கோவையில் கொரோனா பரவல் அதிகரிப்பு - ஊரடங்கு கட்டுப்பாடுகள் அதிகரிக்கப்படும் என ஆட்சியர் அறிவிப்பு
”ஒமிக்ரான் தொற்று பாதித்தவர் குணமடைந்து வீடு திரும்பியுள்ளார். வெளி நாடுகளில் இருந்து வந்த 19 பேரின் மாதிரிகள் சேகரிக்கப்பட்டதில் அவர்களில் யாருக்கும் ஒமிக்ரான் பாதிப்பு இல்லை”
கோவையில் கொரோனா தொற்று பரவல் அதிகரித்துள்ள நிலையில், ஊரடங்கு கட்டுப்பாடுகளை அதிகரிக்க திட்டமிட்டுள்ளதாக மாவட்ட ஆட்சியர் சமீரன் தெரிவித்துள்ளார். நாடு முழுவதும் 15 முதல் 18 வயதிற்கு உட்பட்ட சிறார்களுக்கு கொரோனா தடுப்பூசி செலுத்தும் பணிகள் துவங்கியுள்ள நிலையில், தமிழ்நாட்டில் சிறார்களுக்கு தடுப்பூசி போடும் பணிகளை முதலமைச்சர் மு.க.ஸ்டாலின் இன்று துவக்கி வைத்தார். அதனை தொடர்ந்து பல்வேறு மாவட்டங்களை தடுப்பூசி போடும் பணிகள் நடைபெற்று வருகின்றன. அதன் ஒரு பகுதியாக கோவை மாவட்டத்தில் பள்ளி மாணவர்களுக்கு தடுப்பூசி போடும் பணியினை கோவை மாவட்ட ஆட்சியர் சமீரன் இன்று துவங்கி வைத்தார். கோவை பாப்பநாயக்கன் பாளையத்தில் அரசு உதவி பெறும் மேல்நிலைப் பள்ளியில் சிறார் தடுப்பூசி முகாமினை மாவட்ட ஆட்சியர் சமீரன், மாநகராட்சி ஆணையர் ராஜகோபால் சுங்கரா ஆகியோர் துவக்கி வைத்தனர்.
இதனைத் தொடர்ந்து கோவை மாவட்ட ஆட்சியர் சமீரன் செய்தியாளர்களுக்கு பேட்டியளித்தார். அப்போது பேசிய அவர், ”கோவை மாவட்டத்தில் தடுப்பூசி போடும் திட்டத்தால் 1.61 லட்சம் மாணவர்கள் பயன் பெற உள்ளனர். 671 பள்ளிகளில் தடுப்பூசி போடப்படுகின்றது. முதல் நாளான இன்று 81 மையங்களில் 16 ஆயிரம் மாணவர்களுக்கு தடுப்பூசி போடப்படுகின்றது. மாணவர்களுக்கு தடுப்பூசி போட்ட பின் உடல்நிலை பாதிப்பு இருந்தால் மட்டும் அவர்களுக்கு விடுமுறை அளிக்க அறிவுறுத்தப்பட்டுள்ளது.
கோவையில் ஒமிக்ரான் தொற்று ஒருவருக்கு மட்டும் கண்டறியப்பட்டது. தற்போது அவர் சிகிச்சை முடிந்து வீட்டில் தனிமைபடுத்தப்பட்டுள்ளார். அவருடன் தொடர்பில் இருந்தவர்களுக்கு நடத்தப்பட்ட மருத்துவ பரிசோதனையில் ஒமிக்ரான் தொற்று இல்லை. வெளி நாடுகளில் இருந்து வந்த 19 பேரின் மாதிரிகள் சேகரிக்கப்பட்டதில் அவர்களில் யாருக்கும் ஒமிக்ரான் பாதிப்பு இல்லை. கொரொனா தொற்று பரவல் அதிகரித்து இருப்பதால், கோவையில் ஊரடங்கு கட்டுப்பாடுகளை அதிகரிக்க திட்டமிடப்பட்டுள்ளது. கொரொனா விதிமுறை மீறல்கள் இருந்தால் கடும் நடவடிக்கைகள் எடுக்கப்படும்.
கோவையில் டெங்கு பாதிப்பு இருக்கிறது. ஒரு சில இடங்கள் ஹாட் ஸ்பாட்டாக கண்டறியப்பட்டு அந்த பகுதிகளில் கண்காணிப்பை தீவிரப்படுத்தியுள்ளோம். மாவட்டத்தில் கொசு ஒழிப்பு நடவடிக்கைகள் தீவிரப்படுத்தப்பட்டுள்ளது. கோவையில் 33 பேர் டெங்கு பாதிப்பால் சிகிச்சை பெற்று வருகின்றனர். கோவையில் ஜல்லிக்கட்டு போட்டி நடத்த ஏற்பாடுகள் செய்யப்பட்டுள்ள நிலையில், கொரொனா வழிகாட்டுதல்களால் போட்டி நடத்துவதா என்பது குறித்து மாநில அரசின் வழிகாட்டுதலுக்காக காத்திருக்கின்றோம்” என தெரிவித்தார்.
ABP நாடு செய்திகளை Google News -ல் பின் தொடர இங்கே கிளிக் செய்யவும்
தலைப்பு செய்திகள்
ட்ரெண்டிங் செய்திகள்
