CSK vs MI: மிட்செல் சாண்ட்னருக்கு பதில் ஷர்துல் தாக்கூர்? சர்ச்சையில் மும்பை இந்தியன்ஸ்.. மௌனம் கலைத்த ஜெயவர்த்தனே!

IPL 2026: மிட்செல் சாண்ட்னருக்கு பதிலாக ஷர்துல் தாக்கூர் களமிறக்கப்பட்டது விதிகளுக்கு உட்பட்டதா என ரசிகர்கள் கேள்வி எழுப்பி வருகின்றனர்.

மிட்சேல் சாண்ட்னர்

Source : social media

ஐபிஎல் 2026 தொடரில் சென்னை சூப்பர் கிங்ஸ் அணிக்கு எதிரான போட்டியில், மும்பை இந்தியன்ஸ் அணி மேற்கொண்ட 'கன்கஷன் சப்ஸ்டிடியூட்' (Concussion Substitute) விவகாரம் தற்போது பெரும் விவாதத்தை கிளப்பியுள்ளது.

மிட்செல் சாண்ட்னருக்கு பதிலாக ஷர்துல் தாக்கூர் களமிறக்கப்பட்டது விதிகளுக்கு உட்பட்டதா என ரசிகர்கள் கேள்வி எழுப்பி வருகின்றனர்.

நடந்தது என்ன?

சிஎஸ்கே பேட்டர் கார்த்திக் சர்மா அடித்த பந்தை கேட்ச் பிடிக்க முயன்றபோது, மும்பை வீரர் மிட்செல் சாண்ட்னர் கீழே விழுந்து காயமடைந்தார். தரையில் விழுந்த வேகத்தில் அவர் தனது தோள்பட்டையை பிடித்துக்கொண்டு வலியால் துடித்தார். உடனடியாக அவர் மைதானத்தை விட்டு வெளியேறினார்.

ஆனால், சிறிது நேரத்திலேயே சாண்ட்னருக்குப் பதிலாக ஷர்துல் தாக்கூர் கன்கஷன் சப்ஸ்டிடியூட்டாக உள்ளே வருவார் என அறிவிக்கப்பட்டது. தோள்பட்டை காயத்திற்கு எப்படி 'தலைக்காயத்திற்கான' (Concussion) மாற்று வீரரை அனுமதிக்கலாம் என சமூக வலைதளங்களில் விவாதங்கள் அனல் பறந்தன.

மௌனம் கலைத்த மஹேல ஜெயவர்த்தனே

இந்த விவகாரம் குறித்து போட்டிக்குப் பிறகு விளக்கமளித்த மும்பை இந்தியன்ஸ் தலைமை பயிற்சியாளர் மஹேல ஜெயவர்த்தனே கூறியதாவது:"அவர் விழுந்தபோது முதலில் தலை மற்றும் கழுத்துப்பகுதிதான் தரையில் மோதியது. தோள்பட்டையிலும் காயம் இருந்தது உண்மைதான். பரிசோதனைக்குப் பிறகு அவருக்கு தலைசுற்றல் (Dizziness) ஏற்பட்டது. தோள்பட்டை காயத்திற்கு ஐஸ் வைக்கப்பட்டாலும், அவர் உடல்நிலை சீராக இல்லை. அதனால் தான் ஸ்கேன் செய்ய அழைத்துச் சென்றோம்."

மேலும், இந்த முடிவை நடுவர்களே எடுத்ததாக அவர் குறிப்பிட்டார். "நாங்கள் கோரிக்கை வைத்தோம், ஆனால் இறுதி முடிவு மேட்ச் ரெப்ரி மற்றும் நடுவர்களுடையது. அவர்கள் ஷர்துல் தாக்கூரை அனுமதித்தனர். சாண்ட்னரின் பேட்டிங் திறமைக்கு ஈடாக ஷர்துல் கருதப்பட்டது அவருக்கு ஏமாற்றமாக இருக்கலாம், ஆனால் விதிமுறை இதுதான்" என்றார் ஜெயவர்த்தனே.

சதமடித்த சஞ்சு சாம்சன்.. சரிந்த மும்பை!

சர்ச்சைகள் ஒருபுறம் இருக்க, ஆட்டத்தில் சிஎஸ்கே முழு ஆதிக்கம் செலுத்தியது. முதலில் பேட்டிங் செய்த சென்னை அணி, தனது தொடக்க வீரரின் அதிரடி சதம் மூலம் 207 ரன்கள் குவித்தது.

208 ரன்கள் என்ற கடின இலக்குடன் களமிறங்கிய மும்பை இந்தியன்ஸ், சிஎஸ்கேவின் பந்துவீச்சை சமாளிக்க முடியாமல் அடுத்தடுத்து விக்கெட்டுகளை பறிகொடுத்தது. இறுதியில் 104 ரன்களுக்கு ஆல்-அவுட் ஆன மும்பை, 103 ரன்கள் வித்தியாசத்தில் படுதோல்வி அடைந்தது.

இந்தத் தோல்வி 2026 ஐபிஎல் தொடரில் மும்பை அணியின் நிலையை மேலும் மோசமாக்கியுள்ளது. அதே சமயம், சாண்ட்னர் - ஷர்துல் மாற்றம் குறித்த விவாதம் இன்னும் ஓய்ந்தபாடில்லை.