Perambur: "விஜய் முதல் திலகபாமா வரை.." ஸ்டார் தொகுதி பெரம்பூரில் 48 பேர் போட்டி!

தமிழ்நாட்டில் நட்சத்திர தொகுதியாக உருவெடுத்திருக்கும் பெரம்பூரில் விஜய், ஆர்டி சேகர், திலகபாமா உள்பட 48 பேர் வேட்புமனுக்கள் ஏற்கப்பட்டுள்ளது.

விஜய் - ஆர்டி சேகர் - திலகபாமா

Source : Twitter

தமிழ்நாட்டில் சட்டமன்ற தேர்தல் பரபரப்பு நாளுக்கு நாள் அதிகரித்துக் கொண்டே போகிறது. முக்கிய தலைவர்கள் போட்டியிடும் தொகுதிகள் மீது தனி கவனம் பெற்றுள்ளது. இந்த தேர்தலில் மக்கள் மத்தியில் மிகப்பெரிய அளவில் எதிர்பார்ப்பை உருவாக்கியிருப்பவர் நடிகர் விஜய். 

நட்சத்திர தொகுதி பெரம்பூர்:

தவெக தலைவரான விஜய் இந்த முறை பெரம்பூர் மற்றும் திருச்சி கிழக்கு தொகுதியில் போட்டியிடுகிறார். இதில் பெரம்பூர் தொகுதி மீது மிகப்பெரிய எதிர்பார்ப்பு மக்கள் மத்தியில் எழுந்துள்ளது. பெரம்பூர் தொகுதியில் மொத்தம் 66 வேட்புமனுக்கள் தாக்கல் செய்யப்பட்டது. இதில் 48 பேரின் வேட்புமனுக்கள் ஏற்கப்பட்டுள்ளது.

விஜய் முதல் திலகபாமா வரை:

இந்த தொகுதியில் முக்கிய போட்டியாளராக கருதப்படும் தவெக தலைவர் விஜய், திமுக -வின் வேட்பாளரும், தற்போதைய எம்எல்ஏ-வான ஆர்டி சேகரும், அதிமுக கூட்டணி சார்பாக பாமக வேட்பாளர் திலகபாமா, நாம் தமிழர் வேட்பாளர் வெற்றித் தமிழன் ஆகிய நான்கு பேரின் வேட்புமனுக்களும் ஏற்கப்பட்டுள்ளது.

இதனால், இந்த முறை பெரம்பூர் தொகுதி முன் எப்போதும் இல்லாத அளவிற்கு கடுமையான எதிர்பார்ப்பை தமிழ்நாடு முழுவதும் உருவாக்கியுள்ளது. இந்த தொகுதியில் வெற்றி பெற வேண்டும் என்ற நோக்கத்தில் ஒவ்வொரு கட்சி வேட்பாளரும் மிகவும் தீவிரமாக பரப்புரையில் ஈடுபட்டு வருகின்றனர்.

விஜய் பெரம்பூர் தொகுதியில் கடந்த வாரம் பரப்புரையில் ஈடுபட்டு வரும் நிலையில், திமுக வேட்பாளரும் தீவிரமாக வாக்கு சேகரித்து வருகிறார். பாமக வேட்பாளர் திலகபாமாவும் தினசரி வாக்கு சேகரிப்பில் ஈடுபட்டு வருகிறார். மற்றொரு பக்கம் நாம் தமிழர் கட்சி வேட்பாளர் வெற்றித் தமிழனும் தீவிர வாக்கு சேகரிப்பில் ஈடுபட்டு வருகின்றனர்.

48 பேர் போட்டி:

இந்த தொகுதியில் தேர்தல் ஆணையம் வெளியிட்டுள்ள தரவுகளின்படி, மொத்தம் 48 வேட்பாளர்கள் களமிறங்குகின்றனர். 17 பேர் வேட்புமனுக்கள் நீிராகரிக்கப்பட்டுள்ளது. சென்னை திமுக-வின் கோட்டையாக திகழ்ந்து வரும் நிலையில், திமுக-விற்கு சவால் அளிக்கும் வகையில் ஒவ்வொரு வேட்பாளரும் இருப்பதால் பெரம்பூர் தொகுதியில் மிக கடுமையான போட்டி நிலவும் என்றே கருதப்படுகிறது.

சென்னையில் அதிகளவு வாக்காளர்கள் உள்ள பட்டியலில் பெரம்பூர் 2வது இடத்தில் உள்ளது. பெரம்பூர் தொகுதியில் மு.க.ஸ்டாலின், எடப்பாடி பழனிசாமி இன்னும் நேரடி பரப்புரையில் ஈடுபடாத நிலையில், முக்கிய தலைவர்களில் ஒருவரான அன்புமணி ராமதாஸ் மட்டும் விஜய் உள்ளிட்ட பிற வேட்பாளர்களுக்கு எதிராகவும், தனது கட்சி வேட்பாளர் திலகபாமாவிற்கு ஆதரவாகவும் வாக்கு சேகரித்தார்.