‘கேரளா ஸ்டோரி 2’ சர்ச்சை... கோவையிலும் வெடித்த போராட்டம்...

‘கேரளா ஸ்டோரி 2’ படத்திற்கு எதிர்ப்பு – திரையரங்கை முற்றுகையிட முயன்ற நாம் தமிழர் கட்சியினர் கைது

கேரளா ஸ்டோரி 2 - படத்திற்கு எதிர்ப்பு

Source : abp nadu

கோவை சரவணம்பட்டி பகுதியில் உள்ள தனியார் வணிக வளாகத்தில் திரையிடப்பட்ட ‘கேரளா ஸ்டோரி 2’ திரைப்படத்திற்கு எதிர்ப்பு தெரிவித்து திரையரங்கை முற்றுகையிட முயன்ற நாம் தமிழர் கட்சியினர் காவல்துறையினரால் கைது செய்யப்பட்டனர்.

இயக்குநர் கமக்யா நாரயண் சிங் இயக்கத்தில், உல்கா குப்தா, அதிதி பாத்யா, ஐஸ்வர்யா ஓஜ்ஷா, சுமித் கல்வாத், அர்ஜன் சிங் உள்ளிட்டோர் நடித்துள்ள கேரளா ஸ்டோரி 2 திரைப்படம் தற்போது தமிழகத்தின் பல்வேறு திரையரங்குகள் மற்றும் வணிக வளாகங்களில் திரையிடப்பட்டு வருகிறது. இந்த திரைப்படம் இஸ்லாமிய மதத்திற்கு எதிரான காட்சிகளை கொண்டுள்ளதாகவும், உண்மைக்கு புறம்பான சம்பவங்களை சித்தரித்துள்ளதாகவும் கூறி நாம் தமிழர் கட்சியினர் தொடர்ந்து எதிர்ப்பு தெரிவித்து வருகின்றனர்.

திரையரங்கை முற்றுகையிட்ட நாம் தமிழர் கட்சியினர்

இந்நிலையில், கோவை சரவணம்பட்டி பகுதியில் உள்ள ஒரு தனியார் வணிக வளாகத்தில் இந்த திரைப்படம் திரையிடப்பட்டதை எதிர்த்து, நாம் தமிழர் கட்சியைச் சேர்ந்த 20-க்கும் மேற்பட்டோர் திரையரங்கை முற்றுகையிட முயன்றனர். அவர்கள் பதாகைகளை ஏந்தி முழக்கங்களை எழுப்பியபடி வணிக வளாகத்திற்குள் நுழைய முயன்றபோது, அங்கு பாதுகாப்பு பணியில் இருந்த காவல்துறையினர் அவர்களை தடுத்து நிறுத்தினர். அனுமதி இல்லாமல் போராட்டம் நடத்த முயன்றதாக கூறி காவல்துறையினர் அவர்களை கைது செய்தனர்.

இதுகுறித்து பேசிய நாம் தமிழர் கட்சியின் தொண்டாமுத்தூர் தொகுதி வேட்பாளர் ரஜபுநிஷா, இந்த திரைப்படம் குறித்து கேரள முதலமைச்சர் எதிர்ப்பு தெரிவித்துள்ளார் என்றும், இந்தக் கதையில் கூறப்படும் சம்பவங்கள் உண்மையல்ல என்றும் பலரும் தெரிவித்துள்ளதாக கூறினார். ஆனால் இதுகுறித்து தமிழக முதலமைச்சர் எந்தவிதமான கருத்தும் தெரிவிக்காதது கவலைக்குரியது என அவர் விமர்சித்தார்.

மேலும், நடந்திருக்காத சம்பவங்களை வேண்டுமென்றே சித்தரித்து இந்த திரைப்படம் எடுக்கப்பட்டுள்ளதாகவும், இதில் இஸ்லாமியர்களை கொடூரமானவர்களாக காட்ட முயற்சிக்கப்பட்டுள்ளதாகவும் குற்றம் சாட்டினார். தேர்தலை முன்னிட்டு அரசியல் நோக்கத்துடன் இப்படம் உருவாக்கப்பட்டிருக்கலாம் என்றும் அவர் விமர்சித்தார். இந்த சம்பவம் தொடர்பாக காவல்துறையினர் தொடர்ந்து விசாரணை நடத்தி வருகின்றனர்.