மாற்றுத்திறனாளி இளைஞர்களுக்கான உதவித்தொகைத் திட்டம் - விண்ணப்பிக்க கடைசி தேதி இதுதான்

மாற்றுத்திறனாளி பதிவுதாரர்களாக இருப்பின் வேலைவாய்ப்பு அலுவலகத்தில் பதிவு செய்து ஓராண்டு முடிந்திருக்க வேண்டும்.

மாவட்ட ஆட்சியர் முருகேஷ்

திருவண்ணாமலை வேலைவாய்ப்பற்ற பொது மற்றும் அனைத்துவகை மாற்றுத்திறனாளி இளைஞர்களுக்கான உதவித்தொகைத் திட்டம் விண்ணப்பம் அளித்து சேர்க்கைக்கான அனுமதி பெறலாம் என மாவட்ட ஆட்சித்தலைவர்  பா.முருகேஷ் தெரிவித்துள்ளார்.

வேலைவாய்ப்பற்ற பொது மற்றும் அனைத்துவகை மாற்றுத்திறனாளி இளைஞர்களுக்கான உதவித்தொகைத் திட்டம் பள்ளி இறுதி வகுப்பு தேர்ச்சி பெறாதவர்கள், பள்ளியிறுதி வகுப்புத் தேர்ச்சி, மேல்நிலைக்கல்வி தேர்ச்சி, பட்டப்படிப்பு கல்வித்தகுதிகள் தேர்ச்சிப் பெற்று வேலைவாய்ப்பு அலுவலகத்தில் பதிவு செய்து தொடர்ச்சியாக பதிவினை புதுப்பித்து வருபவர்கள் 31.12.2023-ம் தேதியின் நிலவரப்படி ஐந்தாண்டுகளுக்கு மேல் காத்திருப்பவராக இருத்தல் வேண்டும்.

மாற்றுத்திறனாளி வயது வரம்பு;

மாற்றுத்திறனாளி பதிவுதாரர்களாக இருப்பின் வேலைவாய்ப்பு அலுவலகத்தில் பதிவு செய்து ஓராண்டு முடிந்திருக்க வேண்டும். ஆதிதிராவிடர் பழங்குடியினர் 45 வயதிற்கு மிகாமலும் பிற்பட்டவகுப்பினர் மிகவும் பிற்பட்ட வகுப்பினர் இதரவகுப்பினர் 40 வயதிற்குள்ளும் இருத்தல் வேண்டும். குடும்ப ஆண்டு வருமானம் ரூ72000; (ரூபாய் எழுபத்திரெண்டாயிரம் மட்டும்)க்கு மிகாமல் இருத்தல் வேண்டும். மாற்றுத்திறாளிகளுக்கு வருமான உச்சவரம்பு இல்லை. அரசின் பிறதிட்டங்களின் மூலம் மாதாந்திர உதவித்தொகை பெறுபவர்கள் இந்த உதவித்தொகை பெற விண்ணப்பிக்க இயலாது.

உதவித்தொகை

ஒரு பதிவுதாரருக்கு ஒருமுறை மட்டுமே உதவித்தொகை வழங்கப்படும். 10ஆம் வகுப்பு தவறியவர்களுக்கு மாதம் ரூ200, 10-ம் வகுப்பு தேர்ச்சி பெற்றவர்களுக்கு மாதம் ரூ300 மேல்நிலைக்கல்வி முடித்தவர்களுக்கு மாதம் ரூ400 பட்டதாரிகளுக்கு மாதம் ரூ600 எனவும், மாற்றுத்திறனாளிகளுக்கு 10ம் வகுப்பு தேர்ச்சி மற்றும் தேர்ச்சி பெறாதவர்களுக்கு மாதம் ரூ600 மேல்நிலை வகுப்பு தேர்ச்சி பெற்றவர்களுக்கு மாதம் ரூ750 பட்டதாரிகளுக்கு மாதம் 1000 உதவித்தொகை
வழங்கப்படும்.

மேற்குறிப்பிட்ட தகுதிகள் உள்ளவர்கள் திருவண்ணாமலை மாவட்ட வேலைவாய்ப்பு அலுவலகத்தில் பெறப்பட்ட விண்ணப்பப்படிவத்திலோ அல்லது வேலைவாய்ப்புத்துறை இணையதளத்தில் பதிவிறக்கம் செய்யப்பட்ட விண்ணப்பப் படிவத்திலோ பூர்த்தி செய்து வருவாய்த்துறையில் வருவாய் ஆய்வாளர் அல்லது அதற்கு மேற்பட்ட அலுவலரிடமிருந்து பெறப்பட்ட சான்றும் தேசியமயமாக்கப்பட்ட வங்கிக் கணக்குப் புத்தகம், ஆதார் அட்டை மற்றும் அனைத்து கல்விச்சான்றுகள் அசல் மற்றும் நகல்களுடன் மாவட்ட வேலைவாய்ப்பு அலுவலகத்தில் 29.02.2024-க்குள் விண்ணப்பிக்கலாம் மாற்றுத்திறனாளிகளுக்கு வருமான சான்று தேவையில்லை என்பதால் மேற்குறிப்பிட்ட இதர ஆவணங்களுடன் நேரில் வருகை புரிந்து விண்ணப்பம் அளித்து சேர்க்கைக்கான அனுமதி பெறலாம் என மாவட்ட ஆட்சித்தலைவர்  பா.முருகேஷ் தெரிவித்துள்ளார்.