Bajaj Pulsar: பஜாஜ் பல்சர் புதிய இன்ஜினில் அறிமுகம்; என்னென்ன அம்சங்கள்? யாருக்கெல்லாம் போட்டி?

Bajaj Pulsar NS 400Z: பஜாஜ் பல்சர் NS400Z இந்தியாவில் அறிமுகம்: புதிய மாடலின் பவர் மற்றும் சிறப்பம்சங்களை தெரிந்து கொள்ளுங்கள்.

பஜாஜ் பல்சர்

Source : சிறப்பு ஏற்பாடு

பஜாஜ் ஆட்டோ நிறுவனம் தனது மிகவும் சக்திவாய்ந்த மற்றும் பெரிய பல்சர் மாடலான பஜாஜ் பல்சர் என்.எஸ். 400 இசட் (Bajaj Pulsar NS400Z) பைக்கை இந்தியாவில் அதிகாரப்பூர்வமாக அறிமுகப்படுத்தி உள்ளது.

நீண்ட நாட்களாக வாடிக்கையாளர்கள் மத்தியில் பெரும் எதிர்பார்ப்பை ஏற்படுத்தியிருந்த இந்த பைக்கின் அறிமுக விலை ரூ.1.85 லட்சம் (எக்ஸ்- ஷோரூம்) என எதிர்பார்க்கப்படுகிறது. முன்னதாக 400 சிசி பைக்குகளின் விலை அதிக ஜிஎஸ்டி உடன் இருந்த காரணத்தால், 350 சிசி பைக்குகள் அறிமுகம் செய்யப்பட்டுள்ளன.

இன்ஜின், செயல்திறன்

புதிய பல்சர் NS400Z பைக்கில் 373cc திறன் கொண்ட சிங்கிள் சிலிண்டர், லிக்விட் கூல்டு இன்ஜின் பொருத்தப்பட்டுள்ளது. இந்த இன்ஜின் அதிகபட்சமாக 40 PS பவரையும், 35 Nm டார்க் திறனையும் வெளிப்படுத்தும் வகையில் வடிவமைக்கப்பட்டுள்ளது. இதனுடன் 6 ஸ்பீடு கியர்பாக்ஸ் மற்றும் ஸ்லிப்-அண்ட் அசிஸ்ட் கிளட்ச் வசதியும் இணைக்கப்பட்டுள்ளது.

முக்கிய சிறப்பம்சங்கள்

இந்த புதிய மாடலில் ரைடு பை வயர் தொழில்நுட்பம் மற்றும் ப்ளூடூத் கனெக்டிவிட்டி வசதியுடன் கூடிய புதிய கலர் டிஜிட்டல் இன்ஸ்ட்ரூமென்ட் கிளஸ்டர் வழங்கப்பட்டுள்ளது. இதுதவிர, டர்ன்-பை-டர்ன் நேவிகேஷன், ஸ்மார்ட்போன் இணைப்பு, கால் மற்றும் எஸ்எம்எஸ் அலர்ட் வசதிகளும் உள்ளன. ஓட்டுநரின் தேவைக்கேற்ப ரோட், ரெயின், ஸ்போர்ட் மற்றும் ஆஃப்-ரோடு என 4 விதமான ரைடிங் மோடுகள் இதில் இடம்பெற்றுள்ளன. மேலும், பாதுகாப்பான பயணத்திற்காக ஸ்விட்சபிள் டிராக்‌ஷன் கண்ட்ரோல் வசதியும் தரப்பட்டுள்ளது.

வடிவமைப்பு 

ஸ்போர்ட்டியான தோற்றத்தைக் கொண்ட இந்த பைக்கில் எல்.இ.டி. ப்ரொஜெக்டர் ஹெட்லேம்ப், மின்னல் வடிவிலான எல்.இ.டி. டேடைம் ரன்னிங் லைட்டுகள் மற்றும் மஸ்குலரான பெட்ரோல் டேங்க் டிசைன் ஆகியவை இடம்பெற்றுள்ளன.

போட்டியாளர்கள் யார்?

இந்திய சந்தையில் 350cc முதல் 400cc வரையிலான பிரிவில் மிகவும் குறைவான விலையில் களமிறங்கியுள்ள இந்த பஜாஜ் பல்சர் NS400Z மாடல், ட்ரையம்ப் ஸ்பீடு 400, டிவிஎஸ் அப்பாச்சி ஆர்டிஆர் 310, சுசுகி ஜிக்ஸர் 250 மற்றும் ராயல் என்பீல்டு 350சிசி பைக்குகளுக்கு நேரடி போட்டியாக அமையும் என எதிர்பார்க்கப்படுகிறது.

இதையும் படிக்க

Top 5 electric scooters: பட்ஜெட் விலையில் எலக்ட்ரிக் ஸ்கூட்டர்கள்: டாப் 5 மாடல்கள் இதோ- என்னென்ன வசதிகள்?