Sanju Samson: இடியாய் இடித்த சாம்சன்! இங்கிலாந்தை பொளந்து கட்டிய மலையாள பங்காளி!
T20 WC 2026 IND vs ENG Semi Final: இங்கிலாந்து அணிக்கு எதிரான அரையிறுதிப் போட்டியில் சாம்சன் 42 பந்துகளில் 89 ரன்கள் குவித்து அபாரமாக ஆடி அவுட்டானார்.
டி20 உலகக்கோப்பையில் நியூசிலாந்து அணியுடன் இறுதிப்போட்டியில் மோதப்போவது யார்? என்பதைத் தீர்மானிக்கும் 2வது அரையிறுதிப் போட்டியில் மும்பை வான்கடே மைதானத்தில் இந்தியா - இங்கிலாந்து அணிகள் மோதி வருகின்றனர்.
கேட்ச்சை விட்ட ப்ரூக்:
இந்த போட்டியில் டாஸ் வென்ற இங்கிலாந்து பந்துவீச்சைத் தேர்வு செய்தது. சவாலான இலக்கை நிர்ணயித்தால் மட்டுமே இறுதிப்போட்டிக்குச் செல்ல முடியும் என்பதால் தொடக்கம் முதலே இந்திய வீரர்கள் சாம்சன் - அபிஷேக் சர்மா அதிரடியாக ஆடினார். அபிஷேக் சர்மா தடுமாறினார். அதிரடி காட்ட முயற்சித்த அவர் 7 பந்துகளில் 9 ரன்களுடன் பெவிலியன் திரும்ப, கடந்த போட்டியில் வெற்றி பெற வைத்த சஞ்சு சாம்சன் அதிரடியாக ஆடினார்.
அவருக்கு 15 ரன்களில் இங்கிலாந்து கேப்டன் ஹாரி ப்ரூக் கேட்ச்சை தவறவிட, இங்கிலாந்து பந்துவீச்சை துவம்சம் செய்தார். ஆர்ச்சர், ஓவர்டன், சாம் கரண், ரஷீத், டாவ்சன் என யார் வீசினாலும் பவுண்டரியும், சிக்ஸரும் விளாசினார். அபாரமாக ஆடிய அவர் 25 பந்துகளில் அரைசதம் விளாசினார்.
பட்டாசாய் வெடித்த சாம்சன்:
தொடர்ந்து அபாரமாக அவர் ஆடியதால் இந்திய அணியின் ஸ்கோர் ஜெட் வேகத்தில் ஏறியது. இஷன் கிஷானும் அவருக்கு ஒத்துழைப்பு அளித்த நிலையில், சஞ்சு சாம்சன் சிக்ஸரும், பவுண்டரியும் பறக்க விட்டார். 12 ஓவர்களில் இந்திய அணி இவரது அதிரடியால் 150 ரன்களை எட்டியது.
தொடர்ந்து அதிரடியாக ஆடி சதத்தை எட்டுவார் என்று எதிர்பார்க்கப்பட்ட நிலையில், வில் ஜேக்ஸ் சுழலில் சாம்சன் அவுட்டானார். அவர் 42 பந்துகளில் 8 பவுண்டரி 7 சிக்ஸருடன் 89 ரன்கள் எடுத்து அவுட்டானார். இந்திய அணி இங்கிலாந்து அணிக்கு மிகப்பெரிய இலக்கை நிர்ணயிக்கும் பொன்னான வாய்ப்பை சாம்சன் உருவாக்கி கொடுத்துள்ளார்.
குவியும் பாராட்டு:
வெஸ்ட் இண்டீசை கட்டாயம் வீழ்த்தியாக வேண்டிய சூப்பர் 8 போட்டியில் இந்திய அணிக்காக கடைசி வரை அவுட்டாகாமல் 97 ரன்கள் விளாசி இந்திய அணியை வெற்றி பெற வைத்தது சாம்சன் என்பது குறிப்பிடத்தக்கது. அரையிறுதியில் அபாரமாக ஆடிய சாம்சனுக்கு பாராட்டுகள் குவிந்து வருகிறது.
தலைப்பு செய்திகள்
ட்ரெண்டிங் செய்திகள்
