வெயிலில் பைக் ஓட்டும்போது இந்த தப்பு மட்டும் பண்ணாதீங்க.. அனல் காற்றிலிருந்து தப்பிக்க சூப்பர் டிப்ஸ்!

பைக் ஓட்டும்போது அரைக்கை சட்டைகளுக்குப் பதிலாக முழுக்கை சட்டைகளையும் பருத்தி ஆடைகளையும் அணிவது சூரியக் கதிர்களிடமிருந்து சருமத்தைப் பாதுகாக்கும்.

பைக் டிப்ஸ்

Source : ai

கோடை வெயில் கொளுத்தி எடுத்து வருகிறது. நாளுக்கு நாள் வெயிலின் தாக்கம் அதிகரித்து வருவதால் காலை 9 மணிக்கே சூரியன் தனது விஸ்வரூபத்தை காட்டத் தொடங்கிவிடுகிறது. இந்தச் சூழலில் அலுவலகம் செல்பவர்கள் மற்றும் அத்தியாவசியப் பணிகளுக்காக வெளியே செல்பவர்களின் நிலைமை மிகவும் கவலையளிப்பதாக உள்ளது. பேருந்து மற்றும் பொதுப் போக்குவரத்தைப் பயன்படுத்துபவர்கள் ஒருபுறம் அவதிப்பட்டாலும், இருசக்கர வாகனங்களில் பயணிப்பவர்களின் நிலைமை மிகவும் மோசம். சுட்டெரிக்கும் வெயிலில் பைக் ஓட்டுவதுடன், போக்குவரத்து நெரிசலிலும் சிக்கிக்கொள்வது என்பது சொல்லொண்ணா துயரத்தை ஏற்படுத்துகிறது.

இத்தகைய கடுமையான வெயிலில் முறையான முன்னெச்சரிக்கை நடவடிக்கைகளை எடுக்காவிட்டால் உடல் வறட்சி, அதீத சோர்வு மற்றும் வெப்ப வாதம் போன்ற பாதிப்புகள் ஏற்பட வாய்ப்புள்ளது. எனவே வெயிலில் பைக் ஓட்டும்போது உங்கள் ஆரோக்கியத்தையும் அழகையும் பாதுகாக்க சில முக்கிய வழிமுறைகளை பின்பற்றுவது அவசியமாகிறது.

முதலாவதாக முழுமையாக உடலை மறைக்கும் ஆடைகளை அணிவது சிறந்தது. பைக் ஓட்டும்போது அரைக்கை சட்டைகளுக்குப் பதிலாக முழுக்கை சட்டைகளையும் பருத்தி ஆடைகளையும் அணிவது சூரியக் கதிர்களிடமிருந்து சருமத்தைப் பாதுகாக்கும். இது கைகள் கருமையாவதைத் தடுப்பதுடன் உடல் வெப்பத்தையும் சீராக வைக்கும். தலைக்கவசம் அணியும்போது வியர்வையினால் தலைமுடி மற்றும் முகத்தில் பாதிப்புகள் ஏற்பட வாய்ப்புள்ளது. இதனைத் தவிர்க்க தலையில் ஒரு மெல்லிய ஸ்கார்ஃப் அல்லது கைக்குட்டையைக் கட்டிக்கொண்டு அதன் மேல் ஹெல்மெட் அணிவது வியர்வையை உறிஞ்சி முகத்திற்கும் கழுத்திற்கும் குளிர்ச்சியைத் தரும்.

வெயிலில் பயணம் செய்யும்போது உடலில் நீர்ச்சத்து குறைவது இயல்பு என்பதால் எப்போதும் ஒரு தண்ணீர் பாட்டிலை உடன் வைத்திருப்பது நல்லது. பயணத்தின் இடையே அவ்வப்போது தண்ணீர் குடிப்பது உங்களை நீரிழப்பில் இருந்து பாதுகாக்கும். அதேபோல் வெறும் வயிற்றில் வெயிலில் பைக் ஓட்டுவதைத் தவிர்க்க வேண்டும். லேசான உணவை உட்கொண்டு செல்வது சோர்வு மற்றும் பலவீனத்தைத் தடுக்கும். வெறும் வயிற்றில் செல்லும்போது வெயிலின் தாக்கம் அதிகரித்து மயக்கம் அல்லது வெப்ப வாதம் ஏற்படக்கூடும்.

தலைக்கவசம் தலையைப் பாதுகாத்தாலும் கண்களைப் பாதுகாக்க தரமான சூரியக் கண்ணாடி (Sunglasses) அணிவது அவசியம். குறிப்பாக UV கதிர்களைத் தடுக்கும் கண்ணாடிகளைப் பயன்படுத்துவது கண்களுக்கு குளிர்ச்சியைத் தருவதோடு நேரடி ஒளி பாதிப்பிலிருந்து பாதுகாக்கும். போக்குவரத்து நெரிசலில் நீண்ட நேரம் நிற்க வேண்டிய சூழல் ஏற்பட்டால் பைக்கின் இன்ஜினை அணைத்துவிடுவது நல்லது. இது வாகனத்திலிருந்து வெளிப்படும் வெப்பத்தைக் குறைக்கும்.

நீண்ட தூரம் பயணம் செய்பவர்கள் தொடர்ந்து பைக் ஓட்டாமல் இடையில் மர நிழலிலோ அல்லது ஒதுக்குப்புறமான இடங்களிலோ சிறிது நேரம் ஓய்வெடுத்துச் செல்ல வேண்டும். வெயிலில் நீண்ட நேரம் தொடர்ந்து பயணிப்பது உடலுக்கு நல்லதல்ல. வெளியே செல்வதற்கு முன்னதாக சருமத்தில் சன்ஸ்கிரீன் பூசுவது சூரியத் தீய்ப்பிலிருந்து பாதுகாப்பதோடு சருமப் புற்றுநோய் போன்ற பாதிப்புகளையும் தடுக்கும்.

பயணத்தின்போது தலைவலி, வாந்தி, அதிகப்படியான வியர்வை அல்லது தலைசுற்றல் போன்ற அறிகுறிகள் தென்பட்டால் உடனடியாக வாகனத்தை நிறுத்திவிட்டு ஓய்வெடுக்க வேண்டும். இவை வெப்ப வாதத்தின் ஆரம்ப அறிகுறிகள் என்பதால் அலட்சியப்படுத்தாமல் தண்ணீர் குடித்து உடலை குளிர்விக்க வேண்டும். தேவையற்ற நேரங்களில் வெயிலில் செல்வதைத் தவிர்ப்பதுடன் தவிர்க்க முடியாத சூழலில் இந்தச் எளிய முன்னெச்சரிக்கை நடவடிக்கைகளை மேற்கொள்வது உங்கள் கோடை கால பயணத்தைப் பாதுகாப்பானதாக மாற்றும்.