"வாக்கு வாங்க மட்டுமா வாக்குறுதி?" - முதல்வர் ஸ்டாலினுக்கு பகுதிநேர ஆசிரியர்கள் கடும் கண்டனம்!

181-வது வாக்குறுதியை நிறைவேற்றாமல் காலம் கடத்துவது நியாயமா?" என தமிழ்நாடு பகுதிநேர ஆசிரியர்கள் கூட்டமைப்பின் மாநில ஒருங்கிணைப்பாளர் செந்தில்குமார் தமிழக அரசுக்கு கேள்வி எழுப்பியுள்ளார்.

கோப்புப் படம்

Source : ABP

"தேர்தலில் 12 ஆயிரம் பகுதிநேர ஆசிரியர் மற்றும் அவர்களின் குடும்பங்களின் வாக்குகளைப் பெற்று வெற்றி பெற மட்டும்தான் வாக்குறுதி அளித்தீர்களா? 181-வது வாக்குறுதியை நிறைவேற்றாமல் காலம் கடத்துவது நியாயமா?" என தமிழ்நாடு பகுதிநேர ஆசிரியர்கள் கூட்டமைப்பின் மாநில ஒருங்கிணைப்பாளர் எஸ்.செந்தில்குமார் தமிழக அரசுக்கு காரசாரமான கேள்விகளை எழுப்பியுள்ளார்.

வாக்குறுதி என்னானது? - கேள்விக்குறியாகும் எதிர்காலம்

தமிழகத்தில் கடந்த சட்டமன்றத் தேர்தலின் போது, திமுக ஆட்சிக்கு வந்தால் பகுதிநேர ஆசிரியர்கள் அனைவரும் பணி நிரந்தரம் செய்யப்படுவார்கள் என 181-வது வாக்குறுதியாக அறிவிக்கப்பட்டது. ஆனால், ஆட்சிப் பொறுப்பேற்று ஆண்டுகள் பல கடந்தும், இன்றுவரை அந்த வாக்குறுதி காகித அளவிலேயே இருப்பதாக ஆசிரியர்கள் குற்றம் சாட்டுகின்றனர்.

இது குறித்து ஒருங்கிணைப்பாளர் செந்தில்குமார் விடுத்துள்ள அறிக்கையில், "வாக்குறுதி கொடுத்து இன்றுவரை ஏமாற்றி வரும் முதலமைச்சர் ஸ்டாலினால் 12 ஆயிரம் ஆசிரியர்களின் எதிர்காலம் கேள்விக்குறியாகிவிட்டது. சமீபத்தில் நடந்த தொடர் போராட்டத்தின் போது ஆசிரியர் கண்ணன் உயிரிழந்ததற்கு, அரசு பணி நிரந்தரம் செய்யாததே முக்கிய காரணம். மனிதாபிமான அடிப்படையில் கூட அவர் குடும்பத்திற்கு எந்த ஒரு நிவாரணமும் வழங்கப்படவில்லை என்பது கொடுமையிலும் கொடுமை" எனத் தெரிவித்துள்ளார்.

சட்ட ரீதியான உரிமையும், உச்ச நீதிமன்ற தீர்ப்பும்

கடந்த 2011-ம் ஆண்டு கொண்டு வரப்பட்ட 110-விதி அறிவிப்பின்படி, உடற்கல்வி, ஓவியம், தொழிற்கல்வி ஆகிய பாடங்களுக்காக 16 ஆயிரத்து 549 பணியிடங்கள் உருவாக்கப்பட்டன. தற்போது 15 ஆண்டுகளாகப் பணியாற்றி வரும் 12 ஆயிரம் ஆசிரியர்களை நிரந்தரமாக்க அரசு ஏன் தயங்குகிறது என்ற கேள்வி எழுந்துள்ளது.

மேலும், சமீபத்தில் (04-02-2026) உத்திரப்பிரதேச மாநில வழக்கில் உச்ச நீதிமன்ற நீதிபதி பங்கஜ் மிட்டல் வழங்கிய தீர்ப்பை சுட்டிக்காட்டியுள்ள அவர், "பகுதிநேர ஆசிரியர்களை பணி நிரந்தரம் செய்ய வேண்டும் என உச்ச நீதிமன்றமே கூறிவிட்டது. முன்னதாக தமிழகத்தில் தொழிற்கல்வி ஆசிரியர்கள் பணி நிரந்தரம் செய்யப்பட்ட முன்னுதாரணங்கள் இருக்கும்போது, தற்போதைய அரசு சாக்குப்போக்கு சொல்வது ஏன்?" என வினவியுள்ளார்.

நிதிக் கொள்கையும் நிர்வாகச் சொதப்பல்களும்

அரசு மேற்கொண்டுள்ள பல்வேறு குளறுபடிகளைப் பட்டியலிட்ட அவர்:

*சம்பள உயர்வு ஏமாற்றம்: ஆண்டுக்கு 10% சம்பள உயர்வு வழங்கப்பட்டிருந்தால், இன்று ஆசிரியர்கள் 23 ஆயிரம் ரூபாய் சம்பளம் பெற்றிருப்பார்கள். ஆனால், தற்போது வெறும் 12,500 ரூபாயிலேயே தவிக்கின்றனர்.

*177-வது அரசாணை: ஒரு ஆசிரியரே நான்கு பள்ளிகளில் பணிபுரியலாம் என்ற அரசாணையைச் செயல்படுத்தியிருந்தால், ஆசிரியர்களுக்கு 50 ஆயிரம் ரூபாய் வரை வருமானம் கிடைத்திருக்கும்.

* மே மாத சம்பள முரண்பாடு: 2026 தேர்தலில் யார் ஆட்சிக்கு வருகிறார்களோ, அவர்கள் காலத்தில் 10 ஆயிரம் ரூபாய் மே மாத சம்பளம் வழங்கப்படும் என்பது நகைப்புக்குரியது. 11 மாதத்திற்கு ஒரு சம்பளம், ஒரு மாதத்திற்கு மட்டும் வேறு சம்பளம் என்பது நிர்வாகச் சீர்கேடு.

*நிறைவேற்றப்படாத அறிவிப்புகள்: 2023-ல் அறிவிக்கப்பட்ட 10 லட்சம் ரூபாய் மருத்துவக் காப்பீடு, பொங்கல் போனஸ், வருங்கால வைப்பு நிதி என எதுவும் இன்றுவரை நடைமுறைக்கு வரவில்லை.

"தேர்வு என்பது ஒரு நாடகம்"

தற்போது அரசு அறிவித்துள்ள 'தேர்வு முறை' குறித்து கடும் அதிருப்தி தெரிவித்துள்ள செந்தில்குமார், "பணி நிரந்தரம் செய்வோம் என்று கூறிவிட்டு, இப்போது 15 ஆண்டு அனுபவம் கொண்டவர்களையும், புதியவர்களையும் ஒன்றாகத் தேர்வு எழுதச் சொல்வது என்ன நியாயம்? சமூக நீதி பேசும் முதல்வர், ஆசிரியர்களுக்கு நீதி வழங்கத் தவறிவிட்டார். பணி நிரந்தரம் செய்ய விருப்பமில்லை என்றால், 'செய்ய மாட்டோம்' என்று நேரடியாகச் சொல்லுங்கள்" என சவால் விடுத்துள்ளார்.

அரசுக்கு இருக்கும் பொருளாதாரச் சுமை எவ்வளவு?

பகுதிநேர ஆசிரியர்களைப் பணி நிரந்தரம் செய்து, காலமுறை ஊதியமாக 20,600 ரூபாய் அடிப்படைச் சம்பளம் வழங்கினால், ஒரு ஆசிரியருக்கு மாதம் 30 ஆயிரம் ரூபாய் செலவாகும். 12 ஆயிரம் பேருக்கு மாதம் 20 கோடி ரூபாய் கூடுதல் நிதி தேவைப்படும். ஆண்டுக்கு 240 கோடி ரூபாய் மட்டுமே கூடுதல் நிதி ஒதுக்கினால் போதும்.

"4 லட்சம் கோடி ரூபாய்க்கு பட்ஜெட் போடும் அரசு, பள்ளிக்கல்வித்துறைக்கு ஒதுக்கும் 2 லட்சம் கோடியில், வெறும் 240 கோடியை ஒதுக்கி ஆசிரியர்களின் வாழ்வாதாரத்தைக் காக்க முடியாதா?" என அவர் கேள்வி எழுப்பியுள்ளார்.

இறுதி வேண்டுகோள்

வரும் இடைக்கால பட்ஜெட்டிலாவது முதல்வர் ஸ்டாலின் தனது 181-வது வாக்குறுதியை நிறைவேற்றி, 12 ஆயிரம் ஆசிரியர் குடும்பங்களின் விளக்கேற்ற வேண்டும் என்றும், இல்லையெனில் இந்த 'அநீதி' தமிழகம் முழுவதும் மக்கள் மத்தியில் பேசும் பொருளாக மாறும் என்றும் பகுதிநேர ஆசிரியர்கள் கூட்டமைப்பு எச்சரிக்கை விடுத்துள்ளது.