Silver: எக்கச்சக்கமாக எகிறும் விலை - உலகின் எந்த நாட்டில் வெள்ளி அதிகம் உள்ளது - இந்தியா நோ?
Silver Price: விலை தொடர்ந்து கிடுகிடுவென உயர்ந்து வரும் நிலையில், உலகின் எந்த நாட்டிடம் வெள்ளி அதிகளவில் கைவசம் உள்ளது என்பது குறித்து இந்த தொகுப்பில் அறியலாம்.
Silver Price: வெள்ளியை அதிகளவில் கைவசம் வைத்துள்ள உலகின் ஐந்து நாடுகள் குறித்து இந்த தொகுப்பில் அறியலாம்.
தாறுறாக ஏறும் வெள்ளி விலை:
2025 ஆம் ஆண்டில் தங்கம் முதலீட்டாளர்களை ஈர்த்தது, அதேநேரம் தொடர்ந்து அதிகரித்து வரும் வெள்ளி விலை அனைவரையும் ஆச்சரியப்படுத்தியது. முன்னெப்போதும் இல்லாத அளவில் விலை உச்சத்தை எட்டி, ஒரு கிலோ வெள்ளியின் விலை ரூ.234,000 ஆக உயர்ந்துள்ளது. மேலும், இந்த விலை அதிகரிக்கக் கூடும் என்றும் கூறப்படுகிறது. இந்நிலையில் உலகில் எந்த நாட்டில் அதிக வெள்ளி உள்ளது, எந்த நாடு உலக சந்தையில் ஆதிக்கம் செலுத்துகிறது என்பது பற்றி இந்த தொகுப்பில் அறியலாம்.
உலகின் வெள்ளி ராஜா யார்?
உலகிலேயே மிகப்பெரிய வெள்ளி கையிருபை கொண்ட நாடாக பெரு திகழ்கிறது. தோராயமாக 140,000 மெட்ரிக் டன் இருப்பு உள்ளது. ஹுவாரி பகுதியில் அமைந்துள்ள அன்டமினா சுரங்கம், உலகளவில் முதலிடத்தில் உள்ள வெள்ளி சுரங்கமாக அமைகிறது. இந்த சுரங்கம் பெருவிற்கு வெள்ளி சந்தையில் ஆதிக்கம் செலுத்த வழிவகை செய்கிறது. இந்த நிலை பெருவை வெள்ளி ராஜ்ஜியத்தின் உண்மையான ராஜாவாக மாற்றுகிறது.
ரஷ்யா - மிகப்பெரிய இருப்பு
தோராயமாக 92,000 டன் வெள்ளி இருப்புடன் ரஷ்யா இரண்டாவது இடத்தில் உள்ளது. சைபீரியா மற்றும் யூரல் பகுதிகளில் உள்ள சுரங்கங்கள் ரஷ்யாவை உலக சந்தையில் ஒரு குறிப்பிடத்தக்க பங்களிப்பாளராக மாற்றுகின்றன. அரசியல் மற்றும் பொருளாதார சவால்கள் இருந்தபோதிலும், ரஷ்ய வெள்ளி உலக சந்தைக்கு குறிப்பிடத்தக்க பங்களிப்பை அளித்து நாட்டின் பொருளாதாரத்தை பலப்படுத்துகிறது.
சீனா - வளர்ந்து வரும் உற்பத்தி சக்தி மையம்
சுமார் 70,000 மெட்ரிக் டன் வெள்ளி கையிருப்புடன் சீனா மூன்றாவது இடத்தில் உள்ளது. ஹெனான் மாகாணத்தில் உள்ள யிங் சுரங்கம் சீனாவின் முக்கிய உற்பத்தியாளராக உள்ளது. சமீபத்திய ஆண்டுகளில் சீனா கனிம உற்பத்தியில் விரைவான முன்னேற்றத்தைக் கண்டுள்ளது, அதன் பொருளாதாரத்தை வலுப்படுத்தி, உலகளாவிய வெள்ளி சந்தையில் அதன் நிலையை மேம்படுத்தியுள்ளது.
போலந்து - ஐரோப்பாவின் முக்கிய உற்பத்தியாளர்
பட்டியலில் நான்காவது இடத்தில் உள்ள போலந்து தோராயமாக 61,000 டன் வெள்ளியை கையிருப்பில் கொண்டுள்ளது. அரசுக்கு சொந்தமான நிறுவனமான KGHM போலந்தின் முன்னணி வெள்ளி மற்றும் செம்பு உற்பத்தியாளராக உள்ளது. போலந்தின் பெரும்பாலான வெள்ளி 2024 ஆம் ஆண்டில் குளோகோவ் செம்பு உருக்காலையிலேயே சுத்திகரிக்கப்பட்டது. இது உலக சந்தையில் அதன் நிலையை மேலும் வலுப்படுத்தியுள்ளது.
மெக்சிகோ - சுரங்கத் தொழிலுக்கு உலகளாவிய பங்களிப்பு
வெள்ளி கையிருப்பில் மெக்சிகோ உலகில் ஐந்தாவது இடத்தில் உள்ளது, தோராயமாக 37,000 டன்களை கைவசம் கொண்டுள்ளது. ஜகாடெகாஸில் உள்ள நியூமாண்டின் பெனாஸ்கிட்டோ சுரங்கம் மெக்சிகோவின் இரண்டாவது பெரிய வெள்ளி சுரங்கமாகும், மேலும் உலகின் ஐந்தாவது பெரிய சுரங்கமாகும். இந்த சுரங்கம் மெக்சிகோவை உலகளாவிய வெள்ளி சந்தையில் ஒரு குறிப்பிடத்தக்க வீரராக நிலைநிறுத்துகிறது.
இந்தியாவின் நிலை
இந்தியா வெள்ளியை அதிகமாகப் பயன்படுத்தும் நாடாகவும், உள்நாட்டுத் தொழில்கள் மற்றும் ஏற்றுமதிகளுக்காக இறக்குமதி செய்யும் நாடாகவும் இருந்தாலும், இருப்பு அடிப்படையில் முதல் ஐந்து நாடுகளில் இந்தியா இல்லை. நாட்டில் வெள்ளி இருப்பு குறைவாக இருப்பதால், உலக சந்தையில் வாங்குபவராகவும் முதலீட்டாளராகவும் இந்தியா செயல்படுகிறது.
தலைப்பு செய்திகள்
ட்ரெண்டிங் செய்திகள்
