஸ்தலங்களில் புதனுக்கு உரிய பரிகாரத் தலமாக இக்கோயில் விளங்குகிறது. கல்வி, அறிவு, மற்றும் வணிகத்தில் சிறந்து விளங்க விரும்பும் பக்தர்கள் புதன் பகவானைத் தரிசிக்க நாடு முழுவதிலிருந்தும் இங்கு வருகை தருகின்றனர். இந்திரன் மற்றும் ஐராவதம் எனப்படும் வெள்ளை யானை சாப விமோசனம் பெற்று வழிபட்ட தலம் இது என்பதும் குறிப்பிடத்தக்கது.

மருத்துவா சூரனும், வடுக்கள் நிறைந்த நந்தி பகவானும்

இக்கோயிலில் உள்ள நந்தி பகவானின் சிலையில் இன்றும் காயங்கள் ஏற்பட்டதற்கான வடுக்கள் காணப்படுகின்றன. இதன் பின்னணியில் ஒரு சுவாரஸ்யமான புராண வரலாறு உள்ளது. முன்பு ஒரு காலத்தில் மருத்துவா சூரன் என்ற அசுரன், சிவபெருமானை நோக்கித் தவமிருந்து அவரிடமிருந்து 'சூலாயுதத்தைப்' பெற்றான். அந்த வலிமையைக் கொண்டு தேவர்களை அச்சுறுத்தி வந்தான்.

அப்போது நந்தி பகவான் அசுரனிடம் சென்று அதனைத் தடுக்க முயன்றார். ஆனால், ஆணவம் கொண்ட மருத்துவா சூரன், ஈசன் கொடுத்த சூலாயுதத்தைக் கொண்டே நந்தி பகவானைத் தாக்கினான். அந்தத் தாக்குதலால் நந்தியின் உடலில் ஏற்பட்ட காயங்களே இன்றும் சிலையில் வடுக்களாகக் காட்சியளிக்கின்றன. இதனைத் தொடர்ந்து சிவபெருமான் அகோரமூர்த்தியாக அவதரித்து அசுரனைச் சம்ஹாரம் செய்ததாக வரலாறு கூறுகிறது.

ஆங்கில புத்தாண்டு சிறப்பு வழிபாடு

இன்று 2026 ஆங்கில புத்தாண்டு பிறப்பை முன்னிட்டு, அதிகாலை முதலே கோயிலில் சிறப்பு அபிஷேக ஆராதனைகள் நடைபெற்றன. புதன் பகவானுக்குச் சிறப்பு மகா தீபாராதனை காட்டப்பட்டது. பக்தர்கள் புதன் ஸ்தலத்தில் நெய் தீபமேற்றி தங்களது பிரார்த்தனைகளை முன்வைத்தனர்.

தொடர்ந்து பிரம்ம வித்யாம்பிகை, சுவேதாரண்யேசுவரர் மற்றும் தனிச்சன்னதியில் வீற்றிருக்கும் அகோரமூர்த்திக்குச் சிறப்பு அலங்காரங்கள் செய்யப்பட்டு பூஜைகள் நடைபெற்றன. தமிழகத்தின் பல்வேறு மாவட்டங்களில் இருந்தும், அண்டை மாநிலங்களில் இருந்தும் திரளான பக்தர்கள் வருகை தந்து சாமி தரிசனம் செய்தனர். மாவட்டக் காவல்துறை சார்பில் விரிவான பாதுகாப்பு ஏற்பாடுகள் செய்யப்பட்டிருந்தன.

முக்கியப் பிரமுகர்களின் வருகை

தமிழக முதல்வர் திரு. மு.க. ஸ்டாலின் அவர்களின் துணைவியார் துர்கா ஸ்டாலின் அவர்களின் இல்லம் இக்கோயிலின் அருகிலேயே அமைந்துள்ளதால், அவர் அவ்வப்போது இத்தலத்திற்கு வருகை தந்து வழிபாடு நடத்துவது வழக்கம். இன்றும் புத்தாண்டை முன்னிட்டுப் பல முக்கியப் பிரமுகர்கள் இத்தலத்திற்கு வருகை தந்து வழிபட்டனர்.

ஒவ்வொரு தமிழ் மாதப் பிறப்பு மற்றும் குறிப்பிட்ட சில அமாவாசை தினங்களில் இக்கோயிலில் தீர்த்தவாரி நடைபெறுவது வழக்கம். இன்றைய புத்தாண்டு வழிபாட்டில் கலந்துகொண்ட பக்தர்கள், "இந்த ஆண்டு விவசாயம் செழிக்க வேண்டும், நாட்டில் அமைதி நிலவ வேண்டும்" என்று இறைவனிடம் வேண்டிக் கொண்டனர்.