Mayiladuthurai Coronavirus: ஒன்றரை ஆண்டு எண்ணிக்கை; ஒரு மாதத்தில் முறியடித்த கொரோனா!

ஒருங்கிணைந்த மயிலாடுதுறை மாவட்டத்தில் கொரோனா வைரஸ் தொற்று பரவ தொடங்கி கடந்த ஒன்றரை ஆண்டுகளுக்கு மேல் ஆகிய நிலையில், கடந்த ஒரு மாதத்தில் கொரோனா வைரஸ் தொற்றின் எண்ணிக்கை சரி பாதிக்கு மேல் உயர்ந்துள்ளது.

கொரோனா வைரஸ் விழிப்புணர்வு படம்

நாடுமுழுவதும் கொரோனா வைரஸ் தொற்று  பரவ தொடங்கியது ஒன்றரை ஆண்டுகளுக்கும் மேல் உலக மக்களுக்கு பெரும் இன்னல்களையும், சவால்களையும் தந்து வருகிறது. கொரோனா வைரஸ் தொற்றை ஒழிப்பதற்கு வல்லரசு நாடுகள் பலவும் வழிதெரியாமல் திணறி வருகின்றனர். 

இந்நிலையில் தமிழகத்தில் கொரானா வைரஸ் தொற்றின் இரண்டாம் அலை அதிதீவிரமாக பரவியதை அடுத்து, அதனை கட்டுப்படுத்த தமிழ்நாடு அரசு பல்வேறு கட்ட முயற்சிகளை மேற்கொண்டு வருகின்றது. அதன் ஒன்றாக தமிழ்நாடு முழுவதும் முழு ஊரடங்கு பிறப்பித்தது நடைமுறைப்படுத்தி உள்ளது. இதன் காரணமாக தமிழ்நாட்டில் ஒரு சில மாவட்டங்களில் கொரோனோ வைரஸ் தொற்றின் தாக்கம் படிப்படியாக குறைந்தாலும்,  ஒரு சில மாவட்டங்களில் தொற்றின் தாக்கம் குறைந்தபாடில்லை. தொற்று குறைந்த மாவட்டங்களுக்கு மட்டும் ஜுன் 14 தேதிக்கு பின் மேலும்  தளர்வுகளை அதிகப்படுத்தியும், அதிகமான மாவட்டங்களில் குறைவான தளர்வுகளுடன் ஊரடங்கு தமிழ்நாடு அரசு நீட்டிப்பு செய்துள்ளது. தொற்று அதிகரித்து காணப்படும் மாவட்டங்களின் பட்டியலில் மயிலாடுதுறை மாவட்டமும் ஒன்று.

இந்நிலையில் கடந்த ஒரு மாத காலத்தின் ஒருங்கிணைந்த மயிலாடுதுறை மாவட்ட கொரோனா வைரஸ் தொற்றின் விபரங்களை இதில் காண்போம். கடந்த ஒன்றரை ஆண்டுகளாக கடந்த மே மாதம் 13 ம் தேதி வரை மாவட்டத்தின் கொரோனா வைரஸ் தொற்றால் பார்த்தவர்களின் எண்ணிக்கை 17 ஆயிரத்து 630 பேர் மட்டுமே. ஆனால், தற்போது கடந்த மே 13 -ம் தேதிக்கு பின் ஜுன் 13 இன்று வரை 18 ஆயிரத்து 65 பேருக்கு கொரோனா வைரஸ் தொற்று உறுதி செய்யப்பட்டு கடந்த ஒன்றரை ஆண்டுகள் பதிவை ஒரே மாதத்தில் கடந்து அதிர்ச்சியை ஏற்படுத்தியுள்ளது. மேலும், தொற்றால் பாதித்து சிகிச்சை பலனின்றி உயிரிழந்தவர்களின் எண்ணிக்கையும் அதேபோன்று கடந்த மாதம் வரை 212 இருந்தது, இந்த ஒரு மாத காலத்தில் சரி பாதிக்கு மேல் உயர்ந்து 242 பதிவாகியுள்ளது. குறிப்பாக மாவட்டத்தில் இதுவரை இல்லாத அளவாக மே 26 ம் தேதி 820 பேருக்கு கொரோனா வைரஸ் உறுதி செய்யப்பட்டுள்ளது, அதேபோல் மே 25 ம் தேதி 20 பேர் சிகிச்சை பலனின்றி உயிரிழந்துள்ளனர்.

இதுவரை மாவட்டத்தில் 35 ஆயிரத்து 695 பேர்களுக்கு கொரோனா வைரஸ் தொற்று உறுதி செய்யப்பட்டு, 31 ஆயிரத்து 737 பேர் குணமாகி வீடு திரும்பியுள்ளனர். மேலும் இன்று ஒரேநாளில் மட்டும் 323 நபர்களுக்கு தொற்று உறுதி செய்யப்பட்ட நிலையில் 598 பேர் குணமாகி சென்றுள்ளனர். இந்த சூழலில் சிகிச்சை பலனின்றி இன்று மட்டும் 8 பேர் உயிரிழந்த நிலையில் கொரோனா வைரஸால் பலியாகியுள்ளனர். இதனால் எண்ணிக்கை மாவட்டத்தில் 454 ஆக உயர்ந்துள்ளது.

மேலும் கொரோனா வைரஸ் தொற்றுக்காக ஒருங்கிணைந்த மாவட்டத்தில் மயிலாடுதுறை, தரங்கம்பாடி, செம்பனார்கோவில், சீர்காழி, புத்தூர், வேதாரண்யம், நாகப்பட்டினம் உள்ளிட்ட ஊர்களில் உள்ள அரசு மருத்துவமனைகள் மற்றும் கொரோனா சிகிச்சை மையங்கள், கொரோனா வகைப்படுத்தும் மையம், வீட்டில் தனிமைப்படுத்தப்பட்டு சிகிச்சை என மாவட்டம் முழுவதும் தற்போது 3 ஆயிரத்து 504 பேர் சிகிச்சை பெற்று வருகின்றனர்.

மேலும் கொரோனா வைரஸ் தொற்றை கட்டுப்படுத்த மத்திய, மாநில அரசுகள் தடுப்பூசி போடும் பணியில் தீவிரம் காட்டி வருகிறது. இந்நிலையில், ஒருங்கிணைந்த நாகப்பட்டினம் மயிலாடுதுறை மாவட்டத்தில் இதுவரை 1 லட்சத்து ஆயிரத்து 27 ஆயிரம் பேருக்கு தடுப்பூசி போடப்பட்டு உள்ளதாகவும். தடுப்பூசி பற்றாக்குறை காரணமாக கடந்த 3 தினங்களாக தடுப்பூசி போடும் பணி நிறுத்தப்பட்ட நிலையில் இன்று முதல் மீண்டும் தடுப்பூசி நகர் பகுதி கிராமங்கள் என மாவட்டத்தின் அனைத்துப் பகுதிகளிலும் அரசு மருத்துவமனைகள், ஆரம்ப சுகாதார நிலையங்கள், ஊராட்சி அலுவலகங்கள் உள்ளிட்ட பல்வேறு இடங்களில் தடுப்பூசி சிறப்பு முகாம்கள் அமைக்கப்பட்டு தடுப்பு ஊசி செலுத்தப்படும் பணி தொடரப்பட்டுள்ளது எனவும் தற்போது போதுமான அளவிற்கு தடுப்பூசி பெறப்பட்டுள்ளது என்றும், மேலும் தேவைக்கேற்ப தடுப்பூசிகள் பெற நடவடிக்கைகள் மேற்கொள்ளப்படும் என  மாவட்ட கொள்ளை நோய் தடுப்பு அலுவலர் லியாகத் அலி தெரிவித்துள்ளார்.