IPL LSG Vs SRH: 205 ரன்களை குவித்த லக்னோ சூப்பர் ஜெயன்ட்ஸ் - ப்ளே ஆஃப் வாய்ப்பை பறிக்குமா ஹைதராபாத்.?

IPL 2025 LSG Vs SRH: லக்னோவில் நடைபெற்ற ஐபிஎல் லீக் போட்டியில், ஹைதராபாத்திற்கு எதிராக முதலில் பேட்டிங் செய்த லக்னோ சூப்பர் ஜெயன்ட்ஸ் அணி, 7 விக்கெட்டுகள் இழப்பிற்கு 205 ரன்களை குவித்துள்ளது.

ஹைதராபாத் அணிக்கு 206 ரன்களை இலக்காக நிர்ணயித்த லக்னோ

Source : twitter

லக்னோவில் நடைபெற்ற ஐபிஎல் லீக் போட்டியில், லக்னோ மற்றும் ஹைதராபாத் அணிகள் மோதின. இந்த போட்டியில் முதலில் ஆடிய லக்னோ சூப்பர் ஜெயன்ட்ஸ் அணி, 7 விக்கெட்டுகள் இழப்பிற்கு 205 ரன்களை குவித்துள்ளது.

அதிரடி காட்டிய லக்னோ சூப்பர் ஜெயன்ட்ஸ்

லக்னோவில் இன்று நடைபெற்ற ஐபிஎல் லீக் போட்டியில், லக்னோ சூப்பர் ஜெயன்ட்ஸ் மற்றும் சன் ரைசர்ஸ் ஹைதராபாத் அணிகள் மோதின. இதில் டாஸ் வென்ற ஹைதராபாத் அணி பந்து வீச்சை தேர்வு செய்தது. இதையடுத்து பேட்டிங் செய்ய களமிறங்கிய லக்னோ அணியின் தொடக்க ஆட்டக்காரர்களான மிட்செல் மார்ஷூம், எய்டன் மார்க்ரமும், ஹைதராபாத்தின் பந்துவீச்சை நாலா பக்கமும் சிதறவிட்டனர்.

இந்த இணை தொடக்க விக்கெட்டிற்கு 115 ரன்களை சேர்த்தது. இந்நிலையில், 39 பந்துகளில் 4 சிக்சர்கள் 6 பவுண்டரிகளுடன் 65 ரன்கள் குவித்த மார்ஷ் ஆட்டமிழந்தார். அவரைத் தொடர்ந்து வந்த கேப்டன் ரிஷப் பண்ட் 6 பந்துகளில் 7 ரன்கள் எடுத்திருந்த நிலையில் ஆட்டமிழந்து ஏமாற்றமளித்தார். அவரைத் தொடர்ந்து களமிறங்கிய நிக்கோலஸ் பூரன் அதிரடி ஆட்டத்தை வெளிப்படுத்தினார்.

மறுமுனையில் மார்க்ரம் தொடர்ந்து அதிரடியாக ஆடிவந்த நிலையில், 38 பந்துகளில் 4 சிக்சர்கள் 4 பவுண்டரிகளுடன் 61 ரன்களை எடுத்திருந்த நிலையில், ஹர்ஷல் படேலின் பந்துவீச்சில் போல்டாகி வெளியேறினார். இதன் மூலம், ஹர்ஷல் படேல் தனது 150-வது விக்கெட்டை கைப்பற்றினார்.

மார்க்ரமை தொடர்ந்து களமிறங்கிய ஆயுஷ் பதோனி 3 ரன்களில் ஆட்டமிழந்து வெளியேறினார். அவரைத் தொடர்ந்து அப்துல் சமத் களமிறங்கினார். மறுமுனையில் சிறப்பாக ஆடிவந்த பூரன், கடைசி ஓவரில் ரன் அவுட் ஆனார். அவர் 26 பந்துகளில் 1 சிக்சர் 6 பவுண்டரிகளுடன் 45 ரன்களை எடுத்தார்.

இதைத் தொடர்ந்து களமிறங்கிய ஷர்துல் தாக்கூரும் 4 ரன்கள் எடுத்து ரன் அவுட்டாகி வெளியேறினார். அவரைத் தொடர்ந்து சமதும் போல்டாகி வெளியேறினார். ஆட்டத்தின் கடைசி பந்திற்கு களமிறங்கிய ஆகாஷ் தீப், சிக்சரை பறக்க விட்டார். இதன் மூலம், 20 ஓவர்கள் முடிவில், லக்னோ சூப்பர் ஜெயன்ட்ஸ் அணி, 7 விக்கெட்டுகள் இழப்பிற்கு, 205 ரன்களை குவித்தது.

லக்னோ அணிக்கு ப்ளே ஆஃப் செல்ல ஒரு வாய்ப்பு உள்ள நிலையில், அதனை தட்டிப்பறிக்குமா ஹைதராபாத். பொறுத்திருந்து பார்ப்போம்.