Kangana Ranaut Tamil Movie: மீண்டும் தமிழில் களமிறங்கும் கங்கனா ரனாவத்... அட இவர் தான் ஜோடியா? எதிர்ப்பார்ப்பில் ரசிகர்கள்..

13 ஆண்டுகளுக்கு பின்  நடிகை கங்கனா ரனாவத் நடிகர் மாதவனுக்கு ஜோடியாக தமிழில் நடிக்க இருப்பதாக தகவல் வெளியாகியுள்ளது.

கோப்பு புகைப்படம்

13 ஆண்டுகளுக்கு பின்  நடிகை கங்கனா ரனாவத் நடிகர் மாதவனுக்கு ஜோடியாக தமிழில் நடிக்க இருப்பதாக தகவல் வெளியாகியுள்ளது.

கங்கனா ரனாவத் 2006 ஆம் ஆண்டு கேங்ஸ்டர் திரைப்படம் மூலம் திரையுலகத்திற்கு அறிமுகமானார். தனது முதல் படம் அபார வெற்றி பெற்றது அதுமட்டுமின்றி சிறந்த நடிகைக்கான ஃபிலிம்ஃபேர் விருதை பெற்றார். அடுத்தடுத்து வோ லம்ஹே, ஃபேஷன், குயின் என ஹிட் கொடுத்தார். தனது கதையை மிகவும் கவனமாக தேர்வு செய்து நடித்து வந்தார் கங்கனா. எந்த ஒரு திரையுலக பிண்ணனியும் இல்லாமல் உச்சம் தொட்ட நடிகை என்ற பெயர் வழங்கப்பட்டது. கங்கனா நடித்த குயின் படம் மிகவும் வித்தியாசமான கதைகளம் கொண்டது. இந்த படம் பெண்கள் மத்தியில் பெரும் வரவேற்பு பெற்றது.

கங்கனா தனது நடிப்பிற்காக மட்டுமல்லாமல், தனது சர்ச்சைக்குரிய கருத்துக்களுக்கும் பெயர் போனவர். அரசியல் ரீதியாக பல சர்ச்சைக்குரிய கருத்துக்களை தெரிவித்துள்ளார். மேலும் ஃபோர்ப்ஸ் இந்தியா பிரபலங்கள் 100 பட்டியலில் ஆறு முறை இடம்பெற்றுள்ளார். கூடுதலாக, இந்தியாவின் நான்காவது மிக உயர்ந்த குடிமகன் விருதான பத்மஸ்ரீ விருது அவருக்கு வழங்கப்பட்டது.

இப்படி ஹிந்தியில் தொடர்ந்து ஹிட் கொடுத்த நடிகை தமிழில் தாம் தூம் படம் மூலம் அறிமுகமானார். இந்த படத்தில் ஜெயம் ரவி கதாநாயகனாக நடித்திருந்தார். அதனை தொடர்ந்து 2021 ஆம் ஆண்டு ஜெயலலிதாவின் வாழ்க்கை வரலாறான தலைவி படத்தில் நடித்தார். அதில் ஜெயலலிதாவின் வாழ்க்கை சம்பவங்களை மிகவும் தத்ரூபமாக நடித்திருந்தார். தலைவி படத்திற்கு பின் அவர் சென்னை மெரினா கடற்கரையில் உள்ள ஜெயலலிதாவின் சமாதிக்கு சென்று நேரில் அஞ்சலி செலுத்தினார். தற்போது மீண்டும் பி.வாசு இயக்கத்தில் சந்திரமுகி 2 படத்தில் ராகவா லாரன்ஸுடன் இணைந்து நடித்துள்ளார். அதற்கான படப்பிடிப்பு முடிந்துள்ளது.

மேலும் எமர்ஜென்சி என்ற படத்தில் நடித்து, தயாரித்து வருகிறார். இந்நிலையில் தமிழில் மீண்டும் நடிக்க உள்ளதாக தகவல் வெளியாகியுள்ளது, இந்த படத்தில் நடிகர் மாதவன் கதாநாயகனாக நடிக்க உள்ளதாகவும், அறிமுக இயக்குனர் விபின் இயக்க இருப்பதாகவும் தகவல் வெளியாகியுள்ளது. இது தொடர்பான அதிகாரப்பூர்வ அறிவிப்பு விரைவில் வெளியிடப்படும் என தெரிவிக்கப்பட்டுள்ளது.

13 ஆண்டுகளுக்கு முன்பு ஆனந்த் எல். ராய் இயக்கத்தில் ஹிந்தியில் தனு வெட்ஸ் மனு என்ற திரைப்படத்தில் இருவரும் ஜோடியாக நடித்தனர். தனு வெட்ஸ் மனு படத்தில் கங்கனா இரட்டை வேடத்தில் நடித்துள்ளார், இந்த படம் சூப்பர் டூபர் ஹிட் ஆனது. இதனை தொடர்ந்து மீண்டும் கங்கனா – மாதவன் ஜோடி தமிழில் நடிக்க உள்ளது ரசிகர்களிடையே மகிழ்ச்சியை ஏற்படுத்தியுள்ளது.