Rolls Royce electric SUV: மிருகத்தை EV மோடில் இறக்கும் ப்ரீமியம் கார் ப்ராண்ட்.. 530KM ரேஞ்ச், மூச்சு முட்டும் விலை..!

Rolls Royce electric SUV: இந்தியா உள்ளிட்ட சர்வதேச சந்தையில் ரோல்ஸ் ராய்ஸ் நிறுவனம் தனது முதல், மின்சார எஸ்யுவியை 2027ம் ஆண்டு விற்பனைக்கு கொண்டு வரும் என தகவல் வெளியாகியுள்ளது.

ரோல்ஸ் ராய்ஸ் மின்சார எஸ்யுவியின் மாதிரி படம்

Source : social media/x

Rolls Royce electric SUV: ரோல்ஸ் ராய்ஸ் நிறுவனத்தின் முதல் மின்சார எஸ்யுவி, 530 கிலோ மீட்டர் ரேஞ்ச் உடன், சுமார் 12 கோடி மதிப்பில் சந்தைப்படுத்தப்படலாமென தெரிகிறது.

ரோல்ஸ் ராய்ஸின் முதல் மின்சார எஸ்யுவி:

ப்ரீமியம் கார் ப்ராண்ட்களில் முக்கியமானதாக விளங்கும் ரோல்ஸ் ராய்ஸ் நிறுவனம், தனது புதிய முழுமையான மின்சார எஸ்யுவியை அடுத்த சில மாதங்களில் அறிமுகப்படுத்த தயாராகி வருகிறது.  சர்வதேச சந்தையில் 2027ம் ஆண்டில் விற்பனைக்கு கொண்டுவரப்பட உள்ளதாம். இங்கிலாந்து நிறுவனத்தின் இரண்டாவது மின்சார கார் மற்றும் இரண்டாவது மின்சார எஸ்யுவி ஆனது, 2026ம் ஆண்டு அறிமுகப்படுத்தப்பட உள்ள பெண்ட்லி நிறுவனத்தின் முதல் மின்சார கார் உடன் போட்டியிட உள்ளது. முன்னதாக ரோல்ஸ் ராய்ஸ் நிறுவனத்தின் இந்த முதல் எஸ்யுவி ஆனது கடந்த ஆண்டே அறிமுகப்படுத்தப்பட திட்டமிடப்பட்டு இருந்து. ஆனால், பல்வேறு காரணங்களால் அது தாமதமானது குறிப்பிடத்தக்கது. 

ரோல்ஸ் ராய்ஸ் மின்சார எஸ்யுவி டிசைன்:

ரோல்ஸ் ராய்ஸ் நிறுவனத்தின் முதல் மின்சார எஸ்யுவியின் சோதனை கார் மாடலானது அண்மையில் ஸ்வீடனில் அடையாளம் காணப்பட்டது. கல்லினனை போன்றே கருப்பு நிறத்திலும், கூர்மையாக இருப்பதையும் சோதனையின்போது எடுக்கப்பட்ட புகைப்படங்கள் உறுதி செய்துள்ளன. ஆனாலும், தனித்துவமான ஸ்டைலிங் எலிமெண்ட்களை பெற்றுள்ளது. ரோல்ஸ் ராய்ஸ் ஸ்பெக்டரை போன்றே, மின்சார எஸ்யுவி ஆனது முன்புறத்தில் ஸ்ப்லிட் முகப்பு விளக்கு அமைப்பு, பகல் நேரங்களில் ஒளிரும் விளக்குகள், பம்பரில் பெரிய ஏர் டேம் ஆகியவை இடம்பெற்றுள்ளன. ரோல்ஸ் ராய்ஸ் கார்களின் அடையாளமாக கருதப்படும் வழக்கமான பேந்தியோன் க்ரில் டிசைனும் இந்த மின்சார எஸ்யுவியில் இடம்பெறவில்லை. 

பக்கவாட்டு தோற்றமானது எதிர்பார்த்ததை போன்றே பாக்ஸி வடிவில் உள்ளது. குறைந்த க்ரவுண்ட் க்ளியரன்ஸானது காரின் அழகை கூட்டுகிறது. ரூஃப் ரெயில்ஸும் காணப்பட்டுள்ளது. பின்புறத்தில் லேசாக வளைக்கப்பட்ட D பில்லர் இருக்க, வெர்டிகலி ஒரியண்டட்  எல்இடி டெயில் லைட்கள் மற்றும் ஒருங்கிணைந்த ஸ்டாப் லேம்பிங் உடன் கூடிய ரூஃப் ஸ்பாய்லரும் உள்ளது.

ரோல்ஸ் ராய்ஸ் மின்சார எஸ்யுவி - இன்ஜின், ரேஞ்ச் விவரம்

தற்போது விற்பனையில் உள்ள மற்ற ரோல்ஸ் ராய்ஸ் கார் மாடல்களுக்கு பயன்படுத்தப்பட்ட, அதே ”ஆர்கிடெக்ட்சர் ஆஃப் லக்சரி” ப்ளாட்ஃபார்ம் தான் இந்த எஸ்யுவிக்கும் பயன்படுத்தப்படுகிறது. பவர்ட்ரெயின் தொடர்பான விவரங்கள் இன்னும் இறுதி செய்யப்படவில்லை. ஆனால், பிஎம்டபள்யு நிறுவனத்தின் புதிய மின்சார வாகன தொழில்நுட்பத்தை ரோல்ஸ் ராய்ஸ் பயன்படுத்தலாம் என கூறப்படுகிறது.  iX3 எஸ்யுவி கார் மாடல் மூலம் தொடங்க உள்ள ப்ராண்டின் புதிய நியூ க்ளாசே மாடல் லைன் மூலம் இந்த தொழில்நுட்பமானது அறிமுகமாக உள்ளது குறிப்பிடத்தக்கது.

அதேநேரம், ஆர்கிடெக்ட்சர் 9 ஆண்டுகள் பழையமையானது என்பதால் பிஎம்டபள்யு தொழில்நுட்பம் ரோல்ஸ் ராய்ஸ் உடன் இணங்குவதில் சிக்கல் ஏற்படலாம்.அதேநேரம், ஸ்பெக்டர் மின்சார காரில் இருந்த அமைப்பை அப்படியே புதிய எஸ்யுவியில் பயன்படுத்தும் வாய்ப்பும் ரோல்ஸ் ராய்ஸுக்கு உள்ளது. 102KWh டூயல் மோட்டார் செட்-அப்பானது 659hp மற்றும் 1,075Nm ஆற்றலை உற்பத்தி செய்கிறது. இதனை முழுமையாக சார்ஜ் செய்தால் 530 கிலோ மீட்டர் தூரம் வரை ரேஞ்ச் அளிக்கும் என கூறப்படுகிறது.

ரோல்ஸ் ராய்ஸ் மின்சார எஸ்யுவி - விலை

ரோல்ஸ் ராய்ஸ் ஸ்பெக்டர் மாடலை தொடர்ந்து, தனது மின்சாரமயமாக்கலை நோக்கி நிறுவனம் வேகமாக நகர தொடங்கியுள்ளது. கல்லினன் எஸ்யுவியின் இன்ஜின் எடிஷனின் விலையே 10.50 கோடியில் தொடங்கி ரூ.12.25 கோடி வரை நீள்கிறது. அதன் தாக்கத்தை கொண்ட புதிய மின்சார எஸ்யுவியின் விலையும் சுமார் ரு.12.5 கோடி வரை நிர்ணயிக்கப்படலாமென கூறப்படுகிறது. மின்சார எஸ்பெக்டரின் விலை ரூ.7.5 கோடி என்பது குறிப்பிடத்தக்கது.