சீகன் பால்க் மணிமண்டபம்: தரங்கம்பாடியில் கொந்தளிப்பு! போராட்டத்தில் குதித்த மக்கள், காரணம் என்ன?

சீகன் பால்க் மணிமண்டபம்: இடத்தை மாற்றக் கோரி தரங்கம்பாடியில் கடையடைப்பு மற்றும் மீனவர்கள் வேலைநிறுத்தம் - போலீசார் குவிப்பு

தரங்கம்பாடியில் நடைபெறும் போராட்டம்

Source : ABP

மயிலாடுதுறை மாவட்டம் தரங்கம்பாடியில், தமிழறிஞர் சீகன் பால்க்விற்கு அமையவுள்ள மணிமண்டபத்தை பொறையார் பகுதிக்கு மாற்ற எதிர்ப்பு தெரிவித்தும், அவர் வாழ்ந்த தரங்கம்பாடியிலேயே அதனை அமைக்க வலியுறுத்தியும் இன்று மாபெரும் போராட்டம் துவங்கியுள்ளது. வணிகர்கள் கடைகளை அடைத்தும், மீனவர்கள் கடலுக்குச் செல்லாமல் வேலைநிறுத்தத்தில் ஈடுபட்டதோடு, அனைத்து தரப்பு மக்களும் இணைந்து உண்ணாவிரதப் போராட்டத்தில் ஈடுபட்டதால் அப்பகுதியில் பரபரப்பான சூழல் நிலவுகிறது.

வரலாற்றுப் பின்னணி: தமிழும் சீகன் பால்க்கும்

ஜெர்மனி நாட்டிலிருந்து இந்தியாவிற்கு வருகை தந்த சீகன் பால்க் (Bartholomäus Ziegenbalg), முதன்முதலில் தரங்கம்பாடியில்தான் கால் பதித்தார். தமிழ் மொழியின் மீது கொண்ட பற்றினால், ஐரோப்பிய மொழியில் இருந்த விவிலியத்தைத் தமிழில் மொழிபெயர்த்து அச்சிட்டார். இதற்காகத் தரங்கம்பாடியிலேயே முதன்முதலில் அச்சுக்கூடத்தை நிறுவி, தமிழ் எழுத்துக்களை உருவாக்கி, நவீன அச்சுக்கலைக்கு வித்திட்டவர் அவர்.

தமிழ் இறையியல் கல்வி, சைவ இலக்கிய ஆய்வு எனத் தமிழுக்காகத் தன் வாழ்நாளை அர்ப்பணித்த அவர், தரங்கம்பாடியிலேயே மறைந்து அங்கேயே நல்லடக்கம் செய்யப்பட்டார். அவரின் தமிழ்த் தொண்டைப் போற்றும் விதமாகத் தரங்கம்பாடி கடற்கரையில் ஏற்கனவே திருவுருவச் சிலை அமைக்கப்பட்டுள்ளது.

சர்ச்சையின் பின்னணி

சீகன் பால்கின் வாழ்க்கை வரலாறு மற்றும் தமிழ் வளர்த்த பெருமையை உலகிற்கு எடுத்துரைக்கும் விதமாக, அரசு சார்பில் சிலையுடன் கூடிய மணிமண்டபம் அமைக்கச் சட்டமன்றத்தில் கோரிக்கை விடுக்கப்பட்டது. இதற்காக நிதி ஒதுக்கீடு செய்யப்பட்டு, பணிகள் துவங்கப்பட உள்ளன.

இந்த நிலையில், சீகன் பால்க் மணிமண்டபத்திற்கான அடிக்கல் நாட்டு விழா பொறையார் பகுதியில் நடைபெற உள்ளதாக அரசு அறிவித்தது. இதில் 

தமிழ் வளர்ச்சி மற்றும் செய்தித்துறை அமைச்சர் மு.பெ.சாமிநாதன் மற்றும் பிற்படுத்தப்பட்டோர் நலத்துறை அமைச்சர் மெய்யநாதன் ஆகியோர் செய்தி மக்கள் தொடர்பு துறை சார்பில் சீகன் பால்குவிற்கு திருவுருவச் சிலையுடன் அரங்கம் கட்டுவதற்கு அடிக்கல் நாட்ட உள்ளார்கள்.

இது தரங்கம்பாடி பகுதி மக்களிடையே கடும் அதிர்ச்சியை ஏற்படுத்தியுள்ளது. "சீகன் பால்க் வாழ்ந்து, மறைந்து, தமிழ்த் தொண்டாற்றிய இடம் தரங்கம்பாடிதான்; எனவே மணிமண்டபம் இங்குதான் அமைய வேண்டும்" என்பது பொதுமக்களின் பிரதான கோரிக்கையாக உள்ளது.

போராட்டக் களம்: கடையடைப்பு மற்றும் உண்ணாவிரதம்

அரசு தனது முடிவை மாற்றிக்கொள்ள வேண்டும் என்பதை வலியுறுத்தி, இன்று காலை முதலே தரங்கம்பாடியில் போராட்டங்கள் தீவிரமடைந்தன.

 * வணிகர்கள் ஆதரவு: தரங்கம்பாடி கடைவீதியில் உள்ள அனைத்துக் கடைகளும் அடைக்கப்பட்டன. மருந்துக்கடைகள் தவிர்த்து இதர வணிக நிறுவனங்கள் அனைத்தும் மூடப்பட்டுத் தங்கள் எதிர்ப்பைப் பதிவு செய்தனர்.

*மீனவர்கள் வேலைநிறுத்தம்: தரங்கம்பாடி மீனவ தலைமை கிராமத்தின் முடிவின்படி, இன்று மீனவர்கள் யாரும் கடலுக்கு மீன்பிடிக்கச் செல்லவில்லை. நூற்றுக்கணக்கான விசைப்படகுகள் மற்றும் நாட்டுப்படகுகள் கடற்கரையோரம் நிறுத்தி வைக்கப்பட்டன.

* உண்ணாவிரதப் போராட்டம்: தரங்கம்பாடி கடைவீதியில் ஊர் பொதுமக்கள், மீனவர்கள் மற்றும் வணிகர்கள் என அனைத்துத் தரப்பினரும் ஒன்றிணைந்து உண்ணாவிரதப் போராட்டத்தில் ஈடுபட்டனர்.

போலீசார் குவிப்பு மற்றும் பாதுகாப்பு

இந்தத் திடீர் போராட்டத்தின் காரணமாகத் தரங்கம்பாடி மற்றும் அதனைச் சுற்றியுள்ள பகுதிகளில் பதற்றமான சூழல் நிலவுகிறது. எவ்வித அசம்பாவிதங்களும் நடைபெறாமல் தடுக்க, மயிலாடுதுறை மாவட்ட காவல் கண்காணிப்பாளர் ஸ்டாலின் உத்தரவின் பேரில் ஏராளமான போலீசார் அப்பகுதியில் குவிக்கப்பட்டுள்ளனர்.

மக்களின் கோரிக்கை

"பொறையார் பகுதியில் அமையவுள்ள மணிமண்டபத்தை உடனடியாகத் தரங்கம்பாடி பகுதிக்கு மாற்ற வேண்டும். வரலாற்றுச் சிறப்புமிக்கச் சீகன் பால்க்வின் புகழைச் சரியான இடத்தில் நிலைநாட்ட வேண்டும்" என்பதே போராட்டக்காரர்களின் ஒருமித்த குரலாக உள்ளது. அரசு உரிய நடவடிக்கை எடுக்கும் வரை தங்களின் போராட்டங்கள் தொடரும் எனமீனவ கிராம மக்கள் தெரிவித்துள்ளனர்.