Skoda Kylaq Rivals: ரூ.9 லட்சம் பட்ஜெட்டில் வரப்போகும் 3 SUV-விக்கள் - இல்லாத வசதிகளே இல்லை, கைலாக்கிற்கு சவால்
Skoda Kylaq Rivals: இந்திய ஆட்டோமொபைல் சந்தையில் 9 லட்சம் ரூபாய் பட்ஜெட்டில் ஸ்கோடா கைலாக்கிற்கு போட்டியாக அடுத்தடுத்து 3 எஸ்யுவிக்கள் சந்தைப்படுத்தப்பட உள்ளன.
Skoda Kylaq Rivals: ஸ்கோடா கைலாக்கிற்கு போட்டியாக 9 லட்சம் ரூபாய் பட்ஜெட்டில் அறிமுகமாக உள்ள 3 எஸ்யுவிக்களின் விவரங்கள் கீழே பட்டியலிடப்பட்டுள்ளன.
ரூ.9 லட்சம் பட்ஜெட்டில் எஸ்யுவிக்கள்
கடந்த ஆண்டு அமல்படுத்தப்பட்ட ஜிஎஸ்டி சீர்திருத்தத்தை தொடர்ந்து சப்-காம்பேக்ட் எஸ்யுவிக்க்ள் வலுவான வரி சலுகைகளை பெற்றன. அதன் தொடர்ச்சியாக இவற்றின் விலையை கார் உற்பத்தி நிறுவனங்கள் கணிசமாக குறைத்தன. இதனால், இந்த பிரிவை சேர்ந்த கார்களுக்கான தேவை என்பது தீவிரமாக உயர்ந்துள்ளது. அந்த சூழலை தங்களுக்கு சாதகமாக பயன்படுத்திக் கொள்ள டாடா, மஹிந்த்ரா மற்றும் ரெனால்ட் போன்ற ப்ராண்ட்கள், சப்-4 மீட்டர் காம்பேக்ட் எஸ்யுவி பிரிவில் புதிய மாடல்களை சந்தைப்படுத்த தயாராகி வருகின்றன. அந்த வகையில் 9 லட்சம் ரூபாய் பட்ஜெட்டில் அடுத்தடுத்து அறிமுகமாக உள்ள கார்களின் விவரங்கள் கீழே பட்டியலிடப்பட்டுள்ளன.
அடுத்தடுத்து வரப்போகும் சப்-காம்பேக்ட் எஸ்யுவிக்கள்:
1. மஹிந்த்ரா விஷன் எஸ்
மஹிந்த்ரா நிறுவனமானது தனது விஷன் - S அடிப்படையிலான எஸ்யுவியை இந்திய சந்தையில் தீவிரமாக பரிசோதனைக்கு உட்படுத்தியுள்ளது. உள்ளூர் சந்தையில் 2027ம் ஆண்டின் பிற்பாதியில் விற்பனைக்கு கொண்டுவருவதோடு, ப்ராண்டின் XUV 3X0 மாடலுடன் நிலைநிறுத்த திட்டமிட்டுள்ளதாம். இது பாக்ஸி, கூர்மையான டிசைன், மஸ்குலர் பேன்னட் உடன் காட்சியளிக்கிறது. அதன் தோற்றம் ஒரு வகையில் ஸ்கார்ப்பியோ குடும்பத்தை நினைவுபடுத்தும் வகையில் உள்ளது. ப்ராண்டின் புதிய NU-IQ ஆர்கிடெக்ட்சர் அடிப்படையில் உருவாகும் முதல் எஸ்யுவி ஆக இது திகழ உள்ளது. இது பெட்ரோல், டீசல், ஹைப்ரிட் மற்றும் மின்சாரம் என பலதரப்பட்ட பவர்ட்ரெயின் ஆப்ஷன்களை இடம்பெற உதவுமாம்.
அதன்படி, இந்த மாடல் பல பவர்ட்ரெய்ன் ஆப்ஷன்களை கொண்டு சந்தைப்படுத்தப்படும் என எதிர்பார்க்கப்படுகிறது. XUV 3XO-வில் உள்ள 1.2-லிட்டர் டர்போ பெட்ரோல் இன்ஜின் மற்றும் 1.5-லிட்டர் டீசல் இன்ஜினை பயன்படுத்தப்படலாம். இது ஒரு புதிய ஹைப்ரிட் பவர்டிரெய்னையும் பெறக்கூடும். அதன் மோனோகோக் ப்ளாட்ஃபார்மைக் கருத்தில் கொண்டு, இந்த மாடல் AWD அமைப்பை வழங்கும் என்று கூறப்படுகிறது. விஷன் எஸ் மாடலை அடிப்படையாகக் கொண்ட இந்த எஸ்யூவியின் உட்புறம், செங்குத்தாக, உயரமாகப் பொருத்தப்பட்ட டாஷ்போர்டு, ஒரு பெரிய சென்ட்ரல் டச்ஸ்கிரீன் மற்றும் எதிர்கால பாணியிலான 'பிஇ'-ஸ்டைல் ஸ்டீயரிங் வீல் ஆகியவற்றை கொண்டிருக்கும். இதோடு வெண்டிலேடட் வசதியுள்ள முன் இருக்கைகள், லெவல்-2 ADAS, 6 ஏர்பேக்குகள், பனோரமிக் க்ளாஸ் ரூஃப், பவர்ட் முன் இருக்கைகள் போன்ற பல அம்சங்கள் இந்த மாடலில் இடம்பெறும் என எதிர்பார்க்கப்படுகிறது. சந்தைப்படுத்தலின் போது இதன் விலை ரூ.9 லட்சத்தில் தொடங்கி ரூ.18 லட்சம் வரை (எக்ஸ் - ஷோரூம்) நீளும் என கூறப்படுகிறது.
2. புதிய தலைமுறை டாடா நெக்ஸான்
டாடா மோட்டார்ஸ் ஏற்கனவே அறிவித்தபடி புதிய தலைமுறை நெக்ஸான் 2027ம் ஆண்டின் மத்தியில் விற்பனைக்கு வரவுள்ளது . தற்போதைய எடிஷனே பல சிறப்பம்சங்கள் மற்றும் பல்வேறு பவர்ட்ரெய்ன் ஆப்ஷன்களை கொண்டு ஒரு முழுமையான எஸ்யுவி ஆக பயனாளர்களால் கொண்டாடப்படுகிறது. புதிய தலைமுறையில் நெக்ஸான் ஒரு தனித்துவமான வடிவமைப்பு, புதிய வண்ண ஆப்ஷன்கள் மற்றும் புதிய அம்சங்களுடன் வெளிவரக்கூடும். இருப்பினும், ஏற்கெனவே கணிசமான அம்சங்களை அது வழங்குவதால், புதிதாக என்னென்ன சேர்க்கப்படலாம் என்பதை துல்லியமாக கணக்கிட முடியவில்லை.
ஹைப்ரிட் தொழில்நுட்பத்தை அறிமுகப்படுத்துவது குறித்து டாடா மோட்டார்ஸ் இன்னும் கருத்து தெரிவிக்கவில்லை. எனவே, புதிய தலைமுறை நெக்ஸானில் அது இடம்பெறுவதற்கான சாத்தியம் குறைவாகவே உள்ளது. நெக்ஸான் ஏற்கனவே டர்போ சிஎன்ஜி இன்ஜினை கொண்டிருந்தாலும், விற்பனையை அதிகரிக்க விரும்பினால், ஆல்ட்ரோஸில் உள்ள 1.2-லிட்டர் நேட்சுரல் ஆஸ்பிரேடட் பெட்ரோல் இன்ஜினை, சிஎன்ஜி மற்றும் ஆட்டோமேடிக் கியர்பாக்ஸுடன் இணைத்து நெக்ஸானில் வழங்கலாம். சந்தைப்படுத்தலின் போது இதன் விலை ரூ.9.5 லட்சத்தில் தொடங்கி ரூ.18 லட்சம் வரை (எக்ஸ் - ஷோரூம்) நீளும் என கூறப்படுகிறது.
3. ரெனல்ட் ப்ரிட்ஜர்
ரெனால்ட் நிறுவனம் pரிட்ஜர் என்ற புதிய சப்-காம்பாக்ட் எஸ்யுவியை உருவாக்கி வருகிறது. இந்த பிர்வில் ப்ராண்ட் சார்பில் ஏற்கனவே உள்ள கைகர் உடன் புதிய மாடலை இணைக்க உள்ளது. வெளியீட்டு தேதி தொடர்பான அதிகாரப்பூர்வ அறிவிப்பு இல்லாவிட்டாலும், 2026ம் ஆண்டின் இரண்டாம் பாதியில் அறிமுகமாகும் என்று எதிர்பார்க்கப்படுகிறது. இதன் மூலம் மைலேஜை விரும்பும் பயனர்களை ரெனால்ட் குறிவைக்கிறது. வெளியாகியுள்ள தகவல்களின்படி, ப்ரிட்ஜர், சிறந்த எரிபொருள் பயன்பாட்டை வழங்குவதில் கவனம் செலுத்தி, 1.2-லிட்டர் பெட்ரோல் ஹைப்ரிட் இன்ஜின் மூலம் இயக்கப்படலாம். டஸ்டர் மாடலில் இந்த இன்ஜினை சோதித்தபோது லிட்டருக்கு 30 கிலோ மீட்டர் மைலேஜ் அளித்தது. டஸ்டர் நான்கு மீட்டருக்கும் அதிகமான நீளம் கொண்ட காராக இருக்கும் நிலையில், ப்ரிட்ஜர் 4 மீட்டருக்கும் குறைவான நீளம் கொண்ட காராக உள்ளது. எனவே, இது சிறந்த எரிபொருள் சிக்கனத்தை வழங்கக்கூடும். இந்தியாவில் ஆல்-வீல் டிரைவ் ஆப்ஷனஒஇ கொண்ட லைஃப்ஸ்டைல் சப்-காம்பாக்ட் எஸ்யூவியாகவும் இருக்கும் என எதிர்பார்க்கப்படுகிறது.
ரெனால்ட் ப்ரிட்ஜர், டஸ்டரின் சிறிய எடிஷனாக இருக்கும் என எதிர்பார்க்கப்படுகிறது. இருப்பினும், இது அதன் பெரிய மாடலில் இருந்து எடுக்கப்பட்ட பல அம்சங்களைக் கொண்டிருக்கும். ரெனால்ட் நிறுவனம் டூயல் ஸ்க்ரீன் செட்-அப் , பனோரமிக் சன்ரூஃப், பவர் ட்ரைவர் இருக்கை, காற்றோட்ட வசதியுள்ள முன் இருக்கைகள், வயர்லெஸ் சார்ஜிங் பேட், 360 டிகிரி கேமரா மற்றும் பல வழங்கப்படலாம். உள்ளூர் சந்தையில் ரெனால்ட் ப்ரிட்ஜர், டாடா நெக்ஸான், மஹிந்திரா XUV 3XO, ஸ்கோடா கைலாக், ஹுண்டாய் வென்யு, மாருதி ப்ரேஸ்ஸா மற்றும் பிற சப்-காம்பாக்ட் எஸ்யுவி கார்களுக்குப் போட்டியாக அமையும். இதன் தொடக்க விலை ரூ.8 லட்சத்தில் தொடங்கி ரூ.17 லட்சம் வரை நீளக்கூடுமாம்.
தலைப்பு செய்திகள்
ட்ரெண்டிங் செய்திகள்
