மத்திய அரசுப் பணி உங்கள் கனவா? 12,256 காலிப் பணியிடங்களுடன் வெளியான SSC CGL அறிவிப்பு – முழு விபரம்!
மத்திய அரசில் 12,256 குரூப் பி மற்றும் சி பணியிடங்கள் நிரப்பப்பட உள்ள நிலையில், அது தொடர்பாக மயிலாடுதுறையில் ஜூன் 10 அன்று நடைபெறும் கட்டணமில்லா பயிற்சி முகாம் நடைபெற உள்ளது.
மயிலாடுதுறை: மத்திய அரசின் பல்வேறு துறைகளில் காலியாக உள்ள குரூப் 'பி' மற்றும் குரூப் 'சி' பிரிவைச் சேர்ந்த 12,256 பணியிடங்களை நிரப்புவதற்கான புதிய அறிவிப்பை மத்திய அரசுப் பணியாளர் தேர்வாணையம் (SSC) வெளியிட்டுள்ளது. இத்தேர்விற்கு மயிலாடுதுறை மாவட்டத்தைச் சேர்ந்த தகுதியுள்ள இளைஞர்கள் விண்ணப்பித்துப் பயன்பெறும் வகையிலும், அவர்களுக்குத் தேவையான இலவசப் பயிற்சி மற்றும் வழிகாட்டுதல்களை வழங்கும் வகையிலும் மாவட்ட நிர்வாகத்தின் சார்பில் சிறப்பு ஏற்பாடுகள் செய்யப்பட்டுள்ளன.
இது குறித்து மயிலாடுதுறை மாவட்ட ஆட்சியர் ஹெச்.எஸ்.ஸ்ரீகாந்த், வெளியிட்டுள்ள செய்திக்குறிப்பில் விரிவாகக் கூறியுள்ளதாவது;
மத்திய அரசுப் பணி வாய்ப்பு: 12,256 காலிப் பணியிடங்கள்
மத்திய அரசின் பல்வேறு அமைச்சகங்கள், துறைகள் மற்றும் நிறுவனங்களில் உள்ள காலிப் பணியிடங்களை நிரப்புவதற்காக ஸ்டாப் செலக்சன் கமிஷன் (SSC) எனப்படும் மத்திய அரசுப் பணியாளர் தேர்வாணையம், ஒருங்கிணைந்த பட்டப்படிப்பு தர நிலை தேர்வு (CGL - Combined Graduate Level Examination) என்ற எழுத்துத் தேர்வை நடத்தவுள்ளது.
இதன் மூலம் மத்திய அரசின் உயரிய பதவிகளான;
* உதவி தணிக்கை அதிகாரி (Assistant Audit Officer)
* உதவி கணக்கு அதிகாரி (Assistant Accounts Officer)
* உதவி பிரிவு அலுவலர் (Assistant Section Officer)
* இன்ஸ்பெக்டர் (Inspector of Income Tax / Central Excise)
* ஆடிட்டர் (Auditor)
* சப் இன்ஸ்பெக்டர் (Sub Inspector - CBI / NIA)
உள்ளிட்ட பல்வேறு குரூப் 'பி' மற்றும் குரூப் 'சி' பிரிவுகளில் மொத்தம் 12,256 காலிப் பணியிடங்கள் நிரப்பப்பட உள்ளன.
கல்வித் தகுதியும் வயது வரம்பும்
இத்தேர்விற்கு விண்ணப்பிக்க விரும்பும் விண்ணப்பதாரர்கள், அங்கீகரிக்கப்பட்ட ஏதேனும் ஒரு பல்கலைக்கழகத்தில் ஏதேனும் ஒரு இளநிலைப் பட்டப்படிப்பை (Any Degree) படித்து முடித்திருக்க வேண்டும்.
வயது வரம்பு: விண்ணப்பதாரர்கள் 18 வயது பூர்த்தியடைந்தவராகவும், 27 வயதிற்கு மிகாதவராகவும் இருக்க வேண்டும். (மத்திய அரசு விதிகளின்படி, குறிப்பிட்ட பிரிவினருக்கு வயது வரம்பில் தளர்வுகள் உண்டு).
விண்ணப்பிக்கும் முறை மற்றும் தேர்வு தேதிகள்
தகுதியும் ஆர்வமும் உள்ள இளைஞர்கள் 22.06.2026-ஆம் தேதிக்குள் மத்திய அரசுப் பணியாளர் தேர்வாணையத்தின் அதிகாரப்பூர்வ இணையதளமான https://ssc.gov.in/என்ற முகவரியின் வாயிலாக ஆன்லைனில் விண்ணப்பித்துக் கொள்ளலாம்.
இதற்கான முதற்கட்டத் தேர்வானது (Tier-1) கணினி வழித் தேர்வாக (Computer Based Examination) வரும் ஆகஸ்ட் அல்லது செப்டம்பர் 2026-ஆம் மாதங்களில் நடைபெறும் எனத் தெரிவிக்கப்பட்டுள்ளது. இத்தேர்வு குறித்த கூடுதல் மற்றும் முழுமையான விவரங்களை மேற்கண்ட அதிகாரப்பூர்வ இணையதளத்தில் விரிவாகக் கண்டு தெரிந்து கொள்ளலாம்.
மயிலாடுதுறையில் கட்டணமில்லா வழிகாட்டுதல் முகாம்
மத்திய அரசுப் பணிகளில் தமிழக இளைஞர்களின், குறிப்பாக மயிலாடுதுறை மாவட்ட கிராமப்புற இளைஞர்களின் பங்களிப்பை அதிகரிக்கும் நோக்கில், மயிலாடுதுறை மாவட்ட வேலைவாய்ப்பு மற்றும் தொழில்நெறி வழிகாட்டும் மையம் ஒரு சிறப்பான ஏற்பாட்டைச் செய்துள்ளது.
இம்மையத்தில் செயல்பட்டு வரும் தன்னார்வ பயிலும் வட்டத்தின் (Voluntary Study Circle) வாயிலாக, SSC CGL தேர்விற்கு விண்ணப்பிக்க விரும்பும் மாவட்ட இளைஞர்களுக்காக ஒரு சிறப்பு வழிகாட்டுதல் நிகழ்ச்சிக்கு ஏற்பாடு செய்யப்பட்டுள்ளது.
நிகழ்ச்சி நடைபெறும் விவரம்:
நாள் : 10.06.2026 (புதன்கிழமை)
நேரம் : காலை 11:00 மணி
இடம்: மாவட்ட வேலைவாய்ப்பு மற்றும் தொழில்நெறி வழிகாட்டும் மையம்,
2வது தெரு, பாலாஜி நகர், பூம்புகார் சாலை, மயிலாடுதுறை.
இலவசப் பயிற்சி வகுப்புகள் மற்றும் மாதிரித் தேர்வுகள்
மயிலாடுதுறை மாவட்ட வேலைவாய்ப்பு அலுவலகத்தில் நடைபெறவுள்ள இந்தத் தொடக்க வழிகாட்டுதல் நிகழ்ச்சியில், தேர்வுக்கு எவ்வாறு திட்டமிட்டுப் படிப்பது, பாடத்திட்டங்கள் (Syllabus) என்னென்ன, எந்தெந்தப் புத்தகங்களைப் படிக்க வேண்டும் போன்ற அத்தியாவசிய விவரங்கள் அனுபவமிக்க வல்லுநர்களால் விளக்கிக் கூறப்படும்.
மேலும், இந்த முகாமில் கலந்து கொள்ளும் இளைஞர்களின் விருப்பம் மற்றும் தேவையின் அடிப்படையில், தொடர்ந்து கட்டணமில்லாப் பயிற்சி வகுப்புகளும் (Free Coaching Classes), வாராந்திர மாதிரித் தேர்வுகளும் (Mock Tests) நடத்த மாவட்ட நிர்வாகம் திட்டமிட்டுள்ளது. இதன் மூலம் மாணவர்கள் தங்களின் தயாரிப்பு நிலையைத் துல்லியமாகத் தெரிந்துகொண்டு தேர்வை எளிதாக எதிர்கொள்ள முடியும்.
மாவட்ட ஆட்சியர் அழைப்பு மற்றும் பதிவு செய்யும் முறை
இது குறித்து மயிலாடுதுறை மாவட்ட ஆட்சியர் ஹெச்.எஸ்.ஸ்ரீகாந்த், விடுத்துள்ள செய்திக்குறிப்பில், "மத்திய அரசுப் பணிகளில் சேருவது என்பது பல இளைஞர்களின் கனவாக உள்ளது. இந்த 12,256 காலிப் பணியிடங்களுக்கான அறிவிப்பு நமது மாவட்ட இளைஞர்களுக்குக் கிடைத்துள்ள ஒரு பொன்னான வாய்ப்பு. கல்வித் தகுதியும் விருப்பமும் உள்ள மயிலாடுதுறை மாவட்டத்தைச் சேர்ந்த மாணவ, மாணவிகள் மற்றும் வேலைதேடும் இளைஞர்கள் இந்த வாய்ப்பைத் தவறவிடக் கூடாது.
இந்த இலவச வழிகாட்டுதல் முகாமில் கலந்து கொள்ள விரும்பும் இளைஞர்கள் 9499055904 என்ற எண்ணை வாட்ஸ்ஆப் (WhatsApp) வாயிலாகத் தொடர்பு கொண்டு, தங்களது விவரங்களைப் பதிவு செய்து கொள்ள வேண்டும். பின்னர் 10.06.2026 அன்று நடைபெறும் கட்டணமில்லா வழிகாட்டுதல் நிகழ்ச்சியில் நேரில் கலந்து கொண்டு, மத்திய அரசுப் பணியில் அமர முழுப் பலனையும் பெற்றுக் கொள்ளுமாறு அன்போடு கேட்டுக்கொள்கிறேன்" எனத் தெரிவித்துள்ளார்.
தலைப்பு செய்திகள்
ட்ரெண்டிங் செய்திகள்
