நீட் அல்லாத இளநிலை படிப்புகள்: புதுச்சேரியில் இன்று முதல் ஆன்லைனில் விண்ணப்பிக்கலாம்!

புதுச்சேரி அரசின் சென்டாக் (CENTAC) வாயிலாக நடத்தப்படும் இந்த சேர்க்கை செயல்முறைக்கான தகவல் கையேட்டை (Prospectus) முதலமைச்சர் வெளியிட்டார்.

புதுச்சேரியில் இளநிலை படிப்புகள் இன்று முதல் ஆன்லைனில் விண்ணப்பிக்கலாம்

Source : whatsapp

புதுச்சேரி : புதுச்சேரி அரசின் சென்டாக் (CENTAC) வாயிலாக நடத்தப்படும் இந்த சேர்க்கை செயல்முறைக்கான தகவல் கையேட்டை (Prospectus) முதலமைச்சர் வெளியிட்டார்.

புதுச்சேரியில் 2026-2027ஆம் கல்வியாண்டிற்கான நீட் (NEET) அல்லாத இளநிலை படிப்புகளுக்கான மாணவர் சேர்க்கையை முதலமைச்சர் ரங்கசாமி வியாழக்கிழமை முறைப்படி தொடங்கி வைத்தார். மொத்தம் 10,810 இடங்களுக்கான இந்தச் சேர்க்கை செயல்முறைக்கு, தகுதியுள்ள மாணவர்கள் நேற்று (மே 14) மாலை 4 மணி முதல் மே 29-ஆம் தேதி மாலை 5 மணி வரை சென்டாக் இணையதளத்தில் ஆன்லைன் மூலம் விண்ணப்பிக்கலாம் என அறிவிக்கப்பட்டுள்ளது.

புதுச்சேரி சென்டாக் (CENTAC) நிர்வாகம் வெளியிட்டுள்ள விளக்கக் குறிப்பேட்டின்படி, இளநிலை தொழில்முறை படிப்புகள், கலை, அறிவியல், வணிகவியல் மற்றும் நுண்கலை படிப்புகளுக்கான மாணவர் சேர்க்கை இன்று (மே 15) தொடங்குகிறது. இதற்கான தகவல் கையேட்டை முதலமைச்சர் ரங்கசாமி நேற்று வெளியிட்டார். இந்நிகழ்ச்சியில் வளர்ச்சித் துறை ஆணையர் கிருஷ்ணமோகன் உப்பு மற்றும் கல்வித்துறைச் செயலாளர் முகமது ஹாசன் அபித் உள்ளிட்ட உயர் அதிகாரிகள் பங்கேற்றனர்.

படிப்புகள் மற்றும் இடங்கள் ஒதுக்கீடு

மாணவர்கள் தங்களின் விருப்பத்திற்கு ஏற்ப பின்வரும் இரண்டு முக்கிய பிரிவுகளின் கீழ் விண்ணப்பிக்கலாம்:

1. நீட்-அல்லாத தொழில்முறை படிப்புகள் (6,490 இடங்கள்)

• பொறியியல் (Engineering)
• செவிலியர் (Nursing)
• துணை சுகாதார அறிவியல் (Para-medical Sciences)
• வேளாண்மை மற்றும் தோட்டக்கலை (Agriculture & Horticulture)
• கால்நடை அறிவியல் (Veterinary Science)

2. கலை, அறிவியல் மற்றும் இதர படிப்புகள் (4,320 இடங்கள்) கலை மற்றும் அறிவியல் (Arts & Science)

• வணிகவியல் (Commerce)
• நுண்கலை (Fine Arts)
• தொழிற்கல்வி (B.Voc)

சிறப்பு படிப்புகள்: ராஷ்டிரிய ரக்ஷா பல்கலைக்கழகத்தில் வழங்கப்படும் பாதுகாப்பு, குற்றவியல் மற்றும் தடய அறிவியல் தொடர்பான படிப்புகள்.

முக்கிய தேதிகள் மற்றும் விண்ணப்பிக்கும் முறை

தகுதியுள்ள மாணவர்கள் ஆன்லைன் மூலம் மட்டுமே விண்ணப்பிக்க முடியும்.

விண்ணப்பப் பதிவு தொடக்கம்: மே 14, 2026 (மாலை 4:00 மணி முதல்)

விண்ணப்பிக்க கடைசித் தேதி: மே 29, 2026 (மாலை 5:00 மணி வரை)

அதிகாரப்பூர்வ இணையதளம்: www.centacpuducherry.in

மாணவர்களுக்கான குறிப்பு

மாணவர்கள் விண்ணப்பிக்கும் முன் சென்டாக் இணையதளத்தில் வெளியிடப்பட்டுள்ள விளக்கக் குறிப்பேட்டை (Information Bulletin) முழுமையாகப் படிக்குமாறு அறிவுறுத்தப்படுகிறார்கள். சான்றிதழ்களைப் பதிவேற்றம் செய்யும்போதும், விருப்பப் பாடங்களைத் தேர்வு செய்யும்போதும் கூடுதல் கவனத்துடன் செயல்படுமாறு கேட்டுக்கொள்ளப்படுகிறார்கள். மேலதிக தகவல்களுக்கு மாணவர்கள் சென்டாக் அலுவலகத்தையோ அல்லது இணையதள உதவி மையத்தையோ தொடர்பு கொள்ளலாம். ஆர்வமுள்ள மாணவர்கள் www.centacpuducherry.in என்ற அதிகாரப்பூர்வ இணையதளத்தில் விரிவான தகவல்களை அறிந்து கொண்டு விண்ணப்பிக்கலாம் எனத் தெரிவிக்கப்பட்டுள்ளது.