Crime: சேலத்தில் பரபரப்பு... பிரபல ரவுடி ஓடஓட விரட்டி வெட்டிக்கொலை

பிரபல ரவுடி வெட்டி கொலை செய்யப்பட்ட சம்பவம் அந்த பகுதியில் பெரும் பரபரப்பை ஏற்படுத்தி உள்ளது.

காட்டூர் அனந்த்

சேலம் மாவட்டம் வீராணம் அருகே உள்ள வலசையூர் பகுதியை சேர்ந்தவர் காட்டூர் ஆனந்தன் (35). பிரபல ரவுடியான இவர் மீது கொலை வழக்கு உட்பட 10 க்கும் மேற்பட்ட வழக்குகள் பல்வேறு காவல் நிலையங்களில் பதிவாகி உள்ளன. காட்டூர் ஆனந்த் நேற்று இரவு வீட்டில் இருந்தவர்களிடம் வெள்ளியம்பட்டியில் உள்ள தனது நண்பரை பார்த்துவிட்டு வருவதாக கூறிவிட்டு இருசக்கர வாகனத்தில் சென்றார். அவருடன் மற்றொருவரும் சென்றதாக கூறப்படுகிறது. காட்டூர் ஆனந்த் குள்ளம்பட்டி பக்கமுள்ள காட்டூர் சுடுகாடு அருகே சென்று கொண்டிருந்தார். அப்போது 3 கார்களில் வந்த மர்ம நபர்கள் அவருடைய இருசக்கர வாகனம் வழிமறித்தனர். பின்னர் அந்த மர்ம கும்பல் காரில் இருந்து இறங்கி காட்டூர் ஆனந்தை அரிவாள், கத்தி உள்ளிட்ட ஆயுதங்களால் ஓட ஓட விரட்டி சரமாரியாக வெட்டினர். அவருடன் வந்தவர் தப்பி ஓடிவிட்டதாக கூறப்படுகிறது.

இதில் ரத்தவெள்ளத்தில் அங்கு சரிந்து விழுந்த காட்டூர் ஆனந்தன் சம்பவ இடத்திலேயே துடித்துடித்து பரிதாபமாக இறந்தார். இதையடுத்து அங்கிருந்து மர்ம கும்பல் கார்களில் தப்பி சென்றது. இதுகுறித்து தகவல் கிடைத்ததும் காரிப்பட்டி போலீசார் அங்கு விரைந்து சென்றனர். பின்னர் இந்த கொலை தொடர்பாக காரிப்பட்டி காவல்துறையினர் தீவிர விசாரணை நடத்தி வருகின்றனர். இதையடுத்து உடலை பிரேத பரிசோதனைக்காக சேலம் அரசு மோகன் குமாரமங்கலம் மருத்துவமனைக்கு அனுப்பி வைத்தனர். இதற்கிடையில் இதுகுறித்து தகவல் அறிந்ததும் காட்டூர் ஆனந்தனின் உறவினர்கள் அங்கு விரைந்து வந்து அவருடைய உடலை பார்த்து கதறி அழுதனர். மேலும் சேலம் அரசு மோகன் குமாரமங்கலம் மருத்துவமனையில் ஆயிரத்திற்கும் மேற்பட்டோர் காட்டூர் ஆனந்தின் உடலை பார்க்க வந்துள்ளனர். இதனால் அரசு மருத்துவமனையில் நூற்றுக்கும் மேற்பட்ட காவல்துறையினர் பாதுகாப்பு பணியில் ஈடுபட்டு வருகின்றனர். சேலத்தில் இரவில் பிரபல ரவுடி வெட்டி கொலை செய்யப்பட்ட சம்பவம் அந்த பகுதியில் பெரும் பரபரப்பை ஏற்படுத்தி உள்ளது.