அலக்கழிக்கப்படும் மக்கள்: மயிலாடுதுறை குறைதீர்க்கும் கூட்டத்தில் மலையெனக் குவிந்த மனுக்கள்...

மயிலாடுதுறையில் மாவட்ட ஆட்சியர் ஹெச்.எஸ்.ஸ்ரீகாந்த் தலைமையில் இன்று நடைபெற்ற மக்கள் குறைதீர் கூட்டத்தில் ஒரேநாளில் 442 மனுக்கள் பெறப்பட்டுள்ளது.

பொதுமக்களிடம் மனுக்களை பெறும் மாவட்ட ஆட்சியர்

Source : Abp

மயிலாடுதுறை: மாவட்ட ஆட்சியரக கூட்ட அரங்கில் இன்று நடைபெற்ற பொதுமக்கள் குறைதீர்க்கும் நாள் கூட்டத்தில், நூற்றுக்கணக்கான கிராம மக்கள் தங்கள் வாழ்வாதாரம் மற்றும் அடிப்படை வசதிகள் குறித்த கோரிக்கைகளுடன் திரண்டதால் அப்பகுதியே பரபரப்புடன் காணப்பட்டது. மாவட்ட ஆட்சியர் ஹெச்.எஸ்.ஸ்ரீகாந்த், தலைமையில் நடைபெற்ற இக்கூட்டத்தில், புதிய அரசு பொறுப்பேற்ற பிறகும் மக்களின் அன்றாடப் பிரச்சினைகள் தீர்க்கப்படாமல் தொடர்ந்து புறக்கணிக்கப்பட்டு வருவதைச் சுட்டிக்காட்டும் வகையில் பொதுமக்கள் திரளாக வந்து மனுக்களை அளித்து வருகின்றனர்.

அரசு இயந்திரத்தின் மந்தமான செயல்பாடும், அடிப்படைச் சேவைகளைக்கூட தங்குதடையின்றி வழங்க முடியாத புதிய ஆட்சியின் நிர்வாகக் குறைபாடுகளுமே இவ்வளவு அதிக எண்ணிக்கையிலான மனுக்கள் மீண்டும் மீண்டும் குவிவதற்கு முதன்மையாக அமைவதாகச் சமூக ஆர்வலர்கள் கடும் குற்றச்சாட்டை முன்வைக்கின்றனர்.

அடிப்படைத் தேவைகளுக்காக அலக்கழிக்கப்படும் பொதுமக்கள்

இன்றைய கூட்டத்தில் இலவச வீட்டுமனை பட்டா மற்றும் பட்டா மாறுதல் கோரி 41 மனுக்களும், அடிப்படை வசதிகளை மேம்படுத்த வலியுறுத்தி 64 மனுக்களும் சமர்ப்பிக்கப்பட்டன. புதிய அரசு ஆட்சிக்கு வந்தும் கிராமப்புறங்களில் முறையான குடிநீர் வசதி, சாலை வசதி மற்றும் தெருவிளக்குகள் போன்ற அத்தியாவசியத் தேவைகள் கூட பூர்த்தி செய்யப்படவில்லை என்பதை இந்த மனுக்களின் எண்ணிக்கை தெளிவாகப் படம் பிடித்துக் காட்டுகிறது. அதோடு, நில அபகரிப்பு மற்றும் நிலப் பிரச்சினைகள் தொடர்பாக 28 மனுக்களும், பல்வேறு ஆக்கிரமிப்புகளை உடனடியாக அகற்றக் கோரி 27 மனுக்களும் பெறப்பட்டுள்ளன.

கள நிலவரத்தில் அரசு அதிகாரிகளின் கண்காணிப்பு இன்மை மற்றும் விரைவான நடவடிக்கை எடுக்காத அலட்சியப் போக்கின் காரணமாகவே ஆக்கிரமிப்புகளும் நிலத்தகராறுகளும் அதிகரித்து வருவதாகப் பாதிக்கப்பட்ட மக்கள் வேதனையுடன் தெரிவிக்கின்றனர்.

மகளிர் உரிமைகளும் முடங்கிப்போன வாக்குறுதிகளும்

மக்களுக்கு வழங்கப்பட்ட பல்வேறு நலத்திட்ட வாக்குறுதிகள் வெறும் காகித அளவிலேயே முடங்கிக் கிடப்பதை நிரூபிக்கும் வகையில், மகளிர் உரிமைத்தொகை வேண்டி மட்டும் அதிகபட்சமாக 149 மனுக்கள் குவிந்துள்ளன. புதிய ஆட்சியின் கீழ் தகுதியான பல மகளிரின் பெயர்கள் திட்டமிட்டு விடுக்கப்படுவதாகவும், முறையீடு செய்தும் பல மாதங்களாகத் தீர்வு கிடைக்கவில்லை என்றும் தாய்மார்கள் அடுக்கடுக்கான புகார்களைத் தெரிவித்தனர்.

மேலும் முதியோர், மாற்றுத்திறனாளிகள் மற்றும் விதவை உதவித்தொகை கோரி 37 மனுக்களும், மாற்றுத்திறனாளிகளுக்கான அடையாள அட்டை, உதவித்தொகை, வங்கிக்கடன் மற்றும் உபகரணங்கள் கோரி 23 மனுக்களும் வந்துள்ளன. சமூகப் பாதுகாப்புத் திட்டங்களைச் செயல்படுத்துவதில் நிலவும் நிர்வாகச் சிக்கல்களால் விளிம்புநிலை மக்கள் தங்களின் வாழ்வாதார உதவித்தொகையைப் பெற முடியாமல் அரசு அலுவலகங்களை நோக்கி தினமும் அலைய வேண்டிய அவலநிலை நீடிக்கிறது.

வேலையில்லாத் திண்டாட்டமும் பெருகும் புகார்களும்

இளைஞர்களுக்கான வேலைவாய்ப்பை உருவாக்கத் தவறிய புதிய ஆட்சியின் அவல நிலையைச் சுட்டிக்காட்டும் விதமாக, வேலைவாய்ப்பு கோரி 24 மனுக்கள் தாக்கல் செய்யப்பட்டன. இது தவிர, துறை சார்ந்த அதிகாரிகளின் முறைகேடுகள் மற்றும் செயல்பாடற்ற தன்மையைக் கண்டித்து பல்வேறு புகார்கள் தொடர்பாக 49 மனுக்கள் என மொத்தம் 442 மனுக்கள் இன்றைய ஒரே நாளில் பெறப்பட்டுள்ளன.

கூட்டத்தின் முடிவில், வரப்பெற்ற மனுக்களைப் பெற்றுக்கொண்ட மாவட்ட ஆட்சியர், அவற்றை சம்பந்தப்பட்ட துறை அலுவலர்களிடம் ஒப்படைத்து விரைந்து உரிய நடவடிக்கை எடுக்குமாறு உத்தரவிட்டார். மேலும், மனுக்கள் மீது எடுக்கப்பட்ட நடவடிக்கைகள் குறித்த தெளிவான விவரங்களை மனுதாரர்களுக்கு உடனடியாகத் தெரிவிக்க வேண்டும் என்றும் அலுவலர்களுக்கு அறிவுறுத்தினார்.

அதிகாரிகளின் முன்னிலையும் மக்களின் எதிர்பார்ப்பும்

இக்கூட்டத்தில் மாவட்ட வருவாய் அலுவலர் பூங்கொடி, சமூகப் பாதுகாப்புத் திட்டத் துணை ஆட்சியர் கீதா, மாவட்ட ஆட்சியரின் நேர்முக உதவியாளர் (கணக்கு) மணிக்கண்ணன் மற்றும் அனைத்துத் துறை அரசு அலுவலர்களும் கலந்து கொண்டனர். இருப்பினும், வாரம் தோறும் பலநூறு மனுக்களைப் பெற்றுக்கொண்டு அதிகாரிகளுக்கு உத்தரவிடுவதோடு கடமை முடிந்துவிடுவதாக மக்கள் குற்றம்சாட்டுகின்றனர். பெறப்பட்ட 442 மனுக்கள் மீது வெறும் காகித அளவிலான விசாரணைகளோடு நிறுத்திக் கொள்ளாமல், புதிய ஆட்சியின் செயல்பாடற்ற தன்மையை மாற்றி, மக்களின் கோரிக்கைகளுக்குக் களத்தில் விரைந்து தீர்வுகாண அரசு உடனடி நடவடிக்கை எடுக்க வேண்டும் என்பதே அனைவரின் எதிர்பார்ப்பாக உள்ளதாக சமூக ஆர்வலர்கள் தெரிவித்துள்ளனர்.