WPL 2026 Eliminator: லேடீசே ராணுவ படை..! குஜராத்தை குமுறிய டெல்லி! 4வது முறையாக இறுதிப்போட்டிக்கு தகுதி!

WPL 2026 Eliminator: மகளிர் பிரீமியர் லீக் தொடரில் டெல்லி அணி குஜராத்தை வீழ்த்தி 4வது முறையாக இறுதிப்போட்டிக்கு முன்னேறி அசத்தியுள்ளது.

இறுதிப்போட்டிக்கு முன்னேறிய டெல்லி

Source : twitter

மகளிர் ப்ரிமியர் லீக்கின் 5வது சீசன் விறுவிறுப்பாக நடந்து வருகிறது. இந்த சீசனின் இறுதிப்போட்டியில் ஆர்சிபி அணி ஏற்கனவே தகுதி பெற்ற நிலையில், இறுதிப்போட்டிக்குச் செல்லப்போகும் மற்றொரு அணி யார்? என்பதைத் தீர்மானிக்கும் எலிமினேட்டர் போட்டி இன்று வதோதராவில் நடந்தது.

169 ரன்கள் டார்கெட்:

டெல்லி - குஜராத் அணிகள் மோதிய இந்த போட்டியில் சோபி டிவைன் 6 ரன்னிலும், கேப்டன் கார்ட்னர் டக் அவுட்டாகியும், கனிகா 6 ரன்னிலும் அவுட்டாகினாலும் பெத்மூனியின் அபாரமான 62 ரன்கள், ஜார்ஜியாவின் 35 ரன்கள், காஷ்வியின் 18 ரன்களுடன் டெல்லிக்கு 169 ரன்களை குஜராத் இலக்காக நிர்ணயித்தது. 

169 ரன்கள் என்ற இலக்குடன் களமிறங்கிய டெல்லி அணிக்கு லிஸ்லி லீ - ஷபாலி வர்மா அதிரடியான தொடக்கத்தை அளித்தனர். ரேணுகா, காஷ்வி, ராஜேஸ்வரி வீசிய பந்துகளை அபாரமாக அடித்து ஆடினர். லிஸ்லீ லீ பவுண்டரிகளாக விளாசினார். அவருக்கு பக்கபலமாக ஷபாலியும் பவுண்டரி விளாசினார்.

லீ - ஷபாலி மிரட்டல் பேட்டிங்:

இதனால், புயல் வேகத்தில் டெல்லி ஸ்கோர் எகிறியது. அரைசதத்தை நோக்கி முன்னேறிய லிஸ்லீயை ஜார்ஜியா அவுட்டாக்கினார். அவர் 24 பந்துகளில் 8 பவுண்டரி 1 சிக்ஸருடன் 43 ரன்கள் எடுத்து அவுட்டானார். அவர் அவுட்டான அதே ஓவரின் கடைசி பந்தில் ஷபாலி வர்மா அவுட்டானார். அவர் 21 பந்துகளில் 7 பவுண்டரியுடன் 31 ரன்கள் எடுத்து அவுட்டானார்.

அடுத்து ஜோடி சேர்ந்த கேப்டன் ஜெமிமா - லாரா ஜோடி அபாரமாக ஆடியது. 10 ஓவர்களில் 107 ரன்களை டெல்லி குவிக்க குஜராத் தடுமாறியது. அனுபவம் வாய்ந்த இவர்கள் இருவரும் சேசிங்கை எளிதாக்கினார்கள். தொடர்ந்து ஜெமிமா அபாரமாக ஆடியதால் டெல்லி அணி வெற்றியை முன்னேறினர். அவருக்கு லாராவும் நல்ல ஒத்துழைப்பு அளித்தார்.

டெல்லி அபார வெற்றி:

இந்த ஜோடியைப் பிரிக்க ரேணுகாசிங், காஷ்வி கவுதம், ராஜேஸ்வரி, சோபி, ஜார்னியா ஆகியோரை பயன்படுத்தினர். ஆனாலும், இவர்களது அதிரடியால் பந்துகளை காட்டிலும் தேவைப்படும் ரன்கள் குறைவாகவே இருந்தது.

வெற்றிக்கு 9 ரன்கள் மட்டுமே தேவைப்பட்ட நிலையில் ஜெமிமா அவுட்டானார். அவர் 23 பந்துகளில் 4 பவுண்டரி 1 சிக்ஸருடன் 41 ரன்கள் எடுத்து அவுட்டானார். ஆனாலும், அதனால் டெல்லியின் வெற்றி பாதிக்கப்படவில்லை. கடைசியாக டெல்லி அணி 15.4 ஓவர்களில் 169 ரன்கள் எட்டி 7 விக்கெட் வித்தியாசத்தில் வெற்றி பெற்றது. லாரா வோல்வார்ட் 24 பந்துகளில் 2 பவுண்டரி 1 சிக்ஸருடன் 32 ரன்கள் எடுத்து அவுட்டாகாமல் இருந்தார். மகளிர் பிரீமியர் லீக்கில் சேஸ் செய்யப்பட்ட அதிகபட்ச இலக்கும் இதுவே ஆகும்.

இறுதிப்போட்டியில் ஆர்சிபி - டெல்லி:

இந்த போட்டியில் வெற்றி பெற்ற டெல்லி அணி நாளை மறுநாள் பெங்களூர் அணியுடன் இறுதிப்போட்டியில் ஆட உள்ளது. 5வது முறையாக நடக்கும் இந்த சீசனில் 4வது முறையாக டெல்லி அணி இறுதிப்போட்டிக்கு முன்னேறியுள்ளது. டெல்லி - ஆர்சிபி ஆகிய இரு அணிகளும் கடந்த 2024ம் ஆண்டு இறுதிப்போட்டியில் ஆடியுள்ளனர். அந்த போட்டியில் பெங்களூர் அணி வெற்றி பெற்று கோப்பையை கைப்பற்றியது என்பது குறிப்பிடத்தக்கது. .