நீலகிரி கோடை விழா தேதிகள் அறிவிப்பு - 125 வது மலர் கண்காட்சி மே 19 துவக்கம்
“கோடை விழாவின் முதல் நிகழ்வாக கோத்தகிரி நேரு பூங்காவில் 12-வது காய்கறி கண்காட்சி மே 6 துவங்கி இரண்டு நாட்கள் நடைபெறுகிறது”
நீலகிரி மாவட்டத்தில் இந்தாண்டு கோடை விழா மே 6 ம் தேதி துவங்க உள்ளதாக மாவட்ட ஆட்சியர் அறிவித்துள்ளார்.
மலை மாவட்டமான நீலகிரி மாவட்டம் முக்கிய சுற்றுலா தலமாக விளங்கி வருகிறது. மலைகளின் அரசி என அழைக்கப்படும் உதகைக்கு நாள்தோறும் சுற்றுலா பயணிகள் நீலகிரிக்கு வந்த போதிலும், ஏப்ரல், மே ஆகிய கோடை மாதங்களில் அதிகளவில் வருவது வழக்கம். சுற்றுலா பயணிகளை கவரும் வகையிலும், அவர்களை மகிழ்விக்கும் வகையிலும் ஆண்டுதோறும் கோடை விழா நடத்தப்பட்டு வருகிறது. கோடை விழாவில் காய்கறி காட்சி, வாசனை திரவிய காட்சி, ரோஜா காட்சி, மலர்க்காட்சி, பழக்காட்சி உள்ளிட்டவை விமர்சையாக கொண்டாட்டப்பட்டு வருகிறது.
இந்த நிலையில் இந்த ஆண்டு மலர் மற்றும் பழக்காட்சி குழு கூட்டம் நடைபெற்றது. இதில் நீலகிரி மாவட்ட ஆட்சித் தலைவர் அம்ரித், தோட்டக்கலை துறை அதிகாரிகள் உள்ளிட்டோர் கலந்து கொண்டனர். இந்த கூட்டத்திற்கு பின்னர் செய்தியாளர்களிடம் பேசிய மாவட்ட ஆட்சியர் அம்ரித், “கோடை விழாவின் முதல் நிகழ்வாக கோத்தகிரி நேரு பூங்காவில் 12-வது காய்கறி கண்காட்சி மே 6 துவங்கி இரண்டு நாட்கள் நடைபெறுகிறது. மே 12 முதல் 14 ம் தேதி வரை கூடலூரில் 10-வது வாசனை திரவிய கண்காட்சி நடத்த முடிவு செய்யப்பட்டுள்ளது. மே 13,14,15 ஆகிய தேதிகளில் உதகை ரோஜா பூங்காவில் 18-வது ரோஜா கண்காட்சி நடைபெற உள்ளது. புகழ் பெற்ற ஊட்டி அரசு தாவரவியல் பூங்காவில் 125வது மலர் கண்காட்சி மே 19ல் துவங்குகிறது. மே 19 முதல் 23 வரையிலான 5 நாட்களில் பிரசித்தி பெற்ற 125-வது மலர் கண்காட்சி உதகை தாவரவியல் பூங்காவில் நடத்த முடிவு செய்யப்பட்டுள்ளது. மே 27, 28 தேதிகளில் குன்னூர் சிம்ஸ் பூங்காவில் 63வது பழக் கண்காட்சி நடக்கிறது. நீலகிரி மாவட்டத்தில் கோடை விழாவிற்கான ஏற்பாடுகள் நடந்து வரும் நிலையில், இலட்சக்கணக்கான சுற்றுலா பயணிகள் கண்டு இரசிக்கவும் ஏற்பாடுகள் செய்யப்பட்டு வருகின்றன.” எனத் தெரிவித்தார். இந்த அறிவிப்பு சுற்றுலா பயணிகளிடம் உற்சாகத்தை ஏற்படுத்தியுள்ளது.
நீலகிரி மாவட்ட நிர்வாகம், தோட்டக் கலைத் துறை மற்றும் சுற்றுலாத் துறை ஆகியவை சார்பில் இந்த நிகழ்ச்சிகள் நடைபெற உள்ளது. கோடை விழாவினை முன்னிட்டு உள்நாட்டு மற்றும் வெளிநாட்டு பயணிகள் அதிகளவில் உதகைக்கு வருகை தருவார்கள் என எதிர்பார்க்கப்படுகிறது.
மேலும் செய்திகளை காண, ABP நாடு செய்திகளை Google News -ல் பின் தொடர இங்கே கிளிக் செய்யவும்
ABP நாடு செய்திகளை சமூக வலைத்தள பக்கங்களிலும் பின் தொடரலாம்
Before You Go
BJP Breaks TMC | 50 MLA ராஜினாமா.. உடைந்தது திரிணாமுல் காங்.,? மம்தாவை காலி செய்யும் மோடி
தலைப்பு செய்திகள்
ட்ரெண்டிங் செய்திகள்
