‘Self Made Star’ வேண்டாம், இதுதான் என் பட்டம்! நற்பனி மன்ற சந்திப்பில் சிவகார்த்திகேயன் பேச்சு கவனம்
நற்பணி மன்ற சந்திப்பில் ‘Self Made Star’ பட்டம் குறித்து சிவகார்த்திகேயன் பேசிய கருத்துகள் ரசிகர்கள் மத்தியில் கவனம் ஈர்த்துள்ளது.

சென்னையில் நடைபெற்ற நற்பணி மன்ற நிர்வாகிகள் சந்திப்பில் நடிகர் சிவகார்த்திகேயன் தனது திரையுலகப் பயணம், ரசிகர்களின் பங்களிப்பு மற்றும் விமர்சனங்கள் குறித்து பேசினார். அப்போது, தன்னை ‘Self Made Star’ என்று ரசிகர்கள் அழைப்பதாகக் குறிப்பிட்ட சிவகார்த்திகேயன், அதற்கு பதிலாக ‘People Made Star’ என்று தன்னை அழைத்துக்கொள்ள விரும்புவதாகத் தெரிவித்தார்.
அரசியல் பாதையில் சிவகார்த்திகேயன்
தற்போது தமிழக முதல்வராக பதவி வகித்து வரும் விஜயைத் தொடர்ந்து தமிழ் திரையுலகில் அடுத்தடுத்த நட்சத்திரங்கள் தங்களது அரசியல் வருகைக்கான அடித்தளத்தை அமைத்து வருகிறார்கள். ஏற்கனவே நடிகர் தனுஷ் நற்பனி மன்றத்தின் மூலம் அரசியல் வருகைக்கான செயற்பாடுகளில் இறங்கியுள்ளார். அவரைத் தொடர்ந்து தற்போது நடிகர் சிவகார்த்திகேயனும் அதே பாதையை தொடர்ந்துள்ளார்.
நடிகர் சிவகார்த்திகேயன் தனது நற்பணி இயக்க நிர்வாகிகளை அக்டோபர் 4ஆம் தேதி சென்னையில் நேரில் சந்தித்தார். சென்னை போரூர் அருகே உள்ள பரணிபுத்தூர் பகுதியில் நடைபெற்ற இந்தச் சந்திப்பில், தமிழகம் முழுவதிலும் இருந்து சுமார் 2,000-க்கும் மேற்பட்ட நற்பணி இயக்க நிர்வாகிகள் பங்கேற்றனர். இதில் பங்கேற்ற ரசிகர்கள் வெள்ளைச் சட்டை அணிந்திருந்தனர். நிகழ்ச்சி நடைபெற்ற அரங்கில் சிவகார்த்திகேயன் நற்பணி இயக்கத்தின் கொடிகள், பேனர்கள் மற்றும் போஸ்டர்கள் இடம்பெற்றிருந்தன. சந்திப்பின்போது நிர்வாகிகளுடன் சிவகார்த்திகேயன் கலந்துரையாடியதுடன், அவர்களுடன் புகைப்படங்களும் எடுத்துக்கொண்டார்.
தனக்குதானே பட்டம்
இந்த நிகழ்வில் பேசிய சிவகார்த்திகேயன் “விஜய் சேதுபதியும் நானும் எந்த சினிமா பின்னணியும் இல்லாமல் நடிகர்களாக திரைத்துறைக்குள் வந்தோம். மிமிக்ரி அல்லது தொகுப்பாளராக இருந்த ஒருவர் ஒருபோதும் நடிகராக முடியாது என்று சொன்னவர்கள் இருந்தார்கள். ஆனால், அவர்களைத் தவறு என்று நிரூபித்து, நடிப்பில் எனக்கான பாதையை உருவாக்கினேன்.
நீங்கள் அனைவரும் என்னை ‘Self Made Star’ என்று அழைக்கிறீர்கள். ஆனால், இன்று நான் இந்த இடத்தில் இருப்பதற்கு நீங்கள் அனைவரும்தான் காரணம். அதனால், என்னை ‘People Made Star’ என்றே அழைத்துக்கொள்ள விரும்புகிறேன்.
விமர்சனங்கள் பற்றி
விமர்சிப்பவர்கள் எப்போதும் விமர்சித்துக்கொண்டே இருப்பார்கள். ஆனால், நாம் அனைவரும் அன்பினால், அன்புக்காக ஒன்றாக இருக்கிறோம். நம்முடைய நோக்கம் என்ன என்பதை நாம் தெளிவாகப் புரிந்துகொண்டு, அதில் உறுதியாக இருக்க வேண்டும்.” என சிவகார்த்திகேயன் கூறினார்.
மேலும், நற்பணி மன்ற நிர்வாகிகளிடம் குடும்பத்துக்கு முக்கியத்துவம் கொடுக்க வேண்டும் என்றும், நன்றாகப் படித்து நன்றாக சம்பாதிக்க வேண்டும் என்றும் சிவகார்த்திகேயன் அறிவுறுத்தினார். தினமும் குறைந்தது 15 நிமிடங்களாவது புத்தகங்களைப் படிக்க வேண்டும் என்றும் அவர் கேட்டுக்கொண்டார்.
தலைப்பு செய்திகள்
ட்ரெண்டிங் செய்திகள்






















