School Reopen Date: மாணவர்களே.. ஜூன் 1 பள்ளிகள் திறப்பு; புது பாடத்திட்டம்- அமைச்சர் ராஜ்மோகன் அறிவிப்பு

School Reopen Date 2026 Tamilnadu: ஜூன் 4ஆம் தேதி பள்ளிகள் திறக்கப்படும் என்று கூறப்பட்ட நிலையில், முன்கூட்டியே பள்ளிகள் திறக்கப்பட உள்ளன. 

அமைச்சர் ராஜ்மோகன் அறிவிப்பு

Source : சிறப்பு ஏற்பாடு

தமிழ்நாட்டில் பள்ளிக் கல்வி வாரியத்தின்கீழ் மாநிலப் பாடத்திட்டத்தில் படிக்கும் மாணவர்களுக்கு ஜூன் 1ஆம் தேதி அன்று பள்ளிகள் திறக்கப்படும் என்று பள்ளிக் கல்வித்துறை அமைச்சர் ராஜ்மோகன் அறிவித்துள்ளார்.

ஜூன் 4ஆம் தேதி பள்ளிகள் திறக்கப்படும் என்று கூறப்பட்ட நிலையில், முன்கூட்டியே பள்ளிகள் திறக்கப்பட உள்ளன.  எனினும் 1 முதல் 3ஆம் வகுப்பு வரையிலான மாணவர்களுக்கு ஜூன் 4ஆம் தேதி பள்ளிகள் திறக்கப்பட உள்ளன. 

10ஆம் வகுப்பு தேர்வு முடிவுகள் திட்டமிட்டபடி மே 20ஆம் தேதி அன்று வெளியாகும் எனவும் அமைச்சர் அறிவித்துள்ளார். தொடர்ந்து 1 முதல் 3ஆம் வகுப்பு வரையிலான மாணவர்களுக்கு புதிய பாடத்திட்டமும் அறிமுகம் செய்யப்பட்டுள்ளது.

நடந்தது என்ன?

அமைச்சர் ராஜ்மோகன் தலைமையில் 18.05.2026 அன்று அரசு கூடுதல் தலைமை செயலாளர் சந்திரமோகன் மற்றும் கல்வி உயர் அலுவலர்களோடு பள்ளிக்கல்வித் துறை சார்பான நடவடிக்கைகள் குறித்த ஆய்வு கூட்டம் நடைபெற்றது. இவ்வாய்வு கூட்டத்தில் ஒன்று, இரண்டு மற்றும் மூன்றாம் வகுப்பு புதிய பாடத்திட்டத்தின்படி மாணவர்களுக்கு உருவாக்கப்பட்டுள்ள ஒன்பது பாட நூல்களை வெளியிட்டார்.

மாணவர்கள் எளிதில் புரிந்து கற்று தனித்திறன் மிக்கவர்களாக உருவாகும் வகையிலும், மாணவர்களிடம் எதிர்நோக்கப்படும் கற்றல் விளைவுகளை அடையும் வகையிலும் இப்பாடநூல்கள் வடிவமைக்கப்பட்டுள்ளன.

குழந்தைமைய கற்றல் அணுகுமுறையை ஊக்குவிக்கும் வகையில் குழந்தைகள் மிகவும் விரும்பும் கதைகள், பாடல்கள், கற்றல் செயல்பாடுகள் மூலம் கற்கும் வகையிலும், மாணவர்களின் கற்றல் திறனை மேம்படுத்தும் வகையிலும் பாடநூல்கள் வடிவமைக்கப்பட்டுள்ளன.

பாட நூல்கள் தயாரிப்பு

மேலும், மாணவர்களது உடல் இயக்க திறன்கள் (Motor skills), சமூக மனவெழுச்சித் திறன்கள், விழுமியங்கள், வாழ்க்கை திறன்களை உள்ளடக்கிய பாடப்பொருட்களோடு அழகிய வண்ண வடிவமைப்புடன் இப்பாட நூல்கள் தயாரிக்கப்பட்டுள்ளன.

பள்ளி திறக்கப்படும் நாளன்று, அரசு மற்றும் அரசு உதவிபெறும் பள்ளிகளில் 1 முதல் 12 ஆம் வகுப்பு பயின்று வரும் அனைத்து மாணவர்களுக்கும் வழங்கும் வகையில், தேவையான பாடநூல்கள் தமிழ்நாடு பாடநூல் மற்றும் கல்வியியல் கழகம் மூலம் அச்சிடப்பட்டு மாவட்டங்களுக்கு அனுப்பப்பட்டு தயார்நிலையில் வழங்க உரிய நடவடிக்கையை மேற்கொள்ள அமைச்சர் அறிவுறுத்தினார்.

 

ஜூன் 1 முதல் 3 வரை பயிற்சி

இந்த கல்வியாண்டில் புதிய பாட புத்தகங்கள் அறிமுகப்படுத்தும் நிலையில், 1 முதல் 3 ஆம் வகுப்பு வரை கற்பிக்கும் ஆசிரியர்களுக்கு புதிய பாடநூல் மற்றும் கற்பித்தல் நுட்பங்கள் சார்ந்த பயிற்சி 01.06.2026 முதல் 03.06.2026 வரை நடைபெறும் எனவும் அமைச்சர் ராஜ் மோகன் தெரிவித்துள்ளார்.

இதையும் படிக்க

CM Vijay: 10ஆம் வகுப்பு தேர்வு முடிவு, பள்ளிகள் திறப்பு எப்போது? முதல்வர் விஜய் ஆலோசனை