Jacto Geo Protest: மாவட்டத் தலைநகரங்களில் ஜாக்டோ ஜியோ போராட்டம்: சென்னையில் ஆசிரியர்கள் கைது!
அரசு ஊழியர்கள் – ஆசிரியர்களுக்கான ஜாக்டோ ஜியோ கூட்டமைப்பு போராட்டம் நடத்தி வரும் நிலையில், சென்னையில் ஆசிரியர்கள் கைது செய்யப்பட்டுள்ளனர்.
தமிழ்நாடு முழுவதும் மாவட்டத் தலைநகரங்களில் அரசு ஊழியர்கள் – ஆசிரியர்களுக்கான ஜாக்டோ ஜியோ கூட்டமைப்பு போராட்டம் நடத்தி வரும் நிலையில், சென்னையில் ஆசிரியர்கள் கைது செய்யப்பட்டுள்ளனர்.
பழைய ஓய்வூதியத்தினை பெறுவது, இழந்த சரண் விடுப்பை மீட்டெடுப்பது, தமிழக அரசில் 3.5 இலட்சத்திற்கு மேலாக உள்ள காலிப் பணியிடங்களை நிரப்புவது உள்ளிட்ட கோரிக்கைகளை வலியுறுத்தி ஜாக்டோ ஜியோ சார்பாக தமிழகத்தில் உள்ள ஆசிரியர்கள், அரசு ஊழியர்கள் சார்பில் இன்று (30.01.2024) அனைத்து மாவட்ட தலைநகரங்களில் மறியல் நடைபெற்றது. சென்னையில் இந்த மறியலானது DPI வளாகத்தில் காலை 10 மணி தொடங்கி நடைபெற இருந்தது. இந்த நிலையில், டிபிஐ வளாகத்தில் போராட்டத்தில் ஈடுபட முயன்ற ஆசிரியர்கள் கைது செய்யப்பட்டனர்.
2017 முதல் பொதுக் கோரிக்கைகளுக்காக அரசு ஊழியர்கள்- ஆசிரியர்களுக்கான ஜாக்டோ ஜியோ கூட்டமைப்பு போராடி வருகிறது.
என்னென்ன கோரிக்கைகள்?
* 1.4.2003க்குப் பிறகு அரசுப்பணியில் சேர்ந்தோருக்கு தற்போது நடைமுறைப்படுத்தப்பட்டு வரும் பங்களிப்புடன் கூடிய ஓய்வூதியத் திட்டத்தினைக் கைவிட்டு, பழைய ஓய்வூதியத் திட்டத்தினையே அமல்படுத்த வேண்டும்.
* காலவரையின்றி முடக்கி வைக்கப்பட்டுள்ள சரண்விடுப்பு ஒப்படைப்பு, உயர் கல்விக்கான ஊக்க ஊதிய உயர்வு ஆகியவற்றை உடனடியாக வழங்கிட வேண்டும்.
* இடைநிலை ஆசிரியர்களுக்கு, உயர்நிலைப்பள்ளி மற்றும் மேல்நிலைப்பள்ளி தலைமை ஆசிரியர்களுக்கு, உடற்கல்வி இயக்குநர் மற்றும் உடற்கல்வி ஆசிரியர்களுக்கு ஒன்றிய அரசுக்கு இணையான ஊதியம் வழங்கப்படாமல் இழைக்கப்பட்டு வரும் அநீதி களையப்பட வேண்டும்.
* முதுநிலை ஆசிரியர்கள், அனைத்து ஆசிரியர்கள், அரசு ஊழியர்கள், அரசுப் பணியாளர்கள், கண்காணிப்பாளர்கள்தலைமைச் செயலகம் உள்ளிட்ட அரசு அலுவலர்கள், களப்பணியாளர்கள், பல்வேறு துறைகளில் உள்ள
* தொழில்நுட்ப ஊழியர்கள், ஊர்தி ஓட்டுநர்கள் ஆகியோருக்கான ஊதிய முரண்பாட்டினைக் களைய வேண்டும்.
* கல்லூரி பேராசிரியர்களுக்கான நிலுவையிலுள்ள பணிமேம்பாடு ஊக்க ஊதிய உயர்வு உடனடியாக வழங்கிட வேண்டும். உயர்நிலை மற்றும் மேல்நிலைப் பள்ளிகளில் பணிபுரியும் இடைநிலை ஆசிரியர்களை பட்டதாரி ஆசிரியர்களாக உயர்த்த வேண்டும்.
* சிறப்பு காலமுறை ஊதியம் பெற்றுவரும் சத்துணவு, அங்கன்வாடி வருவாய் கிராம உதவியாளர்கள், ஊராட்சி செயலாளர்கள், ஊர்ப்புற நூலகர்கள், கல்வித்துறையில் பணியாற்றும் துப்புரவுப் பணியாளர்கள், தொகுப்பூதியத்தில் பணியாற்றும் எம்ஆர்பி செவிலியர்கள், சிறப்பு ஆசிரியர்கள், பல்நோக்கு மருத்துவமனைப் பணியாளர்கள் ஆகியோருக்கு வரையறுக்கப்பட்ட ஊதியம் வழங்கிட வேண்டும். மேலும் ஒருங்கிணைந்த பள்ளிக் கல்வித்துறையில் பணியாற்றும் பணியாளர்கள், ஆசிரியர்கள் மற்றும் பகுதிநேர ஆசிரியர்கள் பணி நிரந்தரம் செய்யப்பட வேண்டும்.
* அரசின் பல்வேறு துறைகளில் 3௦ விழுக்காட்டிற்கு மேலாக காலியாக உள்ள பணியிடங்களை நிரப்பிடுவதற்கான நடவடிக்கைகளை உடனடியாக மேற்கொள்ள வேண்டும்.
* 21 மாத ஊதிய மாற்ற நிலுவைத் தொகை அரசு ஊழியர்கள்-ஆசிரியர்கள் அரசுப் பணியாளர்கள் ஆகியோருக்கு மறுக்கப்பட்டுள்ளதை உடனடியாக வழங்கிட வேண்டும்.
* 2002 முதல் 2004 வரை தொகுப்பூதியத்தில் நியமனம் செய்யப்பட்ட ஆசிரியர்கள், அரசு ஊழியர்கள் மற்றும் அரசுப் பணியாளர்களின் பணிக் காலத்தினை அவர்கள் பணியில் சேர்ந்த நாள் முதல் பணிவரனமுறைப்படுத்தி ஊதியம் வழங்க வேண்டும்.
* சாலைப்பணியர்களின் 41 மாத பணி நீக்க காலத்தினை முறைப்படுத்த வேண்டும்.
* உள்ளாட்சி அமைப்புகளிலும் பல்வேறு அரசுத்துறைகளிலும் தனியார் முகமை மூலம் பணியாளர்களை நியமனம் செய்வதை உடனடியாக தடை செய்திட வேண்டும்.
இவ்வாறு ஜாக்டோ ஜியோ கோரிக்கைகளை விடுத்துள்ளது.
இந்த நிலையில் போராட்டம் குறித்து ஜாக்டோ ஜியோ கூறும்போது, ‘’திமுக அரசு பதவியேற்று 30 மாதங்களுக்கு மேலான சூழ்நிலையில், ஆசிரியர்கள் அரசு ஊழியர்கள் தொடர்பான தேர்தல் வாக்குறுதிகளை 100 சதவிகிதம் நிறைவேற்றாதது மட்டுமல்லாமல், காலங்காலமாக பெற்று வந்த சரண் விடுப்பை காலவரையின்றி நிறுத்தி வைத்தும் உள்ளது.
நாம் ஒன்றிணைந்து நமது ஒற்றுமையினை அரசுக்கு உணர்த்த வேண்டிய தருணம் வந்துவிட்டது. நமது ஒற்றுமையின் மூலமாகவே வாழ்வாதார கோரிக்கைகளையும் போராடிப் பெற்று தற்போது ஆளுகின்ற அரசால் மறுக்கப்பட்டுள்ள உரிமைகளை மீட்க முடியும்’’ என்று தெரிவித்தனர்.
இந்த நிலையில், தமிழ்நாடு முழுவதும் மாவட்டத் தலைநகரங்களில் அரசு ஊழியர்கள் – ஆசிரியர்களுக்கான ஜாக்டோ ஜியோ கூட்டமைப்பு போராட்டம் நடத்தி வரும் நிலையில், சென்னையில் ஆசிரியர்கள் கைது செய்யப்பட்டுள்ளனர்.
தலைப்பு செய்திகள்
ட்ரெண்டிங் செய்திகள்
