தேர்தல் வாக்குறுதி என்னாச்சு? முதல்வர் ஜோசப் விஜய் அரசுக்கு எதிராக கொதித்தெழுந்த டெல்டா விவசாயிகள்!

தேர்தல் அறிக்கையில் அறிவித்தபடி விவசாயக் கடன்களைத் தள்ளுபடி செய்யாத தமிழக முதல்வர் விஜய் அரசை கண்டித்து, மயிலாடுதுறையில் காவேரி டெல்டா பாசனதாரர் முன்னேற்ற சங்கம் சார்பில் ஆர்ப்பாட்டம் நடைபெற்றது.

விவசாயிகள் ஆர்ப்பாட்டம்

Source : Abp

மயிலாடுதுறை: தேர்தல் அறிக்கையில் அறிவித்தபடி விவசாயக் கடன்களை முழுமையாகத் தள்ளுபடி செய்யாத முதல்வர் ஜோசப் விஜய் தலைமையிலான தமிழக அரசைக் கண்டித்து, மயிலாடுதுறையில் காவேரி டெல்டா பாசனதாரர் முன்னேற்ற சங்கத்தின் சார்பில் மாபெரும் கண்டன ஆர்ப்பாட்டம் நடைபெற்றது. மயிலாடுதுறை பேருந்து நிலையம் அருகில் நடைபெற்ற இந்த ஆர்ப்பாட்டத்தில், டெல்டா மாவட்டங்களைச் சேர்ந்த 200-க்கும் மேற்பட்ட விவசாயிகள் திரளாகக் கலந்துகொண்டு தமிழக அரசுக்கு எதிராகக் கண்டன முழக்கங்களை எழுப்பினர்.

தேர்தல் வாக்குறுதியும், ஏமாற்றமும்

ஆர்ப்பாட்டத்திற்குத் தலைமை தாங்கி சங்கத் தலைவர் குருகோபிகணேசன் பேசியதாவது: "தமிழகத்தில் ஆட்சி மாற்றத்தை ஏற்படுத்தியதில் விவசாயிகளின் பங்கு மிக முக்கியமானது. தற்போதைய முதல்வர் ஜோசப் விஜய், தனது தேர்தல் பிரச்சாரத்தின் போதும், கட்சியின் தேர்தல் அறிக்கையிலும் 'நாங்கள் ஆட்சிக்கு வந்தால் கூட்டுறவு சங்கங்களில் விவசாயிகள் வாங்கிய அனைத்து கடன்களும் தள்ளுபடி செய்யப்படும்' என மிக உறுதியாக வாக்குறுதி அளித்தார்.

ஆனால், ஆட்சிப் பொறுப்பேற்று நீண்ட நாட்களாகியும், இன்னும் அந்த வாக்குறுதி காற்றில் பறக்கவிடப்பட்டுள்ளது. நிதி நெருக்கடியைக் காரணம் காட்டி விவசாயிகளை ஏமாற்றுவதை ஏற்றுக்கொள்ள முடியாது. எந்தவித நிபந்தனையும் இன்றி, காலவரையறையின்றி அனைத்துக் கடன்களையும் உடனடியாகத் தள்ளுபடி செய்ய வேண்டும்." இவ்வாறு அவர் கொதிப்புடன் தெரிவித்தார்.

விவசாயிகளின் 6 முக்கிய கோரிக்கைகள்

ஆர்ப்பாட்டத்தில் கலந்துகொண்ட விவசாயிகள், டெல்டா விவசாயத்தைக் காக்க தமிழக அரசு உடனடியாக நிறைவேற்ற வேண்டிய 6 அம்சக் கோரிக்கைகளை முன்வைத்து முழக்கமிட்டனர்.

1.வரம்பற்ற கடன் தள்ளுபடி: தமிழக அரசு தனது தேர்தல் அறிக்கையில் அறிவித்தபடி, கூட்டுறவு சங்கங்களில் விவசாயிகள் வாங்கிய அனைத்துக் கடன்களையும், எவ்வித காலவரையறையின்றி மற்றும் தொகை நிர்ணயம் (உச்சவரம்பு) இன்றி முழுமையாகத் தள்ளுபடி செய்ய வேண்டும்.

2. 18 மணி நேர மும்முனை மின்சாரம்: தற்போதைய குறுவை சாகுபடிக்குத் தேவையான மும்முனை (3 Phase) மின்சாரத்தை, குறைந்த மின்னழுத்தக் குறைபாடு (Low Voltage) இல்லாமல், தினசரி குறைந்தபட்சம் 18 மணி நேரம் தடையில்லாமல் வழங்க வேண்டும்.

3. மேட்டூர் அணைத் தண்ணீர்: குறுவை சாகுபடி கருகாமல் இருக்க, மேட்டூர் அணையில் இருந்து உரிய தண்ணீரைப் பெற்றுத் தர அரசு போர்க்கால அடிப்படையில் நடவடிக்கை எடுக்க வேண்டும்.

4.மேகதாது அணைப் பிரச்சனை: கர்நாடக அரசின் வரம்பு மீறிய மேகதாது அணை கட்டும் முயற்சியைத் தடுக்க, மாநில அரசு சட்ட ரீதியாகவும் அரசியல் ரீதியாகவும் கடுமையான அழுத்தங்களைக் கொடுத்து, உரிய நடவடிக்கை எடுக்க வேண்டும்.

5. பயிர் காப்பீட்டுத் திட்டம்: தற்போது முறைகேடுகளுடன் செயல்பட்டு வரும் 'பாரத பிரதமரின் பயிர் காப்பீட்டுத் திட்டத்தை' மாற்றி, தமிழக அரசே முழுப் பொறுப்பேற்று புதிய பயிர் காப்பீட்டுத் திட்டத்தை நடத்த வேண்டும்.

6. பரவலான குறுவை தொகுப்பு திட்டம்: குறுவை தொகுப்பு திட்டத்தின் பலன்கள் ஒரு சிலருக்கு மட்டும் கிடைக்காமல், டெல்டா பகுதியில் உள்ள அனைத்து விவசாயிகளுக்கும் பரவலாகக் கிடைக்கும்படி அரசு வழிவகை செய்ய வேண்டும்.

விவசாயிகள் திரண்டதால் பரபரப்பு

மயிலாடுதுறை பேருந்து நிலையம் அருகில் நடைபெற்ற இந்த ஆர்ப்பாட்டத்தின் காரணமாக அப்பகுதியில் பெரும் பரபரப்பு ஏற்பட்டது. கைகளில் கருகிய பயிர்களையும், கோரிக்கை பதாகைகளையும் ஏந்தியவாறு நூற்றுக்கணக்கான விவசாயிகள் திரண்டு வந்து முழக்கமிட்டனர். தமிழக அரசு டெல்டா விவசாயிகளின் வாழ்வாதாரப் பிரச்சனையில் மெத்தனப் போக்குடன் செயல்படுவதாகக் குற்றம் சாட்டினர்.

அடுத்தகட்டப் போராட்டம் குறித்து எச்சரிக்கை

ஆர்ப்பாட்டத்தின் நிறைவாகப் பேசிய நிர்வாகிகள், "விவசாயிகளின் கோரிக்கைகளை இந்த அரசு அலட்சியப்படுத்தினால், மயிலாடுதுறை மட்டுமின்றி ஒட்டுமொத்த டெல்டா மாவட்டங்களையும் ஒன்றிணைத்து, தலைநகர் சென்னையை நோக்கிப் பேரணி நடத்துவோம்" என எச்சரித்தனர்.

தேர்தல் வாக்குறுதியை நம்பி வாக்களித்த விவசாயிகளுக்கு, முதல்வர் ஜோசப் விஜய் தலைமையிலான அரசு உடனடியாக நல்லதொரு தீர்வை வழங்க வேண்டும் என்பதே ஒட்டுமொத்த டெல்டா விவசாயிகளின் எதிர்பார்ப்பாக உள்ளது. ஆர்ப்பாட்டத்தை முன்னிட்டு அப்பகுதியில் பலத்த போலீஸ் பாதுகாப்பு போடப்பட்டிருந்தது.