Sridevi Boney Love Story : இன்று திருமண நாள்.. ஸ்ரீதேவி, போனி கபூர் காதல் கதையும், திருமணமும்.. எவர்க்ரீன் லவ் ஸ்டோரி

ஸ்ரீதேவியுடனான சந்திப்பை இன்றும் மகிழ்ச்சியுடன் நினைவுகூறும் போனி கபூர், ஸ்ரீதேவியின் அன்றைய மழலை இந்தியே  தன்னை பெரிதும் கொள்ளைக் கொண்டதாக தெரிவிக்கிறார்.

ஸ்ரீதேவி

’பான் இந்தியா’ படங்கள், ஸ்டார்கள் என இன்று புழக்கத்தில் இருக்கும் வார்த்தைகளுக்கு 1980களிலேயே அன்றே அடித்தளமிட்டு தன் நடிப்பாலும், அழகாலும் ஒட்டுமொத்த இந்திய ரசிகர்களையும் கட்டிப்போட்டவர் நடிகை ஸ்ரீதேவி.

முதல் பான் இந்தியா ஸ்டார் ஸ்ரீதேவி!

தமிழ் சினிமா தொடங்கி அனைத்து தென்னிந்திய மொழிகளிலும் கொடி கட்டிப்பறந்து, பாலிவுட் சென்று ஒட்டுமொத்த இந்தியாவின் கனவு தேவதையாக அவர் அடைந்த உச்சம், இன்றும் என்றும் எவராலும் தாண்ட முடியாதது.

போனி கபூருடன் திருமணம்

60கள் தொடங்கி நடித்து கிட்டத்தட்ட இந்தியாவின் உச்ச நடிகர்கள் அனைவருடன் திரையில் ஜோடி சேர்ந்த ஸ்ரீதேவி, 1996ஆம் ஆண்டு,  தயாரிப்பாளர் போனி கபூரை தன் திரை உலக வாழ்வின் உச்சத்தில் 
இருந்தபோது காதல் திருமணம் செய்துகொண்டார்.

போனி கபூருக்கு இத்திருமணம் இரண்டாம் திருமணமாக அமைந்த நிலையில், இவர்களது காதல் அன்றைய காலக்கட்டத்தில் கடும் விமர்சனத்துக்கு உள்ளானது. ஆனால் அன்று தொடங்கி இன்று வரை, ஸ்ரீதேவி உயிருடன் இருந்தபோதும், இன்று இல்லாதபோதும் அனைத்து தருணங்களிலும் போனி கபூர் தன் எல்லையற்ற காதலால் பலரையும் உணர்ச்சிப் பெருக்கடைய வைத்தே வருகிறார்.

ஸ்ரீதேவி- போனி கபூர் திருமணநாளான இன்று இவர்களது காதல் கதையை நினைவுகூர்வோம்...

கண்டதும் காதல்...

இந்தியில் அன்று முதல் இன்று வரை வெற்றிகரமான தயாரிப்பாளராக வலம் வரும் போனி கபூர் 2013 ஆம் ஆண்டு தான் அளித்த பேட்டி ஒன்றில், தான் ஸ்ரீதேவியைப் பார்த்த மாத்திரத்தில் காதலில் விழுந்ததாகத் தெரிவித்துள்ளார். ஸ்ரீதேவியின் தமிழ் படம் ஒன்றை பார்த்து மகிழ்ந்த போனி அப்போது முதலே அவரை தன் படத்தில் நடிக்க வைக்க முயற்சித்ததாகத் தெரிவித்துள்ளார்.

முதல் சந்திப்பு...

இந்தியில் ஸ்ரீதேவியின் கரியர் உச்சம் பெற்றிருந்த சமயம் மிஸ்டர் இந்தியா படத்தில் அனில் கபூர் ஜோடியாக ஸ்ரீதேவியை நடிக்க வைக்க நிகழ்ந்ததே போனி கபூர் - ஸ்ரீதேவியின் முதல் சந்திப்பு. இச்சந்திப்பை இன்றும் மகிழ்ச்சியுடன் நினைவுகூறும் போனி கபூர், ஸ்ரீதேவியின் அன்றைய மழலை இந்தியே  தன்னை பெரிதும் கொள்ளைக் கொண்டதாக தெரிவித்துள்ளார்.

காதலை உணர்ந்த ஸ்ரீதேவி!

தான் ஸ்ரீதேவியின் மீது விரைவில் உச்சகட்ட காதலில் விழுந்ததாகவும், ஸ்ரீதேவிக்காக தான் என்றும் இருப்பேன் என அவருக்குப் புரிய வைக்க முயன்றதாகவும் போனி தெரிவித்துள்ளார்.

பின் சிறிது சிறிதாக போனி கபூரின் காதலை உணரத் தொடங்கிய ஸ்ரீதேவி, விரைவில் தானும் அவருடன் காதலில் விழுந்துள்ளார். ”நான் விடாமுயற்சியுடனும், நேர்மையாகவும் அவரைக் காதலிப்பதை ஸ்ரீ உணர்ந்தார்”என போனி கபூர் நேர்காணல் ஒன்றில் காதல் பொங்க நினைவுகூர்ந்துள்ளார்

எளிய முறையில் திருமணம்

இவர்களது காதல் கோலிவுட் தொடங்கி பாலிவுட் வரை பலரையும் புருவம் உயர்த்த வைத்த நிலையில், ஜூன் 2, 1996 இருவரும் எளிமையான முறையில் திருமணம் செய்து கொண்டனர். ஸ்ரீதேவி இன்று தன்னுடன் இல்லாத நிலையில், அவர் மீதான தன் எல்லையற்ற காதலை போனி கபூர் தன் சமூக வலைதளப்பக்கங்களில் உணர்வுக் குவியலாய் பகிர்ந்து வருகிறார்.