17வது ஐபிஎல் தொடர் கடந்த மார்ச் மாதம் 22ஆம் தேதி தொடங்கி நடைபெற்று வருகின்றது. இதில் கடந்த ஆண்டைப் போல் 10 அணிகள் களமிறங்கி விளையாடி வருகின்றது. இந்நிலையில் வார இறுதி நாளான இன்று இரண்டு போட்டிகள் நடைபெறுகிறது. இதில் இரண்டாவது போட்டியில் லக்னோ சூப்பர் ஜெயண்ட்ஸ் அணியும் முன்னாள் சாம்பியன் குஜராத் டைட்டன்ஸ் அணியும் விளையாடி வருகின்றன.

லக்னோ சூப்பர் ஜெயிண்ட்ஸ் மற்றும் குஜராத் டைட்டன்ஸ் அணியைப் பொறுத்தவரையில் இரு அணிகளும் கடந்த 2022ஆம் ஆண்டு முதல் ஐபிஎல் தொடரில் விளையாடி வருகின்றது. இதில் குஜராத் அணி களமிறங்கிய முதல் ஆண்டே கோப்பையைத் தட்டிச் சென்றது. நடப்பு ஐபிஎல் தொடரில் பெரும்பான்மையான அணிகள் அசுர பலத்துடன் உள்ளன. அவற்றில் லக்னோ சூப்பர் ஜெயிண்ட்ஸ் அணியும் குஜராத் டைட்டன்ஸ் அணியும் இடம்பெற்றுள்ளது.

இந்நிலையில் இன்று அதாவது ஏப்ரல் 7ஆம் தேதி லக்னோ சூப்பர் ஜெயிண்ட்ஸ் அணியும் குஜராத் டைட்டன்ஸ் அணியும் இரவும் 7.30 மணிக்கு லக்னோவில் உள்ள வாஜ்பாய் ஏக்னா மைதானத்தில் மோதுகின்றன. இரு அணிகளும் இதுவரை நான்கு முறை நேருக்கு நேர் மோதியுள்ளது. அதில் நான்கு போட்டிகளிலும் குஜராத் டைட்டன்ஸ் அணியே வெற்றி பெற்றுள்ளது. நடப்பு சீசனில் இரு அணிகளும் மோதும் முதல் போட்டி இது என்பதால் இந்த போட்டி மீது ரசிகர்களுக்கு ஆர்வம் அதிகமாகியுள்ளது.

நேருக்கு நேர்

குஜராத் டைட்டன்ஸ் அணியைப் பொறுத்தவரையில் நான்கு போட்டிகளில் விளையாடி இரண்டில் வெற்றியும் இரண்டில் தோல்வியும் சந்தித்துள்ளது. இதனால் நான்கு புள்ளிகளுடன் 7வது இடத்தில் உள்ளது. அதேபோல் லக்னோ அணி மூன்று போட்டிகளில் விளையாடி இரண்டில் வெற்றி பெற்று, ஒரு போட்டியில் தோல்வியைச் சந்தித்துள்ளது. இதனால் லக்னோ அணி 4 புள்ளிகளுடன் நான்காவது இடத்தில் உள்ளது.