World Cup 2023 Points Table: உலகக் கோப்பை புள்ளிப்பட்டியல் - பரபரப்பான 2 போட்டிகள் - நிகழ்ந்த மாற்றங்கள் என்ன?

World Cup 2023 Points Table: உலகக் கோப்பையில் வங்கதேச அணியை வீழ்த்திய நெதர்லாந்து அணி, புள்ளிப்பட்டியலில் 2 வெற்றிகளுடன் 8வது இடத்தில் நீடிக்கிறது.

உலகக் கோப்பை புள்ளிப்பட்டியல்

World Cup 2023 Points Table: உலகக் கோப்பையில் நேற்று நடைபெற்ற இரண்டு பரபரப்பான போட்டிகளின் முடிவுகள், புள்ளிப்பட்டியலில் என்ன மாதிரியான மாற்றத்தை நிகழ்த்தியுள்ளது என்பதை விரிவாக பார்க்கலாம்.

உலகக் கோப்பை:

சர்வதேச கிரிக்கெட் சம்மேளனத்தின் ஒருநாள் உலகக் கோப்பை தொடர், கடந்த 5ம் தேதி தொடங்கி உற்சகமாக நடைபெற்று வருகிறது. சுழற்பந்து வீச்சுக்கு சாதகமான இந்திய மைதானங்களில் சில அணிகள் தடுமாறினாலும், சில அணிகள் அபாரமான ஆட்டத்தை வெளிப்படுத்தி வருகின்றன. அதோடு, பேட்ஸ்மேன்கள் ரன் மழை பொழிவது ரசிகர்களை உற்சாகமடைய செய்துள்ளது. இந்நிலையில் நேற்று நடைபெற்ற இரண்டு லீக் போட்டிகளும் மிகவும் பரபரப்பாக அமைய, ஆஸ்திரேலியா மற்றும் நெதர்லாந்து அணிகள் வெற்றியை பதிவு செய்துள்ளனர்.

நெதர்லாந்து வெற்றி:

கொல்கத்தாவின் ஈடன் கார்டன் மைதானத்தில் நடைபெற்ற, நேற்றைய இரண்டாவது லீக் போட்டியில் நெதர்லாந்து அணி பேட்டிங்கை தேர்வு செய்தது. 50 ஓவர்கள் முடிவில் 229 ரன்களை சேர்த்து அந்த அண் ஆல் அவுட் ஆனது. இந்த இலக்கை வங்கதேச அணி எளிதில் எட்டிவிடும் என எதிர்பார்க்கப்பட்ட நிலையில், 42.2 ஓவர்களில் வெறும் 142 ரன்களை மட்டுமே சேர்த்து அந்த அணி ஆல்-அவுட்டானது. இதனால், 87 ரன்கள் வித்தியாசத்தில் நெதர்லாந்து அணி அபார வெற்றி பெற்றது.  

நியூசிலாந்து போராடி தோல்வி:

முன்னதாக தர்மசாலாவில் நடைபெற்ற மற்றொரு போட்டியில் நியூசிலாந்து அணிக்கு எதிராக, ஆஸ்திரேலியா அணி முதலில் பேட்டிங் செய்தது. டிராவிஸ் ஹெட் மற்றும் வார்னரின் அபார ஆட்டத்தால் அந்த அணி 49.2 ஓவர்கள் முடிவவில் 388 ரன்களை குவித்து ஆட்டமிழந்தது. இதைதொடர்ந்து களமிறங்கிய நியூசிலாந்து வீரர்களும் அபாரமான ஆட்டத்தை வெளிப்படுத்தினர். இருப்பினும், இமாலய இலக்கை துரத்திய அந்த அணி வெறும் 5 ரன்கள் வித்தியாசத்தில் தோல்வியுற்றது. இந்த இரண்டு போட்டிகளின் முடிவுகளும் புள்ளிப்பட்டியலில் மாற்றத்தை ஏற்படுத்தியுள்ளது.

புள்ளிப்பட்டியல்:

அணிகள்	போட்டிகள்	வெற்றி	தோல்வி	புள்ளிகள்
தென்னாப்ரிக்கா	6	5	1	10
இந்தியா	5	5	0	10
நியூசிலாந்து	6	4	2	8
ஆஸ்திரேலியா	6	4	2	8
இலங்கை	5	2	3	4
பாகிஸ்தான்	6	2	4	4
ஆப்கானிஸ்தான்	5	2	3	4
நெதர்லாந்து	6	2	4	4
வங்கதேசம்	6	1	5	2
இங்கிலாந்து	5	1	4	2

நடப்பு உலகக் கோப்பையில் பாதிக்கும் மேற்பட்ட லீக் போட்டிகள் நடந்து முடிந்துள்ளன. இதில் தென்னாப்ரிக்கா அணி முதலிடத்தையும், போட்டியை நடத்தும் இந்தியா தோல்வியையே சந்திக்காமல் 2வது இடத்திலும் உள்ளது. தொடர்ந்து தலா 8 புள்ளிகளுடன் நியூசிலாந்து மற்றும் ஆஸ்திரேலிய அணிகள், முறையே 3 மற்றும் நான்காவது இடத்தில் உள்ளன. லீக் சுற்றின் முடிவில், புள்ளிப்பட்டியலில் முதல் 4 இடங்களை பிடிக்கும் அணிகள் அரையிறுதிக்கும் முன்னேறும் என்பது குறிப்பிடத்தக்கது.

இன்றைய போட்டி:

லக்னோவில் இன்று நடைபெறும் லீக் போட்டியில் நடப்பு சாம்பியனான இங்கிலாந்தை, இந்திய அணி எதிர்கொள்கிறது. இதில் இந்தியா வெற்றி பெற்றால் புள்ளிப்பட்டியலில் முதலிடத்திற்கு முன்னேறும். ஒருவேளை இங்கிலாந்து அணி வெற்றி பெற்றாலும், பெரிய மாற்றம் இருக்காது என எதிர்பார்க்கப்படுகிறது.